Bɔ bɛ̀rɛbaa nɛ 17 - LAWA A BOO SONBORE

Maasaa laanka Meribaa a mu

¹ Izirayeli nɛnyaan zaman lɛ tumaa yoo Sini don lɛ nɛ, ǹ nə́ woo nyɛɛn ka ǹ tɔ-wɔ nɛ, á kɔnpɛ ka Dɛnaa a boo ne. Ǹ nə́ golee Refidimu bǎã nɛ, sɛnɛ, mu goã a tan zaman nə́ mii wa.

² Zaman lɛ zia da Muizu ganaa, ǹ nə́ pɛ nɛ: «Mu kɔ wɔ la wɔ mi.» Muizu pɛ ǹ nɛ: «Wàa na á baa ka tá zia diɛ ma ganaa? Wàa na á baa ka tá n diɛ Dɛnaa gɔ́ɔ̃ li?»

³ Mu boro zaman lɛ kũ walan, ǹ nə́ zùũzùũ si Muizu ganaa. Ǹ nə́ pɛ: «Wàa na á baa ń soo wɔ nɛ, n wɔ bɔ Ezipti gána nɛ? A n lɔn, ń tá toɛ wɔ n giɛ̃ muboro gɔn, wɔ laanka wɔa nɛnyaanan nɛ ka wɔa tɔɔn nɛ?»

⁴ Muizu Dɛnaa nyankɔ: «Ma doamaa nɛ, ma wàa mɛn zɛnaa zaman kɛ nɛ? Bɛ̀ á kiɛ̃ kɛ la boɛɛn nɛ, ǹ tá re ma dii ka kɔlɔ nɛ.»

⁵ Dɛnaa pɛ Muizu ni: «Kiɛ̃ zaman kɛ nyɛɛnɛ, n Izirayeli nɛnyaanan lɛn min golen kɔnɔn kũ, n nə ǹ kaa kun n din ni. N tà mu lɛ dɛ ka bàlà mɛn nɛ, bɛ lɛ saa n gɔn, n woo.

⁶ Ma á re golee n nyɛɛnɛ, bǎã kɔ́n nɛ kànaa, Orɛbu kele lɛ la. Kele lɛ dɛ, mu á re soe a nɛ, zaman lɛ mi.» Muizu zɛnaa miɛ̃ Izirayeli nɛnyaanan min golen lɛn yɔrɔ-a.

⁷ Á bɛa bǎã kɛ lɛ bíi mà Maasaa ka Meribaa, bɛn giala mà "Damagɔ́ɔ̃ li" laanka "Zia da ma-a". Izirayeli nɛnyaanan zia kɛ lɛ a lɛa, ka ǹ da Lawa gɔ́ɔ̃ li kɛ nɛ, bɛ̀ ǹ bɛ́ ǹ nə́ pɛ mà Dɛnaa lɛ tá ǹsɛn bii hinlaa a banban.

Amalɛki minin nə zia mɛn da Izirayeli nɛnyaanan ganaa

⁸ Amalɛki minin nə́ daa zia da Izirayeli nɛnyaanan ganaa Refidimu bǎã nɛ.

⁹ Muizu pɛ Zozoe ne: «Giĩn bɔ, n soo n zia baa Amalɛki minin ganaa biɛ̃. Ma á re woe golee tenten lɛ mìi ni, Lawa a bàlà lɛ n ma gɔn.»

¹⁰ A bɛ́ á pɛ lɔn, Zozoe soo, á zia lɛ giala kɔ Amalɛki minin ganaa. Bɛ á zɛnɛɛ bɛ̀ Muizu ni, Aarɔn nɛ ka Uuru n tenten lɛ mìi ni.

¹¹ Haya! Bɛ̀ Muizu nə n gɔn saa lon, Izirayeli minin man boe Amalɛki minin la, bɛ̀ a n gɔn gisĩ, Amalɛki n boe Izirayeli la.

¹² A gɔnɔn bɛ́ ǹ nə́ laa, Aarɔn laanka Uuru kɔlɔ saa, ǹ nə́ da a giulun á giã la. Ǹ nə́ golee a paǹan paanan li, ǹ nə́ a gɔnɔn kũ lon. Bɛa yɔrɔ kɛ la, a gɔnɔn nə́ goã lon, yǎa wasa a yii siɛ̃ biikoo li.

¹³ Zozoe boo Amalɛki minin lɛn la, á ǹ dɛ ka gɔya nɛ.

¹⁴ Dɛnaa pɛ Muizu ni: «Kɛ kiɛ̃ sɛ́wɔ nɛ, a goã gũ yiri ni ǹ sii lɛa. A pɛ Zozoe ne, mà má á re Amalɛki minin papaɛ̃ ka lenlen, min din ná a ba ǹ boo diɛ kanaa doo wa!»

¹⁵ Muizu *wúlu bɔ ǹ bǎã dɔ, á tɔ gole kɔ a ganaa: "Dɛnaa n ka maa ziabaa ǹ zanzan bɛ́ lɔn".

¹⁶ Á pɛ: «Ka daa wɔ n liɛ, wɔ gɔnɔn nə́ lon, dia-n Dɛnaa a zanzan lɛ la, wɔ pɛ: Zia lɛ ka Amalɛki minin ni, a n yǎa duduu zia lɛa.»