Bɔ bɛ̀rɛbaa nɛ 11 - LAWA A BOO SONBORE

(10) Nɛgiĩ bibinaan gɛ̀

¹ Dɛnaa pɛ Muizu-n kɛnɛn: «Man die dɔlɔ lɛ a giala nyɔmɔɔ diɛ, ma da *Faarahɔn laanka Ezipti gána mìi ni. Bɛ kio, ma á re toɛ ǹ soo, ǹ woo ǹ nə n bɔ kànaa. A n die toɛ ka soo ka woo dinin ya, a n die ka lui duduu a ka bɔ kànaa.

² Á pɛ zaman lɛ nɛ, mà giĩ gogoonmaa nɔ̀n da ǹ miãkɛn la, lɔ gogoonmaa dɔ nɔ̀n da a wɔ la, ka wɔrɔgiala mànan nɛ, ka sana wɔn nɛ.»

³ Dɛnaa zaman lɛ gɛrɛsiɛ bɔ Ezipti minin lɛn lon. Ka bɛ dɔ nɛ, Muizu dinmaa gugurubaa yɛ Ezipti gána lɛ nɛ, Faarahɔn a kiodɛnan laanka gána lɛ a minin yɔrɔ-a.

⁴ Muizu pɛ: – Dɛnaa n pii kɛnɛn: «Làan biikoo li, ma á re boe Ezipti gána gɔ́ɔ̃ nɛ,

⁵ gána lɛ a nɛgiĩ bibinaan tumaa á re giɛ̃. Faarahɔn din a nɛgiĩ bibinaa mɛn doamaa bɛ́ nɛ, a kii baa a kio, a kũ bɛ ganaa a wo bɛ̀rɛlɔ *belee lɔ gii la wole kɛ a nɛgiĩ bibinaa yaa, ka tɔɔn dɔn nɛ bibinaan tumaa nɛ.

⁶ Wuu pɛ gole á re boe gána lɛ din tumaa gɔ́ɔ̃ nɛ, wuu mɛn miã bin yɛ gána lɛ-n wa, a ná a die yii dɔn doo wa.

⁷ Sɛnɛ, Izirayeli nɛnyaanan kɛn li, gin din ba re gisĩ min hinlaa tɔɔ ganaa wa. Bɛa yɔrɔ kɛ lɛ la, ǹ tá re doɛ̃ mà Dɛnaa lɛ á bɔkɔnlɛ we Ezipti minin laanka Izirayeli minin bii ni.»

⁸ Bɛa biikoo li kəni, a kiodɛnan kɛn lɛn tá re die ma ganaa, ǹ kaa tán ma yɔrɔ-a, ǹ pɛ: «Soo, n laanka zaman kɛ lɛ tumaa nɛ n kio. Ma á re soe fufuu.» Muizu foo bɛ́ yoo-n parsiini, á soo á n bɔ Faarahɔn li.

⁹ Dɛnaa pɛ Muizu-n kɛnɛn doo: «Faarahɔn ba re n too koe ka lon, a toa ka woo wa, bɛ á re toɛ man din pàã gole kɛ nyaa gána kɛ gɔ́ɔ̃ nɛ, ma wo-n nyɛɛnɛ.»

¹⁰ A laanka Aarɔn bɛa kaãbaa ǹ siin kɛn lɛn tumaa zɛnaa Faarahɔn yii ni, Dɛnaa na á toa a too kaka kɔ, a toa Izirayeli nɛnyaanan lɛn nə́ soo, ǹ nə́ woo, ǹ nə́ n bɔ a gána lɛ-n wa.