Bɔ bɛ̀rɛbaa nɛ 1 - LAWA A BOO SONBORE

Izirayeli nɛnyaanan bɛ̀rɛ baa Ezipti gána-n boo

¹ Zakɔba lɛ a tɔ n Izirayeli, á woo Ezipti gána nɛ. A nɛnyaanan mɛnɛn nə wo kun ni, ka ǹ kion minin ni, bɛn tɔ á ke:

² Urubɛn nɛ, Simiɔn nɛ, Levii ni ka Zudaa nɛ,

³ Isakaara nɛ, Zabulɔn nɛ ka Bɛnzamɛn nɛ,

⁴ Dan nɛ, Nɛfutalii ni, Gaadi ne ka Asɛɛrɛ nɛ.

⁵ Ǹ bɛ́ woe, bɛ̀ Zozɛfu sɛ n Ezipti gɔrɔ. Zakɔba a kion minin lɛn tumaa na á goã min pɔsɔbaa.

⁶ Bɛ kio Zozɛfu daa á gã. Ǹ dɔɔ̃nɔn laanka bɛa biikoo minin kɛn lɛn tumaa daa ǹ nə́ gã.

⁷ Izirayeli minin lɛn nə́ nɛnyaanan yɛ, ǹ nə́ mɔnaa Ezipti gána lɛ nɛ, ǹ pàã gole kɔ parsiini.

⁸ Bɛ kio ǹ nə́ kii dii koa Ezipti gána lɛ mìi la, kii mɛn bɛ́ a Zozɛfu dɔ̃ wa.

⁹ Bɛa kii lɛ pɛ a gána minin manɛ: «Á ke, Izirayeli nɛnyaanan lɛn nə́ mɔnaa á la yii ni, ǹ pàã n giɛ mà a la wɔa wɔ nɛ.

¹⁰ Ka daa wɔ ga yiri sonbore li, wɔ yoo ǹ gialaa wɔ ǹ kurəə mɔnaa ganaa. Bɛ bie wa, bɛ̀ zia yoo, maǹ die kiɛ kun ka wɔa zɔ́ɔn nɛ, ǹ zia da wɔ ganaa, ǹ tɔn soo ǹ nə n bɔ gána lɛ nɛ.»

¹¹ Bɛ lɛ taman yii, Ezipti minin lɛn nə́ kənən koa ǹ mìi la, maǹ nə ǹ kaa pàã dí nyɛɛ ganaa. Ǹ nə́ màn-bii koa ǹ kiwin dɔ Ezipti gána a kii *Faarahɔn nɛ, Pitomu laanka Ramusɛsi kiwin kɛn manɛ.

¹² Sɛnɛ, ǹ bɛ́ giɛ li mà ǹ màn da Izirayeli nɛnyaanan lɛn nɔmaa li ǹ mɛn waáraa, bɛa biikoo lɛ din ni, màn nə́ miɛ̃ ǹ mɔnaa li, ǹ nə́ bǎã siɛ. Ǹ sii goã nyɛ́ɛ diɛ Ezipti minin ganaa.

¹³ Bɛ lɛ a lɛa, ǹ nə́ bɔ Izirayeli nɛnyaanan lɛn yii ni, ka n pɛ mà bɛ̀rɛn manɛ.

¹⁴ Ǹ nə́ kanaa tìĩ bɔ ǹ nyin ni ka dí babaraa nɛ: tii miɛ̃ nɛ, toopaa boe ne ka wuru dí tumaa nyɛɛ nɛ. Maǹ nə́ nɔmaa ǹ dí tumaa da ǹ mìi-n ka baraabaa nɛ.

Kii Faarahɔn a Izirayeli nɛnyaanan dɛ boo

¹⁵ Nɛ-yole min paa na á goã *Ebrəə minin lɛn li, goon tɔ na á goã Sifra, goon kɛ dɔ tɔ n Puha. Ezipti gána a kii lɛ pɛ bɛn manɛ:

¹⁶ «Bɛ̀ ka tá n doe Ebrəən lɛn lɔn lɛ, ǹ nɛ yɛ gɔ́ɔ̃ nɛ, ka ga nɛnyaan lɛ ganaa doɛ̃. Bɛ̀ nɛginin ni, ka dɛ a gã. Bɛ̀ nɛlɔ nɛ, ka toa a yii n koo.»

¹⁷ Sɛnɛ, lɔ nɛ-yolen lɛn nə́ nyɛ́ɛ baa Lawa nɛ. Kii lɛ boo mɛn pɛ ǹ nɛ, ǹ sii lɛ zɛnaa á kɔnpɛ ka bɛ-n wa. Ǹ nə́ nɛgininin lɛn dɔn yii toa koo.

¹⁸ Ezipti gána a kii lɛ tɔ́n lɛ dia ǹ la, á pɛ ǹ nɛ: «Wàa na á baa ka zɛnaa miɛ̃, ka ǹ nɛgininin yii toa koo?»

¹⁹ Lɔ nɛ-yolen lɛn nə́ pɛ Faarahɔn nɛ: «Ebrəən lɛn lɔn ba goon ka Ezipti minin wɔn nɛ wa. Pàã tá Ebrəə lɔn lɛn lon, nɛ-yole laan bɛ̀ a n doe, bɛ̀ ǹ nə́ ǹ nɛ yɛ.»

²⁰ Bɛa yɔrɔ kɛ lɛ la, màn nə́ mɛ Izirayeli nɛnyaanan lɛn li, ǹ nə́ mɔnaa, ǹ pàã gole kɔ.

²¹ Lɔ nɛ-yolen lɛn sɛn bɛ́ ǹ nə́ nyɛ́ɛ baa Lawa nɛ, Lawa bǐɛ̃ zɛnaa ǹ nɛ, á nɛnyaanan kɔ ǹ la.

²² Bɛ lɛ nɛ, Faarahɔn pɛ a gána a zaman tumaa nɛ: «Ka Ebrəən lɛn nɛnyaan tiɛɛ̃n giĩdɛnaa tumaa zũ tà mu li, ka toa ǹ nɛlɔdɛnan yii goã koo.»