Kolɔɔsi minin 3 - LAWA A BOO SONBORE

¹ Haya, ka laanka *Krita yii bɛ́ á kaa kun, ka toa ka ga lon mànan li, Krita din bɛ́ giã-n bǎã mɛn nɛ, Lawa gusin.

² Ka n taasɛ lon mànan ganaa, ka baran n taasɛ tán wɔn ganaa wa.

³ Sonbore, ka gã, kaa yiikoonaabaa lɛ n durii-n Lawa gɔn, ka Krita bɛ́ durii-n lɔn.

⁴ Krita mɛn bɛ́ kaa yiikoonaabaa taãn-taãn lɛ lɛa, bɛ̀ bɛ lɛ daa n din nyaa ǹ mɛn pinaa, ka dɔn tá re yii kun a din ni gugurubaa nɛ.

Dùũ sii zizi laanka dùũ sii dii boo

⁵ Dùũ siin mɛnɛn bɛ́ ka nɛ, ǹ nə́ kanaa dùũ siin lɛa, ka bɛn kaa ka lenlen. Bɛa dùũ siin lɛn nə́ ke: Kɔrɔbaa nɛ, ka gɔgɔrɛbaa nɛ, ka sii baraa zɛnaa a bɔlɔ-sɛ̀-mui ni, ka dùũ sii babaraa nɛ, ka yii miminibaa nɛ bɛ mɛn bɛ́ goon ka dì wúlu bɔ nɛ.

⁶ Bɛa sii kɔkɔrɔn kɛn lɛn lɛa nɛ, Lawa a foo-busii á re gisĩ a bɔlɔ tii wolen la.

⁷ Ka dɔn man ka goã tɔ we bɛa yɔrɔ kɛ lɛ la lɛlɛ, bɛ̀ dùũ sii baraan pàã bɛ́ tɔn ka mìi-n bɔrɔ.

⁸ Sɛnɛ kanna, ka n piã ka bɛa sii kɛ lɛ din tumaa nɛ: Ka n piã ka foo-busii ni, ka foo-yoo ne, ka baraabaa nɛ, ka baran toa sɔ-kɔ laanka sìi boon nə bɔ ka lɛ-n wa.

⁹ Ka baran soɛ bɔ kɔn nɛ doo wa, a giala, ká n sɔlɔ ká n bɔ kaa dùũ sii zizin kɛn laanka ǹ sii-zɛnaan tumaa nɛ,

¹⁰ ká dùũ sii diin saa, Lawa din nə ǹ mɛnɛn zɛnaa. Bɛa dùũ sii diin kɛn lɛn, Lawa nə ǹ gialaa tetele miɛ̃, mà ǹ nə n baa ka a din wɔn bɛ́ lɔn, màn mɛn bɛ́ toɛ, ka asɛ Lawa dɔ̃ taãn-taãnɛ.

¹¹ Bɛa yɔrɔ kɛ la, bɔkɔnlɛ banban doo Zuifu laanka tɔrɔ kɔsɔ bii ni wa, kurii wole banban ka kurii baãnaa-n wa; tii ni, sii-doɛ̃ baãnaa nɛ, bɛ̀rɛ nɛ, tá ma din gɔn wìi a lɛa wole ne, bɛ kɔ́n banban. Krita dinsɔɔ̃ na a tan, a din nə màn tumaa lɛa ka tumaa gɔ́ɔ̃ nɛ.

¹² Lawa din na á ka bɔ, ka na a din a tɔrɔ lɛa, a tá ka narɛ. Bɛ lɛ tɔ ganaa, ka toa makara-doɛ̃ laanka bǐɛ̃baa goã ka foo ne, ka din-gisiĩ ni, ka sabarɛbaa nɛ, ka sii simaa nɛ.

¹³ Ka toa ka kɔn a sii si ka ganaa. Bɛ̀ min tá taasɛ mà ǹ miã sã á wɔ a lon, ka kɔn a sã toa kɔn nɛ. Ka Dɛnaa din bɛ́ á kaa sii baraan toa ka-n lɔn, ka dɔn nə zɛnaa miɛ̃.

¹⁴ Bɛ din tumaa kio, ka toa kɔn-narɛɛ goã ka foo ne, a giala, kɔn-narɛɛ lɛ n toɛ, Lawa a bǐɛ̃ màn gialakun kɛ lɛ yii lɛ pã sɔnbɔraanɛ.

¹⁵ Krita dinsɔɔ̃ n boe la, a toa minin nə goã kun là nyantoro la. Ka n doa ka bɛa là nyantoro kɛ lɛ tamaa ka foo ne, a giala, a na á ka bíi bɛ lɛ a lɛa, ka goã kun ka gɔ̀nɔn goon toto bɛ́ lɔn. Ka toa ka bǐɛ̃ dɔ̃ Lawa nɛ.

¹⁶ Ka toa Krita a boo kɛ goã ka bii, a na a bǐɛ̃ kɛ tumaa zɛnaa ka foo ne. Ka kɔn daraa ka yiri sonbore ne, ka n dan da kɔn nɛ sɔnbɔraanɛ. Ka Lawa tɔ bɔ, ka barka da nɛ ka ka foo din tumaa nɛ. Ka Lawa tɔ bɔ ǹ loen lɔ, ka loe kɔsɔn nɛ, ka Yiri Fu bɛ́ loen mɛnɛn dɔn gisĩ ka mìi pán nɛ.

¹⁷ Ka bɛ́ boe la ka á boo woo boo diɛ, ka á sii woo sii zɛnɛɛ, ka bɛ tumaa zɛnaa ka wɔa Dɛnaa Yezu tɔ nɛ, bɛ̀ ka n barka diɛ Díi Lawa nɛ, a din lɛ pàã ganaa.

Giĩn laanka lɔn doroo ǹ boo

¹⁸ Lɔn lɛn, ka ka zuũn lɛ si, ká a doamaa bɛ́ a n zɛnaa lɔn, bɛ̀ ka á kaa-n kun ka Dɛnaa nɛ.

¹⁹ Giĩn lɛn, ka kaa lɔn lɛn narɛ, ka baran kakaarɛ kɔ ǹ ganaa wa.

Yɛ wolen laanka nɛnyaanan doroo ǹ boo

²⁰ Nɛnyaanan lɛn, ka kaa yɛ wolen bɔlɔ si ka sii din tumaa nɛ, Dɛnaa n giɛ bɛ lɛ li ka lon.

²¹ Díin lɛn, ka baran kaa nɛnyaanan lɛn foo busu wa, màn mɛn bɛ́ toɛ, ǹ foo baran ziziɛ̃ wa.

Bɛ̀rɛn laanka ǹ goledɛnan doroo ǹ boo

²² Bɛ̀rɛn lɛn, ka kaa kanaa a goledɛnan lɛn bɔlɔ si ka sii din tumaa nɛ, ka dí nya ǹ nɛ. Ǹ bɛ́ giɛ ka gɔn li mɛnɛn, bɛa lɛa bie wa. Ka baran zɛnaa, ka n pɛ mà ka n giɛ li, ka kɔɔ̃n kɔ minin ganaa wa. Sɛnɛ, ka zɛnaa ka gɔ́ɔ̃ fu ni, nyɛ́ɛbaa Dɛnaa yii-n wolen sii n ka bɛ nɛ.

²³ Ta dí lɛ n lɔn, ka nya ka foo sonbore ne, ka n pɛ mà ka ǹ nyɛɛ Dɛnaa nɛ, ka bie nyɛɛ minin man wa.

²⁴ Bɛ̀ ka á zɛnɛɛ miɛ̃, ka dɔ̃ mà Dɛnaa din nə n lɛ kɔ a minin la ka màn mɛn nɛ, á re ka sarɛɛ ka bɛ nɛ. Krita n goledɛnaa taãn lɛ lɛa, ka n dí nyɛɛ a din lɛ nɛ.

²⁵ Lawa a bɔkɔnlɛ we wa, bɛ̀ min dí kɔkɔrɔ nya, bɛa dɛnaa n die a dí kɔkɔrɔ nya ǹ saraa yii.