Busii pɛ 5 - LAWA A BOO SONBORE

Maǹ Dɛnaa Lawa a makara nyankoe

¹ Sii mɛn wɔ yɛ, Dɛnaa Lawa yiri nyan bɔ-n wa. Ga, ǹ bɛ́ sìi mɛn diɛ wɔ ganaa, n bɛ dɔ̃.

² N gána mɛn kɔ wɔ la, á ke tiin wɔ lɛa. Min mɛnɛn bɛ́ wɔ ba ǹ doɛ̃ wa, wɔa kionən man bɛn gɔn.

³ Wɔa díin banban. Á ke, wɔ n nɛ toenən lɛa. Wɔ daanan man ka giɔɔrɔn bɛ́ lɔn.

⁴ Wɔ n wɔrɔ boe mu ganaa, wɔ tɔ n yɛ wɔ mi. Wɔ n gɔn pii, wɔ tɔn tɛ koa nɛ.

⁵ Min mɛnɛn bɛ́ fuu nyɛɛ wɔ nɛ, maǹ tɔn wɔ kio lui. Wɔ́ nɔmaa, susui ba wɔ la wa.

⁶ Wɔ́ n gɔn dia Ezipti laanka Asiirii gána la, màn mɛn bɛ́ toɛ wɔ boo la wɔ màn yɛ wɔ bii.

⁷ Wɔ digolon nə́ sii baraa zɛnaa. Sɛnɛ, ǹ banban doo wa. Ǹ sii baraan gugurubaa na á kũ wɔ dinin mìi ni.

⁸ Bɛ̀rɛn man wɔa maadigiĩn lɛa. Min banban á wɔ sii ǹ la wa.

⁹ Wɔ nə n nyin koe wɔ tɔn màn-bii yɛ diə gɔ́ɔ̃ nɛ ǹ denzuun taman yii.

¹⁰ Bòo taman yii, wɔ gɔ̀nɔn nə wɛɛ̃-n ka belebele ka wɔ n kùsì ni.

¹¹ Wɔa zɔ́ɔn nə́ pàã zɛnaa lɔn ganaa *Siɔn kiwi, ka nɛlɔn nɛ Zudaa gána nɛ.

¹² Ǹ dininmaan nə́ kiwi lɛ a nyɛɛnaandɛnan tɛnɛn bɔlɔ yu. Ǹ min golen guguru kɔ wa.

¹³ Tɔntɔraan man wii lɔ ǹ gii guĩ. Nɛ tenən manə n gòã niɛ̃ ka gɔn yii ni ǹ mìi ni.

¹⁴ Min golen ba woe kiwi lɛ a kiɛnlɛ-a doo wa. Tɔntɔraan nə́ loe lɔ lɛ da.

¹⁵ Foo kɔɔ̃nbaa wɔlɔ lui wɔ ganaa. Wɔa bɛ̀baa nə n bɔyaa á gɛ̀ koa baa.

¹⁶ Kii bafolo bɔ wɔ mìi ganaa á mɛnaa. Wàa koe n ka kɛ nɛ! A giala wɔ sii baraa zɛnaa.

¹⁷ Bɛ lɛ n wɔ foo busi, wɔ yii a wɔlɔ yii doɛ̃ wa.

¹⁸ A giala, Siɔn kiwi lɛ nə n bɔyaa á diə baa, á n baa tolokan giã ǹ bǎã lɛa.

¹⁹ Sɛnɛ, nsɛ Dɛnaa Lawa, ma n kii lɛa yǎa duduu. Kiibaa mɛn bɛ́ a nyɛɛ wa, bɛ nə n wɔ lɛa yǎa duduu.

²⁰ Wàa na á baa, n yiri n boe ka wɔ nɛ biikoo tumaa li? Ma n die n la boe wɔ ganaa duduu?

²¹ Toa, wɔ wusoo wɔ da n li Dɛnaa Lawa! Sonbore, wɔ á n bɔyɛɛ wɔ daa. Yiikoonaabaa dii kɔ wɔ la, a n baa ka lɛlɛ ǹ wɔ bɛ́ lɔn!

²² Ma nə n wɔ daa lenlen ya? N foo na á yoo wɔ li á la yii ni?