Busii pɛ 3 - LAWA A BOO SONBORE

Foo doa á tɔn a tan

¹ Masɛ n min lɛa fuu n ma mìi ni. Dɛnaa Lawa a foo-yoo na á bɛa fuu lɛ da ma mìi ni.

² Á ma nɔɔ á ma da a nyɛɛnɛ. Á ma da tɔ wɔ ganaa wɔlɔ tì li. Wɔlɔ fúlu boo bie wa.

³ A n masɛ didii, lɛawaa tumaa li.

⁴ Má kũ má nya ma gòãn la. Á ma wen yiyiɛ.

⁵ Á ma kũ á ma lɛ tã. Á ma lɛnpɛnɛ ka foo-busii laanka nɔmaa nɛ.

⁶ Á ma da giã wɔlɔ tì li ganaa, ka min mɛnɛn bɛ́ ǹ nə́ gã haalɛ bibi.

⁷ Á ma lɛnpɛnɛ ka kungɔn nɛ, a n ma kurii soo ganaa. Á zɔrɔka gugurun kaa ma ganaa.

⁸ Ta ma nə n lɛ wurii, ta ma n gu diɛ, a nə n too tiɛ̃ maa nyankɔ li.

⁹ Á maa zii tã ka kɔlɔ dadaran nɛ. Á ma da zii kɔkɔrɔ la.

¹⁰ Dɛnaa Lawa lɛ n gòon màn gole lɛa masɛ ganaa, zoɛ̃ li mà a parɛ. A n ka yàra bɛ́ lɔn durii-n tewon ne.

¹¹ Á ma baã á ma bɔ maa zii la. Á ma tɔtoɛ̃, á ma ziziɛ̃.

¹² A ná a sa dii, á kiɛ lɛ doa ma ganaa.

¹³ A koã kiɛn kɛn, á bɛn tumaa dɔrɔ ma kii ni.

¹⁴ Maa zaman tumaa n ma diɛ yaa lɛa, ǹ nə́ loe loe ma ganaa lɛawaa yii li.

¹⁵ Dɛnaa Lawa ma kã ka foo-busii gole ne. Á ma da màn kɔɔsɛ mii ganaa.

¹⁶ Á gɛ̀pɛn kaa maa màn-bii li. Á ma tuturu tán bonbolon ne.

¹⁷ Á yii-nyɛɛ si ma la. Ma yiri bɔ ka là nyantoro ne.

¹⁸ Bɛ lɛ nɛ má tɔn pɛ: Masɛ wɔ nya. Ma foo á doa-n Dɛnaa Lawa ganaa doo wa.

¹⁹ N taasɛ maa fuu kɛ laanka maa nɔmaa kɛ nɛ, maa foo ziziɛ̃ laanka màn kɔɔsɛ kɛ nɛ.

²⁰ Ma nə n taasɛ a ganaa biikoo tumaa li. Á ma gù dɛ.

²¹ Sɛnɛ, taasiɛ mɛn bɛ́ die ma yiri ni, á ke, bɛ lɛ n toɛ ma foo á doa nɛ:

²² Dɛnaa Lawa a bǐɛ̃ a nyɛɛ wa. A minin narɛɛ dɔ ba n lɛ doɛ wa.

²³ Maǹ màn dii lɛa baraabaraa baayɛlɛ. A bɔlɔgoondɛnaabaa miã banban.

²⁴ Bɛ lɛ nɛ ma á pii: «Dɛnaa Lawa n maa naforo lɛa» bɛ lɛn toɛ ma foo á doa nɛ a ganaa.

²⁵ Min mɛn foo bɛ́ doa-n Dɛnaa Lawa ganaa, a n giɛ li ka a parsiini, a n bǐɛ̃ biɛ bɛ la.

²⁶ N yii da Dɛnaa Lawa a bɔ sii-n la, kiĩn ni, sii sonbore ne.

²⁷ N sii si n ganaa n tenmaa waáraa, sii sonbore ne.

²⁸ Bɛ̀ Dɛnaa Lawa sii da min mìi ni, á kɔnbɔ n dɛnaa giã tán wɔlɔ para-a a dinsɔɔ̃, kiĩn ni.

²⁹ A kaa tán a lɛ la gusuũ li! Kɔntan, foo doa ma-a tɔn yii!

³⁰ A n para dia a dɛli la, a toa ǹ sɔ kaa la!

³¹ Sonbore, Dɛnaa Lawa a min daa a goɛ̃ duduu lɛa wa.

³² Ta a na á fuu da n mìi ni, a n wusii doo a n narɛ, a giala a bǐɛ̃baa á gole.

³³ Haayii! A bie Dɛnaa Lawa duũ lɛa a sìi da minbuiin nɛ ganaa, a fuu yɛ wa.

³⁴ Bɛ̀ n tɔtɔrɔ gána goon a kòso nɛn tumaa la, Dɛnaa Lawa yii ba a ganaa wa?

³⁵ Bɛ̀ n mɛnaa n miã minbuiin nɛ la, lon a Lawa yii giulun,

³⁶ bɛ̀ n tá kiri diɛ min la kiri kuru ǹ bǎã nɛ biikoo mɛn li, Dɛnaa Lawa yii ba a ganaa wa?

³⁷ Die n boe la a boo da, a toa bɛa boo lɛ kaa lɛ? Dɛnaa Lawa din bie wa?

³⁸ Lon a Lawa a boo bie die ka sii tumaa-n wa? Koe ne ka là nyantoro ne.

³⁹ Min bɛ́ á sii baraa zɛnaa Lawa nə́ ǹ dɛnaa yii toa koo, a n siɛ lɔn doo á gungunun sii kəni?

⁴⁰ Ka daa wɔ ga wɔa giã ǹ gɔn ganaa taãn nɛ, wɔ n bɔyaa wɔ da Dɛnaa Lawa li.

⁴¹ Ka daa wɔ lon a Lawa nyankɔ ka wɔ foo tumaa nɛ, wɔ n gɔnɔn goa wɔ dia la.

⁴² Wɔ n wɔ́ sii baraa zɛnaa, wɔ n piã n nɛ. Nsɛ, n wɔa sãn toa wɔ-n wa.

⁴³ N foo-yoo taman yii n wɔ kio loo, n wɔ dɛ, n makara bɔ wɔ ganaa wa.

⁴⁴ N nə́ n dɔ labara gɔ́ɔ̃ nɛ màn mɛn bɛ́ toɛ wɔa nyankɔ nyan dɔ n li wa.

⁴⁵ N wɔ baa yisi lɛa, màn tìĩ bɔ wolen lɛa tɔrɔ kɔsɔn bii.

⁴⁶ Wɔa zɔ́ɔn tumaa n yaa we wɔ ganaa.

⁴⁷ Nyɛ́ɛ laanka gɔ̀nɔn bìn diɛ nɛ, bɛn man wɔ yii, kɔnlɛ ka basaã nɛ ka koe ne.

⁴⁸ Ma yii mu n suù, baa sii ka mu bɛ́ lɔn, koe kɛa lɛa, maa zaman mìi ni.

⁴⁹ Ma yii mu n gisĩ miɛ̃ a ba n lɛ kuĩ wa. Susui ba ma la wa,

⁵⁰ yǎa Dɛnaa Lawa nə n toɛ lon, a n yii kanɛɛ, a ma yɛ.

⁵¹ Ǹ bɛ́ sii mɛn zɛnɛɛ maa kiwi kɛa nɛlɔn manɛ, bɛ n busi ma-a parsiini.

⁵² Min mɛnɛn nə ma baa zɔ́ɔ mìi ná a ba la wa, ǹ nə́ bɔ ǹ nə́ kaa ma kio, ka bàan wɔ bɛ́ lɔn.

⁵³ Ǹ nə́ ma da yala-n ma yii n koo, ǹ ná a lɛ tã ka kɔlɔ nɛ.

⁵⁴ Mu dii á ma muĩ. Má pɛ ma gɔ́ɔ̃ nɛ maa masɛ wɔ nya.

⁵⁵ Má n toa yala lɛ gɔ́ɔ̃ nɛ ma lɛ dia n din Dɛnaa Lawa la.

⁵⁶ N maa lɛ dɛ ma, n nyan nə n too tã maa lɛ-dɛ laanka maa ginii kɛ la wa.

⁵⁷ Ma bɛ́ ma lɛ dia n la, n nə́ n zɔ̃ n dɔ, n pɛ ma nɛ: «Nyɛ́ɛ nyan nə n kũ wa.»

⁵⁸ Dɛnaa Lawa, ń ma kirisibaa, ń ma nyin si.

⁵⁹ Ǹ mɛnaa ma la lɔn, Dɛnaa Lawa, ń yɛ. Maa kiri kuru ka peperebaa nɛ.

⁶⁰ Ǹ gɛ̀ dòo bɔ ma ganaa ka yɔrɔ mɛn nɛ, ǹ siin mɛnɛn wɔ kɔn ma ganaa, ń nə́ ǹ yɛ.

⁶¹ Dɛnaa Lawa, ń nə́ ǹ sɔ kɔ kɛ ma ka ǹ bɛ́ siin mɛnɛn we kɔn ma ganaa.

⁶² Maa zɔ́ɔn lɛn man taasiɛ baraan we, ǹ tá boo diɛ masɛ ganaa baraabaraa.

⁶³ Ga ǹ ganaa, ta maǹ giã-n tán, hinlaa ta manə ǹ gòãn la, maǹ loe loe ma ganaa.

⁶⁴ Ǹ sii mɛn zɛnaa ma nɛ, a saraa ǹ la Dɛnaa Lawa.

⁶⁵ Ǹ foo kaka kɔ, n liɛ baraa da ǹ mìi ni.

⁶⁶ Ǹ kio loo ka foo-yoo gole ne, n nə ǹ loo n nə ǹ bɔ tán la.