Busii pɛ 2 - LAWA A BOO SONBORE

Dɛnaa Lawa na á n baa ka zɔ́ɔ bɛ́ lɔn Zeruzalɛmu ganaa

¹ Ebe! Dɛnaa Lawa a foo-busii kɛ taman yii, á *Siɔn da wɔlɔ tì li. A foo bɛ́ á yoo Siɔn li, á n toa lon sɔsɔɔ, á Izirayeli a gugurubaa kɛ zũ tán. A foo-yoo taman yii, a yiri bɔ a kion kɛ din ni, a doamaa bɛ nɛ a giã ǹ mɛn lɛ nɛ.

² Dɛnaa Lawa ná a din a zaman a kionən tumaa yu. Makara doɛ̃ din yɛ a-n wa. Zudaa a kiwin mɛnɛn bɛ́ tamaa-n sɔnbɔraanɛ, á bɛn yu a foo-yoo baraa kɛ gɔ́ɔ̃ nɛ. Á gána lɛ laanka a kiin tumaa nɔɔ, á ǹ kaa, á sìi da ǹ ganaa.

³ A foo-yoo baraa lɛ gɔ́ɔ̃ nɛ, á Izirayeli pàã tumaa ziziɛ̃. Á n piã ka a dɔmalɛ nɛ bɛ̀ a zɔ́ɔ lɛ bɛ́ á daa á dɔ. Sɛnɛ, á tɛ da, á kũ, a ná a zaman lɛnpɛnɛ.

⁴ A ná a sa dii ka zɔ́ɔ bɛ́ lɔn, a gusin nə kiɛ la, zoɛ̃ mà a n gɔn bɔ a ganaa. Minin mɛnɛn tumaa bɛ́ kɔɔ̃n wɔ ganaa, á bɛn tumaa dɛ. A ná a foo-yoo kɛ zuzuu ka tɛ bɛ́ lɔn Lawa a kion kɛ la.

⁵ Dɛnaa Lawa na á n baa ka zɔ́ɔ bɛ́ lɔn. Á Izirayeli yu, a ná a kion sonboren tumaa yu. Kungɔnɔn mɛnɛn bɛ́ tamɛɛ, á bɛn dɔn tumaa wuru. Á Zudaa gána tumaa pã ginii ni, ka foo ziziɛ̃ nɛ.

⁶ A ná a zìã lɛ yiɛ ka dù gɔrɔ bɛ́ lɔn. Dakɔnlɛ ǹ bǎã ke a din wɔ lɛa, á bɛ yu. Dɛnaa Lawa toa Siɔn kiwi yiri bɔ zɔ́n pinaa nɛ, ka *susu ǹ pii ni. A foo yoo baraa lɛ gɔ́ɔ̃ nɛ, á kiin laanka Lawa a wúlu-bɔlen yii puusə kɔ.

⁷ Dɛnaa Lawa nə n piã ka a *wúlu bɔ ǹ bǎã nɛ. Á n la bɔ a bǎã sonbore kɛ ganaa. Á ǹ kion sonboren wɔ ǹ zɔ́ɔn gɔn, Ǹ zɔ́ɔn lɛn manə n lɛ dii Lawa a kion, ka zɔ́n pinaa bɛ́ lɔn.

⁸ Dɛnaa Lawa golee li, mà a n die Siɔn a kungɔn wurii. Á biɛ nàn nyoã, a n die zɛnɛ kɔnlɛ. Á yuyu miɛ̃, yǎa a tumaa wuru. Kiwi lɛnpɛnɛ ǹ kungɔn bibinaa laanka a paabaa ǹ wɔ lɛ yu. Bɛ foo-ziziɛ̃ baa.

⁹ Kiwi lɛa kiɛnlɛn nə́ kaa, ǹ nə́ wɔ tán tii li. Dɛnaa Lawa nə́ ǹ kii la ǹ bàlà yiyiɛ. A kii laanka a nyɛɛnaandɛnan man gùlin lɛa tɔrɔ kɔsɔn bii. Dí-pɛ banban doo wa, a boo gii-dalin ba Dɛnaa Lawa a sii-nyaa yii doo wa.

¹⁰ Siɔn a min golen nə́ giã tán furu-n, ǹ ba boo kɔn diɛ wa. Maǹ tii folo kiɛ ǹ dinin mìi ni, ǹ nə́ gɛ̀ koa ǹ mɔnaan wɔ. Zeruzalɛmu a nɛlɔn nə́ n mìi kuməə tán.

¹¹ Ma yii nànan nə́ tãtaã wuu gɔn. Ma yiri nə́ n lɔlɔkɔn. Koe mɛn maa zaman yɛ, ma a boe la ma á sii ma ganaa doɛ̃ wa. A giala, mu boro n nɛnyaan bɔnboɛɛnɛn gialaa kiwi lɛ a bǎã dadaraan nɛ.

¹² Maǹ nɔ̀n diɛ ǹ daanan la màn-bii laanka mu ni. Maǹ boe mɛnɛɛ ka bɔlɔkan bɛ́ lɔn. Kiwi lɛ a bǎã dadaraan nɛ, maǹ gɛ̀ kaã boe ǹ daanan gòãn la.

¹³ Man die pii n ni máa lɔn Zeruzalɛmu? Man die n zoɛ̃ kɔn ka die ne? Siɔn kiwi doobaanɛ, man die sii a kɔnboe yii maa ma nyaa n nɛ n foo tɔn waa? N koe lɛ a golebaa n ka yìsi mu bɛ́ lɔn. Die n boe la a n kaka kɔ?

¹⁴ Lawa a boo gii-dalin nə sii-nyaa mɛn tumaa yɛ n wɔ lɛa, sii-nyaa kooron manɛ. Maǹ nə n sã pɛ n nɛ wa, màn mɛn bɛ́ toɛ n kanbaa bɛ̀rɛbaa ganaa. Ǹ sii-nyaan mɛnɛn yɛ n wɔ lɛa, soɛ laanka yiri sã ǹ boon manɛ!

¹⁵ Zeruzalɛmu, min mɛn tumaa bɛ́ kiɛ̃ kunu n li, manə n gɔn dii a giala mà ń ziziɛ̃. Maǹ lɛ pii pii ǹ nə́ yaa we n ganaa, ǹ nə́ n mìi papasɛ bɛ̀ ǹ tá pii: Kiwi kɛ lɛ nɛ ǹ nə́ goã bíi "Siĩnbaa lɛpiɛ̃" ka "tán tumaa a foo kɔɔ̃nɛ"?

¹⁶ Á ke, n zɔ́ɔn tumaa n boo diɛ n ganaa. Maǹ nə n yiin wɛɛ n li, ǹ nə́ yaa we n ganaa bɛ̀ ǹ tá pii: «Wɔ gɔn dɔ a ganaa. Wɔ bɛ́ n yii diɛ lɛawaa mɛn la, á ke. A din nə ka kɛ nɛ wɔ yii ná a ganaa.»

¹⁷ Dɛnaa Lawa golee sii mɛn li, a na á bɛ zɛnaa. A boo mɛn da a biikoo ná a kànaa wa, a na á toa bɛ yɔrɔ yɛ. Á basaã kɔ, a makara bɔ wa. Á n zɔ́ɔn foo kɔɔ̃n kɔ, ka n bɔ̀n da ma-a kɛ nɛ. Á màn da ǹ pàã li.

¹⁸ Zeruzalɛmu a zaman nə n lɛ dii Dɛnaa Lawa ganaa. Nsɛ Siɔn, toa n yii mu gisĩ, ka tà mu bɛ́ lɔn, penleen laanka tèlò-n, n nyan nə n susu wa, n nyan nə n lɛ tã wa.

¹⁹ Yoo, n nə n lɛ dɛ tèlò-n, kɔn gɔn lɛsi ǹ biikoo tumaa li. Ń gɔ́ɔ̃ toɛ̃ Dɛnaa Lawa yɔrɔ-a, ka mu bɛ́ baa sii lɔn. Ń nɛnyaanan kɛn giɛ̃ bòo gɔn ziin bɔ kɔn-a ǹ bǎã nɛ, n gɔnɔn dia lon Lawa la bɛn lɛa.

²⁰ E! Dɛnaa Lawa, n yii bũ n ga minin kɛn ganaa n nə́ ǹ kũ ka yɔrɔ kɛ nɛ! Lɔn manə ǹ nɛnyaanan soɛ̃! Maǹ Lawa a wúlu-bɔlen laanka Lawa a boo gii-dalin dii Lawa a kion!

²¹ Nɛnyaanan laanka min zizin tá nyɔmaa-n tán zii mìi ni. Ǹ nə́ maa nɛ tenən laanka maa nɛlɔn dɛ ka gɔya sa nɛ. N foo yoo baraa kɛa pinaa, ma n nə́ ǹ dɛ, n nə́ ǹ nyin bɔ, ǹ makara ná a bɔ n ganaa wa.

²² Ka zɔ́n pinaa bɛ́ lɔn, ń ma miãkɛn babaraan kɛn bíi wɔ. N foo-yoo baraa kɛa pinaa Dɛnaa Lawa, min kɔn nə n bɔ-a n wa. Min kɔn yii goã koo wa. Ma goã má min mɛnɛn too má ǹ gɔ̀nɔn kũ, maa zɔ́ɔ lɛ bɛn tumaa bɔ̀n baa.