Busii pɛ 1 - LAWA A BOO SONBORE

Zeruzalɛmu n ka lɔ giɔɔrɔ bɛ́ lɔn ǹ nə́ n la bɔ-a

¹ Ebe! Ǹ nə́ n la bɔ a ganaa kəni, kiwi ke, piɛ̃ nɛ ka minbuiin ni lɛlɛ. A n ka lɔ giɔɔrɔ bɛ́ lɔn, asɛ mɛn goã a yii n guguru, tɔrɔn bii lɛlɛ. Asɛ mɛn goã gánan mìi la, sisia, á ke bɛ̀rɛbaa ǹ dí nyɛɛ.

² Á wuu pɛ á lɛ̀ waa nɛ, a yii mu gisĩ a pàãn ganaa. Min mɛnɛn tumaa goã narɛ, min banban a tá a foo wɛɛ wa. A giaáran tumaa tii. Maǹ a zɔ́ɔn lɛa kanna.

³ Zudaa tɔrɔn lɛn nə́ ke gele bɛ̀rɛbaa ǹ bǎã nɛ, koe laanka bɛ̀rɛbaa kaka gɔ́ɔ̃ nɛ. Maǹ giã-n tɔrɔn bii, susui ná a ba ǹ la wa. Min mɛnɛn bɛ́ ǹ kio lui, ǹ nə́ dɔ ǹ ganaa. Maǹ foo ziziɛ̃ gole gɔ́ɔ̃ nɛ.

⁴ Zeruzalɛmu a ziin tumaa n gɛ̀ koɛ. Min kɔn ba koe ǹ lɛ, a da zɔ́n zɛnaa doo wa. A bǎã dadaran tumaa kooromaa nɛ. A Lawa a wúlu-bɔlen man gini. A nɛlɔn foo ziziɛ̃maa nɛ. Kɛ kɔsɛ *Siɔn kiwi ganaa!

⁵ A zɔ́ɔn nə́ boo la. A bɔ ma yii-n wolen foo nyɛɛ. Dɛnaa Lawa fuu da a mìi ni a sii baraa damatan kɛn lɛa. Min mɛnɛn nə́ boo ǹ la, ǹ nə́ ǹ nɛnyaanan kaa ǹ nyɛɛnɛ, bɛ̀rɛn lɛa, ǹ nə́ woe ǹ ne.

⁶ Zeruzalɛmu kiwi a gugurubaa tumaa n soe n boe a nɛ. A nyɛɛnaandɛnan man ka don a luun mɛnɛn bɛ́ buu banban ǹ nə́ soɛ̃ wa. Pàã wɛɛ nə ǹ ganaa, ǹ nə́ baa sii ǹ kio-loolin lɛn nyɛɛnɛ.

⁷ Kanna, sìi bɛ́ Zeruzalɛmu ganaa, woo ǹ bǎã ná a ba la wa, a yiri gisĩ a lɛlɛ ǹ màn giɔ̀mɔ kakan kɛn tumaa nɛ. A zɔ́ɔn gɔn bɛ́ á dɔ a zaman ganaa ǹ mɛn waáraa, min kɔn yɛ á daa a gu ganaa wa. A zɔ́ɔn man giɛ a ganaa ǹ nə́ yaa we, a giala, mà á ziziɛ̃.

⁸ Á ke: Zeruzalɛmu sii baraa gole zɛnaa, á *gɔ̀ da a din ganaa. Min mɛnɛn nə goã a guguru koe, bɛn man pɔpɔsɛ. A giala, ǹ yii na a tontoro ganaa. Asɛ nə n bɔyɛɛ n dɔ̀ɔ̃ we, a n gini.

⁹ A gɔ̀ lɛ n yii a mɔnaa ganaa. Sii mɛn bɛ́ kio, a n yiri kɔ bɛ li wa. A mɛnaa n gɔn tɔwaa baa. Min banban a tá a foo wɛɛ wa. Á pɛ: «Dɛnaa Lawa, ga maa nɔmaa ganaa. Á ke, maa zɔ́ɔ na a din pàã laakalɛɛ.»

¹⁰ Á ke, zɔ́ɔn nə́ n gɔn dia, ǹ nə́ a naforo tumaa goa. Min kooron dinin nə́ wɔ a kion sonbore kɛ nɛ. A da yaa, Dɛnaa Lawa nə ǹ kurəə mà ǹ nyan wɔ kun ka a zaman kɛ-n wa.

¹¹ A zaman tumaa n gini. Maǹ giɛ màn-bii li. Maǹ nə ǹ gɔn màn sonboren koe màn-bii ganaa, ǹ yii boo la a goã koo. Zeruzalɛmu pɛ: «Dɛnaa Lawa, ga. Ǹ bɛ́ ma pɔpɔsɛ ka yɔrɔ mɛn nɛ, n bɛ yɛ.»

¹² Ka ga! Kasɛn mɛnɛn tumaa bɛ́ kiɛ̃ zii la, ka koe ke yɛ wa? Ka ga! Koe tan á dɔ masɛ wɔ kɛ li Dɛnaa Lawa da ma mìi ni a foo-yoo baraa kɛa pinaa?

¹³ Á n toa lon á tɛ dia, á ma kũ yǎa ma wen ganaa. Á kan kɔ ma gòãn li, á ma làfu kɔ tán. Á ma da ma gɔrɔn, man busu koe lɛawaa yii li.

¹⁴ A yii tá maa sii baraan tumaa ganaa a yɔrɔ-a. Á ǹ kaa kun á ǹ yii, á ǹ kaa ma mìi ni. Ǹ gugurubaa kaa ma la. Dɛnaa Lawa ma pàã kiɛɛrɛ kɔ, á ma wɔ minin gɔn, ma bɛ́ ma a boe la ma yɔ bɔ kɔn ka ǹ mɛnɛn nɛ wa.

¹⁵ Dɛnaa Lawa maa sɔraasi kakan tumaa dɛ. Á zia-baali kurun sɔkɔn masɛ á lɛa, ǹ nə́ daa maa sɔraasi tenən yɔyɔrɛ. Á ma tɔtɔrɔ yala-n, ka ǹ bɛ́ rezɛ̃ tɔtɔrɛ lɔn, ma din Zeruzalɛmu, Zudaa kiwi.

¹⁶ Bɛ lɛ n ke ma á wuu pii, ma yii mu gisĩ suù ni. A giala, min mɛn bɛ́ ma yii mu tuturi, a n nyin dii koe ma la, a wɔlɔ lui ma ganaa. Ǹ nə́ maa nɛnyaanan tumaa bɔ̀n baa. A giala, maa zɔ́ɔ lɛ pàã la ma nɛ.

¹⁷ Siɔn nə n gɔnɔn diɛ á n giɛ dɔmalɛ li. Min banban a tá a foo wɛɛ wa. Dɛnaa Lawa na á baa ǹ miãkɛnɛn zɔ́ɔ lɛa. Zeruzalɛmu gɔ̀ da a din-a ǹ bii.

¹⁸ Dɛnaa Lawa n pepere, a giala, ma din ni má n piã ka a gɔn waa ma-n nɛ. Tɔrɔn tumaa, ka bǐɛ̃ kɔ ka n too kɔ. Ka ga maa là-paparɛɛ ganaa. Ǹ nə́ maa nɛlɔn laanka maa nɛgiĩn goa ǹ nə́ woo ǹ ne bɛ̀rɛbaa ǹ bǎã nɛ.

¹⁹ Min mɛnɛn nə goã ma narɛ, má lɛ dia ǹ la, sɛnɛ, ǹ nə́ ma tii. Maa Lawa a wúlu-bɔlen laanka maa min golen nə́ gã kiwi lɛ gɔ́ɔ̃ nɛ, ǹ bɛ́ giɛ màn-bii li ǹ mɛn waáraa, mà ǹ yii boo la a goã koo.

²⁰ Dɛnaa Lawa, ga maa koe kɛ ganaa. Ma gɔ́ɔ̃ n kuĩ ka tɛ bɛ́ lɔn. Ma gɔ̀nɔn yii nə n si ma la. A giala, má n gòãn dii n ganaa taãn-taãnɛ. Zii gialaa, zia nɛ, maa kion, gɛ̀ dinsɔɔ̃ nɛ.

²¹ Maǹ ma lɛ miɛ gini, min banban a tá ma foo wɛɛ wa. Maa zɔ́ɔn tumaa maa koe kɛ boo ma. N sii mɛn da ma mìi ni, maǹ bɛa nyɛnyaa we. N lɛawaa mɛn bɔ n koa, toa bɛ́ dɔ. Toa ǹ dɔn nə n baa ka ma dɔ bɛ́ lɔn.

²² Ga ǹ sii baraan kɛn ganaa taãn nɛ. N masɛ yii wɔ̃ lɔn, maa piãn kɛn lɛa, ǹ dɔn yii wɔ̃ miɛ̃. Maa wɔ n ka ginii-n biikoo tumaa li! A n busu lɛa ma ganaa.