Boo-laakalaali 7 - LAWA A BOO SONBORE

Sii mɛn bɛ́ soɛ ǹ miã nɛ

¹ Tɔ sonbore á soɛ nyɔɔ gìĩ kɔɔ̃n sonbore ne. Min a gɛ̀ pinaa á soɛ a yɛ pinaa nɛ.

² Gɛ̀ gã kion mɛn nɛ, bɛa woo á soɛ, kion kɛ wɔ nɛ, zɔ́n ná a nɛ. A giala, gɛ̀ lɛ n min tumaa a gɔn nyɔmɔɔ ǹ bǎã lɛa. Yǎa yiikoonaan nə n yiri koɛ bɛ li taãnɛ.

³ Taásiɛ á soɛ yaa nɛ. Taásiɛ n yɔrɔ kɔsɛ, sɛnɛ, a n min doree.

⁴ Gɛ̀ gã kion mɛn nɛ, sii-dɔ̃lin taasiɛ n walan. Zɔ́n bɛ́ kion mɛn nɛ, baãnaan sɛn taasiɛ n walan.

⁵ Sii-dɔ̃li a min zɛ̀rɛ baa á soɛ, baãnaa a min laakalaa nɛ.

⁶ Nyan bɛ́ pupuri tɛ-n lɔn dɔn giulun, baãnaa dɔ n yaa we miɛ̃ paɛ̃paɛ̃. Sɛnɛ, bɛ dɔ giala banban.

⁷ Sonbore, bɔ min yii-n nə sii-dɔ̃li biɛ baãnaa lɛa. Màn-gɔ na a yiri sii la.

⁸ Sii a gɔn nyɔmiɛ̃ á soɛ a giala kɔ nɛ. Sii simaa á soɛ din gole kɔ nɛ.

⁹ N foo baran saa lɛlɛ, a yoo wa, a giala foo yoo na á n yu baãnaan la.

¹⁰ N baran pɛ mà wàa na á baa, lɛlɛ á soɛ pelo kɛ-n wa. A giala sii-dɔ̃li a nɔ̀n-diɛ ka biɛ bɛ-n wa.

¹¹ Sii-doɛ̃ lɛ n kɔɔ̃n ka kíɛ̃ bɛ́ lɔn, Min mɛnɛn yii bɛ́ koo, a là n bɛn ganaa.

¹² Sonbore, sii-doɛ̃ n min boe sii ni, ka wɔrɔ bɛ́ min boe sii-n lɔn. Sonbore, sii-doɛ̃ lɛ a là bɛ́ ka màn mɛn nɛ, bɛ̀ a tá min mɛn lon, a n toɛ ǹ dɛnaa la.

¹³ Ga Lawa a nya ǹ dí ganaa: a màn mɛn pusu, die n boe la a bɛ tele?

¹⁴ Nyɛnyɛɛ biikoo li, n nyɛnyɛɛ. Nɔmaa biikoo li, n taasɛ. Lawa bɛ́ á yii-nyɛɛ lɛ zɛnaa lɔn, a na á nɔmaa lɛ dɔ zɛnaa miɛ̃, màn mɛn bɛ́ toɛ, minbuiinin baran ǹ dinin biɛ̃ ǹ sii kɔn dɔ̃ wa.

Peperebaa laanka sii-doɛ̃

¹⁵ A ma toa kanaa kɛ nɛ, má n ma a siin giala miɛ wa, ma yii sii tumaa yɛ. Min pepere n boe la a papaã a peperebaa gɔ́ɔ̃ nɛ. A da yaa, min baraa yii n boe la a goã koo, a baraabaa gɔ́ɔ̃ nɛ.

¹⁶ N baran n din baa min pepere lɛa, a la yii-n wa. N baran n din baa sii-dɔ̃li lɛa, a la yii-n wa. Bɛ bie wa n tá re n din bɔ̀n biɛ.

¹⁷ N baran baraa kɔ, n soo a kio wa. N baran baãnaa dɔ baa wa. Bɛ bie wa n tá re giɛ̃, n gɛ̀ ná a dɔ wa.

¹⁸ Á siĩni n nə n gɔn paraa bɛ lɛ ganaa, n nə n gɔn paraa bɛa doree màn paa kɛ lɛ ganaa. A giala, min mɛn bɛ́ nyɛ́ɛ biɛ Lawa nɛ, a foɛ̃ bɛa sii paa kɛ lɛ kɔn baalɛ wa.

¹⁹ Sii-doɛ̃ n pàã koe sii-dɔ̃li la, a la goledɛnaa fù wɔ nɛ kiwi.

²⁰ Taãn nɛ, min pepere goon ba kanaa kɛ gɔ́ɔ̃ nɛ, sii bǐɛ̃ zɛnɛɛ, a ná a ba sii baraa dɔ zɛnɛɛ wa.

²¹ Ka bɛ dɔ nɛ, minin bɛ́ boon mɛnɛn tumaa diɛ, n baran n too kɔ bɛn li wa. Màn mɛn bɛ́ toɛ, n baran n dí-nyali lɛ ma, lɛn baraa bíi n li wa.

²² A giala n tá doɛ̃ n din gɔ́ɔ̃ nɛ, mà gunyin gigiã, mà nsɛ dɔ lɛn baraa bíi min kɔsɔn li.

²³ Má bɛa sii kɛ lɛ tumaa lɛn zɔɔ̃ ka sii-doɛ̃ nɛ. Man má goã pii, máa man die sii-dɔ̃li biɛ. Sɛnɛ sii-doɛ̃ wɔlɔ goã lui-n ma ganaa.

²⁴ Sii din a taãn bɛ́ ka màn mɛn nɛ, wɔa taasiɛ wɔlɔ á sɔsɔɔ bɛ ganaa, a n zuzulu a tɔ-a, die n boe la a bɛ giala ma?

²⁵ Má tɔ́n nə n din kɔ, daraa laanka ga sii giala li la. Sii-doɛ̃ bɛ́ màn mɛn lɛa, man má goã zoɛ̃ bɛ li, ka siin woo ǹ bǎã dɔ nɛ. Má yɛ, máa baraabaa hinlaa baãnaabaa n gàãnaabaa lɛa.

²⁶ Má yɛ dɔn, lɔ mɛn nə́ ke ka kan bɛ́ lɔn, bɛ á kɔɔsɛ á la gɛ̀ nɛ. Bɛa lɔ lɛ a kɔn-narɛɛ n ka zɔ̀ɔ bɛ́ lɔn, a gɔnɔn man ka zɔrɔkan bɛ́ lɔn. Min mɛn a sii bɛ́ kiɛ Lawa foo la, bɛ tá kanbiɛ a ganaa. Sɛnɛ, a gɔn nə doe sii baraa-zɛnaali ganaa.

^27-28 Má n yii wɔ siin lɛn gɔ́ɔ̃-n gogoon, má belebɔ nɛ, màn mɛn bɛ́ toɛ ma ǹ giala ma. Sɛnɛ, ma màn kɔn yɛ wa. Á ke, sii-dɔ̃li lɛ na á goã pii: min duu goon bii, man má giĩ goon yɛ. Sɛnɛ, ǹ tumaa bii, man na lɔ goon din ni wa.

²⁹ Ma sii goon mɛn giala ma, bɛ á ke: Lawa na á minbuiin nɛ zɛnaa pepere, sɛnɛ, ǹ dinin man nə́ sii tumaa lɛ laa.