Boo-laakalaali 2 - LAWA A BOO SONBORE

¹ Má pɛ ma din gɔ́ɔ̃-n máa: «Haya le! Man die n doe nyɛnyɛɛ bii, man yii doa yii-nyɛɛ dinsɔɔ̃ la.» Sɛnɛ á ke, bɛ dɔ n piɛ̃ loo lɛa.

² Má pɛ máa: gàãnaabaa ǹ dí n ka yaa nɛ, nyɛnyɛɛ dɔ n wàa zɛnɛɛ?

³ Má bɔ ma foo ne, máa man die n din koe duvɛ̃ la. A ma yii toa kɔɔ̃nɛ, má n sii doɛ̃, máa man die n gɔn parɛɛ gàãnaabaa ganaa, yǎa ma doɛ̃, sii mɛn bɛ́ siĩni, minbuiin nɛn nə zɛnaa ǹ yiikoonaabaa biikoo li, kanaa kɛ nɛ.

⁴ Má dí dadaran nya. Má kionən dɔ ma din wɔn lɛa, má *rezɛ̃ dan zumu ma din wɔn lɛa.

⁵ Má dù gɔrɔn laanka da wurun bɔ ma din wɔn lɛa, má da nɛ-kɔle tɔrɔ tumaa zumu ǹ ni.

⁶ Má dɛnɛn fɔ̃ ma din wɔn lɛa, ń giɛ bɛn mu tá n kiɛ da ten daã kɛ ganaa.

⁷ Má bɛ̀rɛgiĩn laanka bɛ̀rɛlɔn pii, ǹ yɛ ǹ nɛnyaanan dɔn nə́ maa bɛ̀rɛn baa. Min mɛnɛn tumaa goã Zeruzalɛmu kiwi lɛlɛ ma nyɛɛnɛ, má tɔɔ dadaran laanka tɔɔ bisinin yɛ mɔnaa nɛ, á la bɛn tumaa wɔn manɛ.

⁸ Má wɔrɔ laanka sana sɔkɔn mɔnaa nɛ ma din wɔ lɛa, boe kiin gɔn mànan nɛ, ka gánan gɔn mànan nɛ. Má giĩ kɔlɔn laanka lɔ kɔlɔn koa ma din wɔn lɛa. Màn mɛn dɔ bɛ́ kɔɔ̃n giĩn ganaa taãn-taãnɛ, má bɛ dɔ yɛ: lɔ siĩn damata.

⁹ Má daa má màn gole baa. Min mɛnɛn tumaa goã Zeruzalɛmu lɛlɛ ma nyɛɛnɛ, má pàãma baa má la bɛn tumaa nɛ. Sɛnɛ, a laanka bɛ yii ni, maa sii-doɛ̃ lɛ na á goã n doe ma lɛ.

¹⁰ Màn mɛn tumaa goã ma yii kiɛ̃, man piã ka bɛ kɔn nɛ wa. Man mìi bɔ nyɛnyɛɛ kɔn li wa. A giala, maa dí tumaa na á goã nyɛnyɛɛ diɛ ma ganaa. Bɛ lɛ n maa wɔ gii lɛa, má yɛ maa dí lɛ tumaa gɔ́ɔ̃ nɛ.

¹¹ Bɛ kio, ma goã má dín mɛnɛn tumaa nya, ma goã má fuu mɛn yɛ ka ǹ nya nɛ, má daa n yii wɔ bɛ nɛ má ga a ganaa. Sɛnɛ á ke! Bɛ kɔn giala banban, a n piɛ̃ loo lɛa. Là goon ba ǹ nɛ, kanaa kɛ-n wa.

¹² Bɛ kio, má n yii wɔ sii-doɛ̃ gɔ́ɔ̃ nɛ, ka baãnaabaa laanka gàãnaabaa nɛ, má ga ǹ ganaa. Dinin kanaa, min mɛn bɛ́ re kii a bǎã siɛ, bɛ n die wàa sii zɛnɛɛ? Sii mɛn bɛ́ á n zɛnaa lɛlɛ, bɛ lɛ nɛ.

¹³ Ma yii màn mɛn yɛ, bɛ á ke: sii-doɛ̃ tá soɛ gàãnaabaa nɛ, ka wɔlɔ fúlu bɛ́ soɛ wɔlɔ tì-n lɔn.

¹⁴ Sii-dɔ̃li tá giɛ tán, gàãnaa n tɔ we wɔlɔ tì li. Sɛnɛ masɛ á doɛ̃, máa a din sii goon lɛ n die ǹ dinin paanan yii.

¹⁵ Masɛ tɔ́n pɛ ma din gɔ́ɔ̃-n máa: sii mɛn bɛ́ re gàãnaa yii, bɛ lɛ n die ma dɔ yii, máa wàa na á baa má sii-dɔ̃li din baa kɛnɛn? Má pɛ ma din gɔ́ɔ̃-n, máa bɛ dɔ giala banban.

¹⁶ Sonbore, yiri bie re gisĩ ka sii-dɔ̃li ni miɛ̃ duduu wa, yiri bie re gisĩ ni a la gàãnaa-n wa. Sii mɛn bɛ́ n zɛnɛɛ, yiri n die boe ka bɛ tumaa-n gɔrɔ, lɛawaan kɛn gɔ́ɔ̃-n die. Gàãnaa bɛ́ giɛ̃ lɔn, sii-dɔ̃li dɔ n giɛ̃ miɛ̃, bɛ giala?

¹⁷ Bɛ lɛ n ke, yiikoonaabaa tìĩ bɔ ma nɛ. A giala sii mɛn bɛ́ n zɛnɛɛ kanaa kɛ nɛ, má yɛ a ba siĩn wa. Ǹ kɔn giala banban, piɛ̃ loo ne.

¹⁸ Ma dí kaka mɛn tumaa nya kanaa kɛ nɛ, bɛ tìĩ bɔ ma nɛ, a giala min kɔsɔ mɛn bɛ́ re ma bǎã siɛ, ma doamaa nɛ ma toa bɛ gɔn.

¹⁹ Bɛa dɛnaa kɛ lɛ n die goɛ̃ baãnaa lɛa hinlaa sii-dɔ̃li lɛa, die n doɛ̃? Ma dí kaka mɛn tumaa nya, ma dí kaka mɛn tumaa nya kanaa kɛ nɛ, ka maa sii-doɛ̃ nɛ, ǹ dɛnaa n die goɛ̃ bɛ mìi la. Bɛ dɔ giala banban.

²⁰ Ma dí kaka mɛn tumaa nya kanaa kɛ nɛ, má daa kəni, ma foo ziziɛ̃ ka bɛa sii ni.

²¹ A giala min nə ke, á ná a dí nya, ka sii-doɛ̃ nɛ, ka doɛ̃ nɛ, á bǐɛ̃ kɔ: a màn mɛn yɛ, bɛ yoo a dɔ min kɔsɔ-a. A da yaa bɛa dɛnaa kɛ lɛ gɔn goã dí lɛ-n wa. Bɛ dɔ giala banban, a n foo busi a tɔ-a.

²² Sonbore, minbuiin nɛ bɛ́ dí kaka mɛn tumaa nyɛɛ, màn mɛn tumaa bɛ́ a yii li ǹ sii lɛa, á n nɔmiɛ̃-n kanaa kɛ nɛ, a n wàa boe a nɛ?

²³ A giala, a lɛawaan tumaa gɔ́ɔ̃ nɛ, nɔmaa dinsɔɔ̃ nɛ. Taásiɛ na a dí lɛa. A laan tèlò-n, susui ba la wa. Bɛ dɔ giala banban.

Yii-nyɛɛ din tumaa a sii n Lawa gɔn

²⁴ Màn kɔn din ba soɛ minbuiin nɛ ganaa wa. Bɛ̀ á n bɔ, a màn bii, a màn mi, a bɛ́ màn mɛn boe a dí ni, a n nyɛnyɛɛ bɛ la. Má yɛ, máa bɛ dɔ n Lawa a nya ǹ dí lɛa.

²⁵ Sonbore, die n boe la a màn bii, die n boe la a n nyɛnyɛɛ a la masɛ nɛ?

²⁶ A giala, min mɛn bɛ́ kɔɔ̃n Lawa ganaa, a n sii-doɛ̃ laanka doɛ̃ koe bɛ la, ka nyɛnyɛɛ nɛ. Sɛnɛ min mɛn bɛ́ sii baraa zɛnɛɛ, Lawa n diɛ bɛ mìi ni, a ga màn li a sɔkɔn, màn mɛn bɛ́ toɛ min mɛn bɛ́ kɔɔ̃n Lawa ganaa, a kɔ bɛ la. Bɛ dɔ giala banban, a n piɛ̃ loo lɛa.