Boo-laakalaali 12 - LAWA A BOO SONBORE

Zizikɔ laanka gɛ̀ boo

¹ Sɛnɛ n tɔntɔraabaa biikoo li, n yiri kɔ ka n diɛ wole ne, bɛ̀ koe lɛawaan kɛn nə baa doe, ka lɛ̀n kɛn nɛ, ń die pii mà ǹ sii ba nsɛ-a wa.

² Bɛa biikoo li, n tá re goɛ̃ wɔlɔ tì li, ka wasa a fólon na á nimi, ka mui laanka leeren man nə́ kũ, ǹ nə́ tii, ka la n bara goɛ la a kaa kio.

³ Bɛa pinaa kɛ lɛ nɛ, kion-lɛduə̃lin kɛn gɔ̀nɔn tá re bìn diɛ. Giĩ kakan kɛn tá re n pusi. Màn-lɔlin kɛn tá re ǹ màn lɔ lɛ diɛ, a giala, ǹ ba tɛ doo wa. Yii-kɔ fenɛtrə-wolen kɛn tá re a lɛ diɛ.

⁴ Dàã a kiɛnlɛ-a ǹ goon kɛn tá re n tiɛ̃, màn lɔ ǹ gii kɛ wuu á re basɛ̃, n tá re yui bàanan lɛ-baa li, loe-saalin kɛn lɛn tá re basɛ̃.

⁵ Bɛa biikoo li, tenten a dii tá re nyɛ́ɛ diɛ, zii tɔ we tá re gɔ́ɔ̃ woɛ̃, bɛ á zɛnɛɛ kəni, bɛ̀ da kɛ́ buũ kɔ fu panpan, bisin kɛ ń guguru a din-a, sii kɔn din ná a là kakaɛ̃ diɛ doo wa. Sonbore, ǹ kɔn pinaa minbuiin nɛ gogoonmaa n die woe, piɛ duduu. Ziin la, wuu-pɛlen dɔn man nə n bibiĩ, ǹ nə́ n yii diɛ bɛa biikoo kɛ lɛ la.

⁶ Wɔrɔ biɛ lɛ n die fore, sana donkolon lɛ n die yui, dɔn lɛ n die yui mu yala lɛ-a, mu si ǹ gagana ziziɛ̃ lɛ n die boe a mɛnaa tù ni.

⁷ Bɛa biikoo kɛ lɛ li, minbuiin nɛ gɔ̀nɔn siĩ lɛ bɔ tán tii mɛn li, a nə n bɔyɛɛ a wo walan. Telenboeen nə n bɔyɛɛ a wo Lawa li, Lawa mɛn lɛ kɔ.

⁸ Sii-dɔ̃li lɛ na á pɛ mà: a giala din na a banban, sii woo sii, a giala din na a banban.

Boo mìi naa

⁹ Minin-daraali lɛ goã sii-dɔ̃li lɛa, bɛ dɔ dinsɔɔ̃ bie wa, á wusoo doo á minin dɔn daraa sii-doɛ̃ ganaa. Á suusu gigiã sɔsɔ̃, á ǹ gɔsɛ, á ǹ zɛnaa.

¹⁰ Á n doa, á ga boo kɔɔ̃nɔn li, màn mɛn dɔ nə n kiɛ̃, a n pepere, boo taãn lɛa.

¹¹ Sii-dɔ̃lin boon man ka tɔɔn loo ǹ kiɛn bɛ́ lɔn, man ka tɔɔn gama walan wolen gɔnɔn dere tán nɛ, tɔɔ-lɛduə̃li goon dinsɔɔ̃ na á ǹ wɔ.

¹² Bɛ lɛ nɛ, maa nɛgiĩ, toa n daraa bɔ ǹ nɛ. Sɛ́wɔn mɛnɛn bɛ́ boe la ǹ nə n kiɛ̃, gigiãbaa dan bie wa. Daraa gigiã tá gɔ̀nɔn siĩ nɔmiɛ̃.

¹³ Màn mɛn tumaa nə n pɛ, wɔ n too kɔ bɛ gɔn nyɔmiɛ̃ ganaa: nyɛ́ɛ baa Lawa nɛ, n na a gɔn waa ǹ boon tamaa. A giala minbuiin nɛ doamaa-n ka bɛ nɛ.

¹⁴ Sonbore, Lawa tá re nya ǹ dí tumaa a kiri we, ka sii mɛn tumaa bɛ́ durii ni, ta bǐɛ̃ nɛ, hinlaa baraa nɛ.