Boo-laakalaali 10 - LAWA A BOO SONBORE

Baãnaabaa bɛ́ boe la a da siin mɛnɛn nɛ

¹ Nyuun geren man nyɔɔ gìĩ kɔɔ̃n zɛnaali a nyɔɔ gìĩ ziziɛ̃. Bɛa yɔrɔ lɛ la, baãnaabaa boɛɛn dɔ n sii-doɛ̃ laanka min a gugurubaa ziziɛ̃.

² Sii-dɔ̃li yiri n tɔ we doɛ̃ sɔnbɔraanɛ, sɛnɛ, baãnaa sɛ n sii tumaa giala miɛ ka a làfu ni.

³ Ta baãnaa n tɔ we zii la, yiri wɛɛ̃ na a ganaa, a n toɛ minin nə dɔ̃ mà asɛ n baãnaa lɛa.

⁴ Bɛ̀ goledɛnaa foo yoo n li, giã ka n din ni. A giala, boo ma foo la tá min kanbiɛ sii baraa dadaran ganaa.

⁵ Nyɛɛnaan-bɔle tá boe la a sã. Bɛ lɛ nɛ, má ga sii gigiã ganaa kanaa kɛ nɛ, ǹ ba siĩn wa.

⁶ Ǹ tɛn nɛ, min mɛn nə́ ke baãnaa lɛa, bɛ n boe la a goã dí gole lɛ la, a da yaa, sii-dɔ̃lin man dí bɔnboɛɛnɛn nɛ.

⁷ Má bɛ̀rɛn yɛ dii sùi la, kiin sɛn nə́ tɔ we tán ka ǹ gòã nɛ, ka bɛ̀rɛn bɛ́ lɔn.

⁸ Bɛ̀ n tá yala foɛ̃, ń boe la ǹ mɛnaa a nɛ. Bɛ̀ n tá kungɔn wurii, miɛ̃ á boe la a n kũ.

⁹ Bɛ̀ n tá kɔlɔn bɔbɔyɛɛ, ń boe la n busu da n din-a. Bɛ̀ n tá gɔn yui, sii á boe la a n yɛ a gɔ́ɔ̃ nɛ.

¹⁰ Bɛ̀ fɔlɔ màn lɛ wɔ, bɛ̀ n na a lɛ dɛ wa, yǎa n nə n we boe taãn-taãnɛ n tɔn dí nyɛɛ nɛ. Sonbore, sii-doɛ̃ n sii bǐɛ̃ kɔ ǹ màn lɛa.

¹¹ Bɛ̀ miɛ̃ a basã ǹ da-gòã tá n gɔn, bɛ̀ n da-n wa, bɛ̀ ń toa á min kũ, n da gòã lɛ là banban.

Sii-doɛ̃ laanka baãnaabaa boo

¹² Sii-dɔ̃li lɛ gɔ́ɔ̃ ǹ boo á kiɛ foo la. Sɛnɛ, baãnaa lɛ na a din bɔ̀n biɛ.

¹³ Baãnaa a boo giala kɔ n baãnaabaa ǹ boo lɛa, a boo gɔn nyɔmiɛ̃ n gàãnaabaa ǹ boo taãn-taãn lɛa.

¹⁴ Baãnaa n boo mɔnɛɛ. Sii mɛn bɛ́ re n zɛnɛɛ, minbuiin nɛ ba bɛ doɛ̃ wa. Sii mɛn bɛ́ re n zɛnɛɛ a gɛ̀ kio, die n die bɛ pii ni?

¹⁵ Baãnaa a dí n nɔmiɛ̃, a giala a ba n yɔrɔ dia ǹ bǎã doɛ̃ wa.

Kii laanka pàã boo

¹⁶ N wɔ n ka bɔ̀n nɛ, nsɛ gána ke, n kii n nɛginin ten lɛa, n kii kiodɛnan nə́ siɛ baayɛlɛ ganaa gɔrɔ, ǹ nə́ màn bii.

¹⁷ Nsɛ wɔ na á bǐɛ̃ kɔ, nsɛ gána ke, n kii n min yii guguru-an nɛ lɛa, n kii kiodɛnan nə́ màn bii á n kɔnpii ka a biikoo ne, ń giɛ ǹ nə́ pàã yii, màn mi a lɛa ná a bie wa.

¹⁸ Yoobaa taman yii, kala n niɛ̃ a kaa. Gɔn-na taman yii, kion nə mu boe.

¹⁹ Maǹ màn bii zɛnɛɛ màn mɛn bɛ́ toɛ, ǹ nə n nyɛnyɛɛ. Duvɛ̃ nə foo kɔɔ̃n koe. Paa n sii tumaa bǐɛ̃ koe.

²⁰ N baran lɛn baraa bíi kii li wa, haalɛ n gɔ́ɔ̃-n dinin. N waa ǹ kion, n baran lɛn baraa bíi pàãma li wa, a giala piɛ̃ tá boe la a n boo lɛ saa a pɛsɛ̃, n boo mɛn da, bɛ nə n da wɔlɔ la.