Amɔɔsi 5 - LAWA A BOO SONBORE

Foo ziziɛ̃ loe Izirayeli wɔ paǹ li

¹ Amɔɔsi tɔn pɛ: Izirayeli minin lɛn, ka n too kɔ boo kɛ li, ka n too kɔ gɛ̀ loe kɛ li, ma á loe kaa wɔ paǹ li:

² Izirayeli minin lɛn nə́ kaa, ǹ ba re yui doo wa. Ǹ tá tán-a, min kɔn banban a tá ǹ goɛ ǹ kiɛ lon wa.

³ Dɛnaa Lawa na á kɛ pɛ Izirayeli tɔrɔn wɔ paǹ li: Bɛ̀ giĩ duu goon (1 000) soo kiwi ǹ nə́ woo zia la, min paabiɛ (100) nə n bɔyɛɛ. Bɛ̀ giĩ paabiɛ soo kiwi ǹ nə́ woo zia la, min fù nə n bɔyɛɛ.

Yiikoonaabaa hinlaa gɛ̀

⁴ Dɛnaa Lawa n kɛ pii Izirayeli minin manɛ: Bɛ̀ ka tá li ka yii goã koo, yǎa ka giɛ masɛ Lawa li.

⁵ Sɛnɛ, ka nyan ga ma li Betɛli wa, ka nyan wo ma guguru kɔ Gilgaali wa, ka nyan nə n gòã da Bɛɛr-Sebaa dɔn wa. A giala, ǹ tá re Gilgaali minin tumaa goɛ ǹ wo ǹ ne bǎã kɔsɔ nɛ. Lawa a kion ke, a tɔ n Betɛli, bɛ á re kion kooro biɛ.

⁶ Bɛ̀ ka tá li ka yii goã koo sɛn, yǎa ka giɛ Dɛnaa Lawa li. Zozɛfu tɔrɔn lɛn, ka yiri bɔ ka dinin li, a nyan yoo ka tɛ bɛ́ lɔn, a kũ Betɛli wa. A giala, min kɔn ba re yii a nimi wa.

⁷ Á ke, ká taãn-pɛ bɔyaa ká baa kɔɔsɛ, peperebaa ke, ká bɛ naa tán.

Lawa n kanaa mìi la

⁸ A din na á leeren kɛn zɛnaa, bɛ̀rɛ-sãlin laanka sɔ̀ nɛ. A din nə tèlò bɔyɛɛ a baa baayɛlɛ lɛa, a baayɛlɛ bɔyaa a baa tèlò lɛa. A n yìsi mu bíi bɛ̀ a sɔkɔn, a tɔn bɛ kaa tán la. A tɔ mà Dɛnaa Lawa.

⁹ Min mɛn bɛ́ pàã nyɛɛ ǹ miãn manɛ, a din nə minin kiɛ bɛ ganaa ǹ basaã kɔ nɛ. Kiwi mɛn bɛ́ ǹ nə́ kungɔn dɔ ǹ ná a lɛnpɛnɛ nɛ, basaã n we bɛa kiwi lɛ nɛ.

¹⁰ Min mɛn bɛa lɛ koe mɛnaa mala-a wa, bɛa dɛnaa tìĩ n boe ne ka nyin ni. Bɛ̀ min mɛn tá taãn pii, bɛa dɛnaa tìĩ n boe kasɛn nyin ni.

¹¹ Á ke, ka n mɛnɛɛ doobaan la, bɛ̀ ǹ nə́ dí nya don ǹ nə́ màn mɛn yɛ, ka n bɛ kuĩ sii ǹ la ka pàã nɛ. Bɛ lɛ na á toa, ka kionən mɛnɛn dɔ ka kɔlɔ sonboren ne, ka á re giɛ̃ ǹ nɛ wa. Ka *rezɛ̃ da tɔrɔ sonboren mɛnɛn zumu, ka a re ǹ duvɛ̃ mii wa.

¹² Ma á doɛ̃, kaa piã ǹ siin nə́ la yii ni, kaa sii baraan tá mɔnaa nɛ. Ka n mɛnɛɛ min peperen la. Ka n lɛ pii ǹ mànan sii, ka n nɔmaa-wɔlen sonbore bɔyɛɛ, kiri wɔ ǹ bǎã nɛ.

¹³ Bɛ lɛ n ke, min mɛn bɛ́ sii doɛ̃, á soɛ, ǹ dɛnaa nə n lɛ tã. A giala, biikoo lɛ baraa kɔ!

¹⁴ Ka sii bǐɛ̃ zɛnaa, ka a baraa kaa, màn mɛn bɛ́ toɛ ka yii tɔn goã koo. Bɛ̀ ká zɛnaa miɛ̃, pàã tumaa a Dɛnaa Lawa á re goɛ̃ kun ka nɛ, ká ka bɛ́ nɛn bɛ̀ ka pɛ lɔn.

¹⁵ Ka n piã ka sii baraa nɛ, ka lɛ kɔ sii bǐɛ̃ ganaa. Ka toa sonbore yɛ kiri wɔ ǹ bǎã nɛ. Bɛ̀ ká zɛnaa miɛ̃, kɔntan pàã tumaa a Dɛnaa Lawa á re makara boe Zozɛfu tɔrɔ gialakunun kɛn ganaa.

¹⁶ Bɛ lɛ nɛ, Dɛnaa Lawa Pàãyiidɛnaa lɛ n kɛ pii: Zaman paã ǹ bǎã tumaa nɛ, minin tá re gɛ̀ loe loe. Kiɛ̃ ǹ ziin tumaa la, minin tá re n lɛ didi: Má sàabaa wooo, má sàabaa! Ǹ tá re woe lɛ diɛ min la wuru-n, mà a da gɛ̀ wuu pɛ. Ǹ tá re woe gɛ̀ wuu-pɛlen bíi, mà ǹ da loe lɔ gere la.

¹⁷ Bɛ̀ má daa n dɔ ka bii ǹ mɛn pinaa, minin tá re gɛ̀ wuu pii, rezɛ̃ wurun tumaa nɛ, Dɛnaa Lawa na á pɛ miɛ̃.

Lawa a lɛawaa

¹⁸ Kasɛn mɛnɛn la bɛ́ kakaɛ̃ Dɛnaa Lawa a lɛawaa kɛa dɔ pinaa li, kaa wɔ n ka bɔ̀n nɛ! Dɛnaa Lawa a lɛawaa lɛ n die wàa koe ka la? Wɔlɔ tì biribiri ni, wɔlɔ fúlu boo bie wa.

¹⁹ A n die giĩ kɔn wɔ biɛ baa sii yàra nyɛɛnɛ, yǎa a wo n da gòon màn gole kɔsɔ lɛ. A n die giĩ kɔn wɔ biɛ, á woo n dɔ a kion, mà a nə n gɔn doɛ kigiala ganaa, yǎa miɛ̃ sɔn dɔ a ganaa.

²⁰ Dɛnaa Lawa a lɛawaa kɛ lɛ, ka á re n boe a nɛ? A n die tèlò biɛ tì biribiri, wɔlɔ fúlu boo bie wa.

Lawa nə n piã ka sii mɛn nɛ

²¹ Kaa zɔ́nɔn kɛn lɛn bɛ̀ ká n zɛnaa, ma ba ǹ li wa, ǹ tìĩ bɔ ma nyin ni. Kaa lɛ-sɔkɔnɔn kɛn bɛ̀ ka ǹ wɔ, á ma gɔ̀nɔn bɔ.

²² Ka bɛ́ wúlu mànan mɛnɛn tiɛ̃ lenlen maa wɔ lɛa, ka bɛ́ ma goe ka mànan mɛnɛn nɛ, ǹ kɔn ba kɔɔ̃n ma ganaa wa. Ka bɛ́ tɔɔ kasiɛ̃n mɛnɛn koe ma la barka da ǹ *wúlu màn lɛa, ma din ba giɛ ǹ ganaa wa.

²³ Kaa loen lɛn tá sú kiɛ ma too ne, ka n zɔ̃ ka n bɔ ma yɔrɔ-a kaa tùtu wuun kɛn, ma ba li ma ǹ ma doo wa.

²⁴ Sɛnɛ ka toa kiri kiɛ̃ a zii li ka mu bɛ́ lɔn. Ka toa kaa sii pepere zɛnaa goã ka tà mu bɛ́ lɔn, a ná a nyɛɛ wa.

²⁵ Izirayeli tɔrɔn lɛn, ka bɛ́ ká goã diə gole lɛ nɛ, lɛ̀ pusi gɔ́ɔ nɛ, ká wúlu mànan kɔ masɛ la? Ká ma gɔ ka màn nɛ?

²⁶ Ka wo kaa kii ka kaa lawa Sukuti li, kɔnlɛ ka kaa leere Kiyunu kɛ nɛ kaa lawa lɛa, ka dinin nə lawan lɛn mɛnɛn zɛnaa.

²⁷ Bɛ lɛ nɛ, ma bɛ́ re woe ka nɛ bɛ̀rɛbaa ǹ bǎã mɛn nɛ, ka á re Damaasi kiwi kɛ niɛ̃. Dɛnaa Lawa n bɛ lɛ pii. A tɔ mà Lawa Pàãyiidɛnaa.