Amɔɔsi 3 - LAWA A BOO SONBORE

Izirayeli a zɛ̀rɛbaa

¹ Izirayeli minin lɛn, ka n too kɔ Dɛnaa Lawa kasɛn sɔmɔ lɛ a minin mɛnɛn waa, á ǹ bɔ Ezipti gána nɛ, a na á boo kɛ da ka dinin wɔ paǹ li, á pɛ kɛnɛn:

² Kanaa a tɔrɔn tumaa bii, man má ka dininsɔɔ̃nɔn lɛn bɔ. Bɛ lɛ nɛ, ka sii baraa mɛn tumaa zɛnaa, ma á re a dɔlɔ boe ka ganaa.

Lawa a boo gii-dali a nya ǹ dí

³ Bɛ̀ ń min paa yaa koɛ kun, maǹ nə́ kɔn wɔ ma.

⁴ Bɛ̀ ń yàra yaa wɔɔsaa we daã nɛ, màn na a lɛ-a. Bɛ̀ ń yàra ten yaa n toɛ a waa ǹ bǎã nɛ a ń lɛ biɛ, a na á màn kũ.

⁵ Bɛ̀ ń kan yaa á bàan kũ, bàan lɛ a mui ǹ màn nə la. Bɛ̀ ń kan yaa á puru, a na á màn kũ.

⁶ Bɛ̀ ń ziabaa ǹ bɛn wuu ma boe kiwi, nyɛ́ɛ á re a minin kuĩ. Bɔ̀n ba kiwi kɔn yii, bɛ̀ Dɛnaa Lawa na a lɛ kɔ wa.

⁷ A din goon ne: A dí-nyalin kɛn a boo gii diɛ, Dɛnaa Lawa a sii kɔn zɛnɛɛ, bɛ̀ a ná a n gɔ́ɔ̃ pii bɛn ma-n wa.

⁸ Bɛ̀ yàra wɔɔsaa wɔ, nyɛ́ɛ na a die kuĩ wa? Bɛ̀ Dɛnaa Lawa boo da, die nə n piɛ̃ mà asɛ a bɛ pii wa?

Dɔlɔ mɛn nə n bɔ Samarii minin ganaa

⁹ Kion sonboren kɛn Asidɔdi kiwi, kion sonboren kɛn Ezipti gána nɛ, ka dii bɛn kala la, ka kɛ pɛ ǹ ma: Ka n lɛ sɔkɔn Samarii kiwi a kelen kɛn la, ka ga sii lɔlɔkɔn zaã kɛ-a ǹ nə́ zɛnɛɛ kiwi kɛ nɛ, ka ga kakaarɛbaa ǹ sii damata kɛ-a ǹ nə́ zɛnɛɛ a nɛ!

¹⁰ Masɛ Dɛnaa-n kɛ pii: Samarii minin lɛn ba sii pepere zɛnaa ǹ gɔn doɛ̃ wa. Maǹ kakaarɛbaa ǹ sii zɛnɛɛ, ǹ nə́ mɛnɛɛ minin la, mànan sii kiɛ kɔn la ǹ kionən ne.

¹¹ Bɛ lɛ na á toa Dɛnaa Lawa á kɛ pii: Zɔ́ɔn tá re gána lɛ lɛnpɛnɛ, kungɔn ke n koe n lɛ, ǹ bɛ nyanaa ǹ kaa, ǹ nə́ ǹ duru ǹ bǎã kakan kɛn mànan gogoa.

¹² Dɛnaa Lawa na á pɛ: Bɛ̀ yàra tɔɔn-lɛduə̃li a tɔɔ kũ, ta a na á sɔ̃ á toa a gòã paa kɛ li hinlaa a too lɛkoro li, a n bɛ lɛ baɛ̃, a bɔ a lɛ-a. Izirayeli minin mɛnɛn bɛ́ giã-n Samarii kiwi, giã ǹ bǎã sonboren ne, ma dɔ n die bɛn lɛn gialakun boɛɛn sii, ǹ zɔ́ɔn la miɛ̃.

¹³ Pàã tumaa a Dɛnaa Lawa na á kɛ pɛ: Ka n too kɔ, ka kɛ pɛ Zakɔba tɔrɔn lɛn manɛ.

¹⁴ Bɛ̀ má yoo Izirayeli minin kɛn gialaa ǹ mɛn waáraa, ǹ sii baraan kɛn taman yii, má á re yui Betɛli a wúlu bɔ ǹ bǎãn kɛn dɔn gialaa. Ǹ tá re *wúlu bɔ ǹ bǎã lɛ a lon a gùrùn kɛn yiyiɛ, bɛn tá re boe ǹ kakaa tán.

¹⁵ Kion dadaran nɛ, ka kion bisinin ni, ma á re bɛn wurii ma ǹ kaa. Ǹ kionən mɛnɛn nyaǹ kɔ ka don a díi sɔn nɛ, bɛn tá re papaɛ̃, kion gigiã á re kiɛ. Dɛnaa Lawa a da ǹ boo ne.