Amɔɔsi 2 - LAWA A BOO SONBORE

Moabu minin

¹ Dɛnaa Lawa na á pɛ kɛnɛn: Moabu minin kɛn nə́ sii baraa gigiã zɛnaa. Ǹ sii mɛn zɛnaa, á kiɛ̃ a bǎã la. A giala, ǹ nə́ Edɔmu minin kii kɛ wen tã, ǹ nə́ baa ton lɛa. Bɛ lɛ n ke, ma á ǹ zɛ̀rɛ biɛ, ma a re wusii maa da ǹ boo kio wa.

² Man die tɛ diɛ Moabu kiwi kɛ ganaa, tɛ á re Keriyɔti kiwi a duru ǹ bǎã kakan kɛn kuĩ. Moabu minin kɛn tá re giɛ̃ lɛ-dɛ wuu li, zia nɛn lɛ-dɛ wuu li, bɛn wuu li.

³ Ma á re ǹ kii kɛ dii ma bɔ ǹ kiwi, ma á re a kiodɛnan kɛn tumaa dii kun ni. Dɛnaa Lawa na á pɛ miɛ̃.

Zudaa minin

⁴ Dɛnaa Lawa na á pɛ kɛnɛn: Zudaa minin kɛn nə́ sii baraa gigiã zɛnaa. Ǹ sii mɛn zɛnaa, á kiɛ̃ a bǎã la. A giala ǹ nə́ Dɛnaa Lawa a dí-pɛn kɛn tii, ǹ na a landa boon kɛn tamaa wa. A giala, ǹ nə́ n saa soɛ siin li, ǹ digolon nə kɔ soɛ siin mɛnɛn lɛ, bɛ lɛ na á toa ǹ nə́ papaã. Bɛ lɛ n ke, ma á ǹ zɛ̀rɛ biɛ, ma a re wusii maa da ǹ boo dɔ kio wa.

⁵ Ma á re tɛ diɛ Zudaa gána kɛ ganaa, tɛ á re Zeruzalɛmu a duru ǹ bǎã kakan kɛn kuĩ.

Izirayeli minin

⁶ Dɛnaa Lawa na á pɛ kɛnɛn: Izirayeli minin kɛn nə́ sii baraa gigiã zɛnaa. Ǹ sii mɛn zɛnaa, á kiɛ̃ a bǎã la. A giala, ǹ nə́ min pepere kũ ǹ nə́ sã wɔrɔ-a, ǹ nə́ doobaa lonkɔ ka kɔsɔ nɛ. Bɛ lɛ n ke, ma á ǹ zɛ̀rɛ biɛ, ma a re wusii maa da ǹ boo kio wa.

⁷ Ǹ bɛ́ giɛ sii mɛn li, bɛ n ka kɛ nɛ: maǹ sìi diɛ doobaa ganaa. Maǹ mɛnɛɛ nɔmaa-wɔle la. Nɛ laanka ǹ di n paɛ̃ nɛniɛ goon ganaa, maǹ bɛa sii lɛ zɛnɛɛ, ǹ nə́ ma tɔ sonbore kɛ ziziɛ̃ nɛ.

⁸ Ǹ mɔnaan mɛnɛn si doobaan la giɔ̀mɔ lɛ koa ǹ mànan lɛa, maǹ bɛn naɛ tán wúlu bɔ ǹ bǎãn nɛ, ǹ nə́ wɛɛ ǹ la. Ǹ duvɛ̃ mɛn si ka pàã nɛ, maǹ bɛ mii ǹ dì kionən kɛn nɛ.

⁹ A da yaa, masɛ din nə má Amɔɔrɔ tɔrɔn kɛn dɛ má ǹ bɔ ǹ nyɛɛnɛ. Bɛa minin kɛn lɛn man sɔsɔrɔ ka da sasa tɔrɔ nɛ, maǹ gegere ka da kaka tɔrɔ nɛ. Sɛnɛ, má ǹ nɛ sɔlɔ má bɔ ǹ la, má ǹ gòonən woɛ̃ má ǹ bɔ tán.

¹⁰ Ma din lɛ dɔ-n má ka waa má ka bɔ Ezipti gána nɛ, má ka nyɛɛnaan bɔ diə gole kɛ nɛ lɛ̀ pusi gɔ́ɔ̃ nɛ, yǎa ká Amɔɔrɔ tɔrɔn gána kɛ si ǹ la.

¹¹ Má kaa nɛnyaanan kɔnɔn dɔn dinin bɔ maa boo gii-dalin lɛa, má kaa tɔntɔraa tenən kɔnɔn bɔ, din-kɔlen lɛa, maa dí kɛa lɛa. A n zɛnaa miɛ̃ wa, Izirayeli minin lɛn? Masɛ Dɛnaa Lawa n nɔ̀n diɛ ka la!

¹² Min mɛnɛn nə n dinin kɔ maa dí taman yii ǹ nə́ duvɛ̃ mi tii, ka n ká duvɛ̃ kɔ bɛn lɛn la ǹ nə́ mi, ká maa boo gii-dalin kurəə, mà ǹ baran maa boo gii da wa!

¹³ Á ke masɛ n die ka yɔyɔrɛ, ka wotoro piɛ̃maa á ke á bɔ màn la lɔn.

¹⁴ Ma á boe baa la, bɛa re n boe a-n wa, pàã tá ma lon, bɛa là á re yii n na-a wa, maa boe zia la, bɛa re n nyin sii wa.

¹⁵ Sa zũ doɛ̃ wole a re n gòãn doɛ wa, boo baa la wole a re baa sii a la wa, sùi da-baali a re boe la a n din nyin si wa.

¹⁶ Bɛa pinaa kɛ lɛ nɛ, min mɛn foo bɛ́ tã boo zia la wolen lɛn bii, bɛ á re baa sii ka a tontoro ne. Dɛnaa Lawa a da ǹ boo ne.