Abakuku 1 - LAWA A BOO SONBORE

¹ Dɛnaa Lawa a boo á ke á da a boo gii-dali Abakuku ni sii-nyaa gɔ́ɔ̃ nɛ.

Lawa a boo gii-dali n Dɛnaa Lawa bii we

² Dɛnaa Lawa, man die goɛ̃ n bíi we yǎa biĩ kəni? N bɛ́ n ba n too koe wa! Ma nə n lɛ dii kakaarɛbaa taman yii, sɛnɛ n ba wɔ kirisibiɛ wa!

³ Wàa na á baa n tá toɛ ma yii á sii baraa yii? Wàa na á baa n yii á wɔa fuu ganaa, n nə́ n ba sii zɛnɛɛ dɔn wa? Bǎã tumaa nɛ, minin man kokoo we, ǹ nə́ kakaarɛbaa zɛnɛɛ. Kiri laanka zia n bǎã tumaa nɛ.

⁴ Dí-pɛn pàã nya. Min kɔn ba kiri pepere we wa. Min baraa n yui min pepere gialaa, Kiri-wɔlen man kiri kɔkɔrɔ we.

Lɛ si, Baabilonii minin daa wɔ paǹ li

⁵ Dɛnaa Lawa pɛ: Ka ga, sii mɛn bɛ́ n zɛnɛɛ tɔrɔ gialakunun kɛn bii, ka n yiri kɔ bɛ li taãn nɛ, a tɔwaa da ka ganaa, a kaãbaa da ka-a. Kaa yiikoonaabaa gɔ́ɔ̃ nɛ, man die kaãbaa sii zɛnɛɛ Bɛ̀ ǹ tá a laakalɛɛ ka yii ni, ka a re golee li wa!

⁶ Á ke, man die *Baabilonii minin kiɛ ka-a, ǹsɛn mɛnɛn bɛ́ kakaarɛ, ǹ nə́ ǹ ba makara doɛ̃ wa. Maǹ woe bǎã tumaa nɛ, ǹ wo gánan kũ, ǹ mɛnɛn bɛ́ ǹ ba ǹ wɔ lɛa wa.

⁷ Maǹ kakaarɛ, nyɛ́ɛ diɛ. Ǹ dininmaan manə ǹ dí-pɛn koɛ, ka ǹ zɛnaa ǹ siin ni.

⁸ Ǹ sùin baa la goen wɔ nɛ. Don ginin mɛnɛn bɛ́ woe dɔ doe wasamiɛ̃nɛ, ǹ kakaarɛbaa la bɛn wɔ nɛ. Ǹ sùidɛnan man boe sɔsɔɔ die, ǹ nə́ paparɛ. Maǹ yui ka giogiatã-a bɛ́ lɔn woe a siĩ siɛ.

⁹ Ǹ tumaa n die màn kokoo a lɛa. Maǹ giɛ ǹ nyɛɛnɛ sɔnsɔn. Maǹ kòso nɛn soekɔn, mɔnaa nɛ ka nyɔɔsɔ̃ bɛ́ lɔn.

¹⁰ KIIN ba màn kɔn lɛa ǹ yii li wa. Ǹ laadoo bie ka gána a nyɛɛnaandɛnan nɛ wa. Kiwi tamaa-wolen ba nyɛ́ɛ diɛ ǹ ganaa wa. Maǹ tii diɛ kɔn la kungɔnɔn kio, ǹ dii la, ǹ boo la ǹ kiwin kũ.

¹¹ Maǹ kiɛ̃ ka ǹ zii ni, ka piɛ̃ gole bɛ́ lɔn. Ǹ dinin yii li, ǹ pàã kɛ lɛ n lawa lɛa.

Lawa a boo gii-dali n Dɛnaa Lawa bii we doo

¹² A kũ a giala kɔ waáraa ganaa, n din nə Dɛnaa Lawa lɛa. Maa Lawa nɛ n nɛ, n tá sonbore. Wɔ a re giɛ̃ wa. Dɛnaa Lawa, n din ni n Baabilonii minin bɔ mà ǹ kiri kuru wɔ la. N din nə maa gɛ̀fu kaka lɛa, n nə ǹ dia mà ǹ da dɔlɔ bɔ wɔ ganaa.

¹³ N yii a sonborebaa á gole sii baraa a ga ma-a ganaa. N ba lɛ koe sii baraa ganaa wa. Sɛnɛ, min mɛnɛn bɛ́ ǹ miãn siɛ̃, ma nə n lɛ tiɛ̃ n tá giɛ bɛn ganaa. Bɛ̀ min baraan tá basaã koe min sonboren manɛ, n ba boo diɛ wa.

¹⁴ Á ke, ń minbuiin nɛ baa ka zɔ̀ bɛ́ lɔn, ka tɔɔ bisinin bɛ́ lɔn, dɛnaa ná a ba ǹ la wa.

¹⁵ Baabilonii minin man minin kuĩ ka koɛ̀ɛ̃n nɛ ka zɔ̀ bɛ́ lɔn. Maǹ die ǹ nɛ zɔ̀ɔ nɛ, ka kokoo ne, a n foo kɔɔ̃n gole lɛa ǹ ganaa.

¹⁶ Maǹ wúlu mànan koe ǹ zɔ̀ɔn lɛn la, maǹ màn giĩ kɔɔ̃n tiɛ̃ ǹ kokoon wɔ lɛa. A giala, mà ǹ dinin barka nɛ ǹ tá zɔ̀ gigiã kuĩ, ǹ nə́ màn-bii kɔɔ̃n yii.

¹⁷ Ǹsɛn man die goɛ̃ ǹ zɔ̀ɔ lɛ binyii miɛ̃ duduu? Maǹ die goɛ̃ tɔrɔ kɔsɔn kɛn dii miɛ̃ duduu ǹ makara ná a boe ǹ ganaa wa?