Mejieghasan 18 - Hudani Kielien

Babilun Furawo

¹ Enense khuinashi bi chanlase nie fugie nenlitu qienxien asimanse bouzhezho, hhei fama zemin jiere gon zhouizho.

² Hhe fugie shenqighala waradazhi kieliezho, "Babilun fugie chenshi furawo, furawo! Sheitan souku oron gholuwo. Yanyanji zannan ruhherni ho, yanyanji zannan bunzhuni galun, yanyanji zannan, hanzhan gieghaku yewoni oron gholuwo.

³ Soyuji gojiala hhei lon kijieku fugie nefuxinde sudozho. Zemin jieredu honshanla hhere kijiezhi daozho. Hhe gofenji baer lon huaise zemin jieredu meimei giechen kunla facai giewo."

⁴ Bi pse sonosuse asimanse da nie shenqi kieliezho, "Mii bexinla, hhe chenshise khizhe! Pse hhere hhantu zui bizhi hhe shouiku zeinanni shouine.

⁵ Hhei zui zemin jiere duruzhi Huda hhei codasanyi ese matazho.

⁶ Hhe kunlade matugie giese hhendeye qingiezhi gie. Zhao hhe giesande shonbeide kharulu. Hhe huighasan jiuni beizide shonbeide huighadene hhende ogizhi chenfa gie.

⁷ Hhe goyane matugie kuaizhi matugie gofende baerni lon huaizhoshi hheiye qingiezhi tendun shouighazhi nango giegha. Hhe zhughedene kieliezhi bi honshan mutun wizide souzhi guafu pusho. Zhughede yama nango gieku uwo giezho.

⁸ Ingiese hhei zeinanla man niudude irene. Jiushi fuguku, nango gieku, oliesuku wo. Hhei khanghala sidera widaghane. Hhei panjiku Ezhan Hudade fugie nenli wine."

⁹ Hhere hhantu lon kijiezhi gofende lon baer huaisan zemin jieredu honshanla hhei tuliesan funii chanladene hhende oluzhi hende wilane.

¹⁰ Hhela hhe tendun shouisanse ayizhi gholode beidene, "Gou widawo! Gou widawo! Babilun fugie, famatu chenshiya, Niecha jiere chii faiku irewo." giezhi kieliene.

¹¹ Zemin jieredu meimei giesan kunla hhende oluzhi hende wilakushi hhelai dunxilai agichen kun pse widawo.

¹² Ene dunxilashi antan, miengu, boushi, zhenzhu, gou bosi, zisheini seiliu, donzi, dahunseni seiliu, yanyanji xian winetu mutun, daxianni shidunghala giesan yanyanji dunxi, guizhuntu mutun, tun, qiemu, guizhuntu tashighala giesan yanyanji dunxi,

¹³ rougui, doukou, xian, xianshui, andatu osun, jiu, tosun, ghurun, boudei, fughe, ghoni, morei, mache, pse hoji wo.

¹⁴ Meimei giesan kunla kieliezho. "Babilunya, chi oresan dunxila man widawo. Chii yanyanji seighan, gou dunxila chii dundase widazhi pse chanla dane!"

¹⁵ Hhe chenshide meimei giezhi facai giesan kunla hhe tendun shouisanse ayizhi gholode beidene hende wilazhi kieliezho,

¹⁶ "Gou widawo! Gou widawo! Ene fugie chenshiya, Yenlai zishei, dahunni gou jienni musizhi antan, boushi, zhenzhughala dabalazho.

¹⁷ Niecha jiere imekie bayannila wida khiwo!" Jien chonzhan, chon sousan kun, chon jiere wilie giesan, soyuji haini kouizhi udu daosanla gholode beizhi

¹⁸ hhei tuliesan funii chanladene waradazhi kieliezho, "Yan chenshi ene chenshise fama wo?"

¹⁹ Hhela pse turani qiorun jierene teidene hende wilazhi waradazhi kieliezho, "Gou widawo! Gou widawo! Ene fugie chenshiya, Jien hai jiere yosan chonla hhei bayanni kouizhi bayazhezho! Hhe niecha jiere hontan gholuwo.

²⁰ Asimanya, shentu, shitu, xienzhilaya, ta man hhei yenyinzhe bayasundu! Huda tande oluzhi hhei panjiwo!"

²¹ Nie fugie liliantu qienxien nie fugie qiemansha mutun tashini qila haide bendadene kieliezho, "Babilun fugie chenshini ingiezhi hende benda boughase pse chanla dane.

²² Qin tanjisan, don doulasan, xiu feiliesan, laba feiliesan shenqini chii dunda pse sonosu dane. Yanyanji mujianlai chii dunda ereizhi olu dane. Qieman sidasan shenqini chii dunda sonosu dane.

²³ Zhulani gon chii dunda pse ulie zhouine. Shini khughon, shini biereini shenqii pse chii dunda sonosu dane. Chare meimei giesan kunla yenlaishi duya jieredu zui henni wo. Soyuji gojialai chii fashu miizhi daozho.

²⁴ Xienzhi, shentu, da zemin jieredu soyuji alasan kunlai chusunni ene chenshise ereizhi oluwo."