Mejieghasan 15 - Hudani Kielien

Zuihouku Zeinanni Bareisan Dolon Qienxien

¹ Bi pse chanlase asimande da nie zunji wine. Fugie, ghudure no wo. Dolon qienxien dolon zeinanni bareizho. Eneshi zuihouku zeinan wo. Hudai hokuku eneghala barane.

² Bi chanlase khan huisan boli mutun hai wine. Yewo, yewoni nigieda, yewoni nierei daibio giesan shuzise injisan kunla boli hai jiere beizhi Hudai qinni bareidene

³ Hudai hoji Musai don, ghoni ghughanyi donni doulazhi kieliezho, "Ezhan Huda, fugie nenlituya, chii gieku fama wo, ghudure wo! Soyuji gojiani honshanya, chii mo gundan wo, zhen wo!

⁴ Ezhan, zinie chishi zhiguitu wo. Kien chii ulie zunjizhi chii nierei ulie kuaine? Soyuji gojiala irezhi chii beiikushi chi gundande giekune khizheghazho."

⁵ Enense khuinashi bi chanlase asiman jiere dajien keizho. Eneshi ganzhen beiku zhanfan wo.

⁶ Dajiense dolon zeinanni gonjisan dolon qienxien khizhewo. Ganjin, gieghantu gou jien musizhi echan jierene antanni popu banlazho.

⁷ Jieran amitu ojien dundadu niekozi chanqi izhi amituku Hudai hokukui zhonlozhi durughasan dolon antanni ighai dolon qienxiende ogiwo.

⁸ Hudai fama, nenlighala dajiende funi duruzho. Dolon qienxien dolon zeinanni bouzhezhi baraghatula kiema dajiende oro dane.