Yohannis 9 - Saaho Cusub Cahde

Yeesus inti-malek yooboke xiyawto urusa

¹ Yeesus tillaabak yooboke maxko inti-male kin xiyawto yuble.

² Kaa katattaynit lel: “Mudarris, usuk inti-malek yoobokem zambe abtem kayya, woole kaa dhaltoyya?” yerhxiinih kaa esseren.

³ Yeesus: “Yallih ciyyo kaa araxah tamballaw ciloh kiyah, zambe usuk maabinna, woole kaa dhaltoyya maabinnooni.

⁴ Lellec kuuk yi fare tiyahi ciyyo abno nolle tane; walaa inketti ciyyo adde abo taana bar lel amiituk yane.

⁵ Anu ta caalamalle aniyom fanah ta caalamti ifo kiyo” yerhxeh alle yedebbe.

⁶ Tayim yerhxemko sarrah, baarholle thuf-yerhxeh thufeenaako kalla abe. Sarrah amaa xiyawtih intit amaa kallah xishiye,

⁷ kayyak lel: “Aduwaaki, Selihoom (tee macna ‘fartotta’ kinni) raadde cakalish” akko yerhxe. Usuk lel yedeeyaako cakalisheh abluk gaxe.

⁸ Amaa kaa xuggit kee awwalah caageena kuuk kaa yubleh yine mari: “Tati tamaa defeyeyaako caagensiitak yine tiya makiho?” arhxuk yinin.

⁹ Gari: “Kayya kinni” yerhxin. Gari: “Maale, laakin kayyah higgida” yerhxin. Usuk yibbirhekkeeko: “Amaa xiyawti yotta kinni” arhxuk yine.

¹⁰ Amaymih usun lel: “Amaydo ku intit aaginah fakkite?” akko yerhxin.

¹¹ Usuk: “Yeesus akko yarhxin xiyawti kalla abeyaako intit yoh xishiyeh: ‘Aduwaaki Selihoomudde cakalish’ yok yerhxe. Anu lel cakalishe gedda mablo geye” akko yerhxe.

¹² Usun: “Usuk awla yane?” akko yerhxin. Usuk lel: “Maarhige” akko yerhxe.

¹³ Amaa awwalah inti-male kuuk yine xiyawto Faarisiinille kaa baahen.

¹⁴ Kado, Yeesus kalla abeyaako kaa intit adde faakem Sambat kuuk yine.

¹⁵ Amaymih amaa Faarisiin usuk aaginah mablo geyo dhiicem malammih kaa esseren. Usuk lel: “Usuk yi intitille kalla alle haye, anu lel cakalisheh abluk aniyo” akko yerhxe.

¹⁶ Amaa Faarisiinko gari lel: “ Sambat mirhawrhomhi sabbatah, ta xiyawti Yallaako maki” yerhxin. Gari laakin: “Zambe le xiyawti ta gina le ishaarar aaginah abo dhiica?” yerhxin. Ten fanadde lel sitta-waa yekke.

¹⁷ Amaymih amaa inti-malek malammih: “Usuk intit koh faakemhi sabbatah, atu kaa sabbatah ayim tarhxe?” akko yerhxin. Usuk: “Usuk nabii kinni” yerhxe.

¹⁸ Amaa xiyawti inti-male kuuk yinem kee mablo geyem Yahuud maamaninnooni, aykee amaa mablo geye xiyawtih dhaltoyyah deecimaanah:

¹⁹ “Tati tamaa inti-malek yooboke akko tarhxin sin barha kinni?” arhxuk ten esseraanandah.

²⁰ Kaa dhaltoyya: “Tati ni barha kinam kee inti-malek yoobokem naarhige.

²¹ Kado aaginah yablem kee miyatti akah faakem laakin minaarhige. Usuk gufaa kinnik kaa essera. Isheh nabseh isheh akah waanisho dhiica” yerhxiinih alle yedebbin.

²² (Kaa dhaltoyya Yahuud akah mashshiiteenim lel, Yeesus Masiix kinamah ashhidinnanya sunagoogeeko yawco kinamalle Yahuud mece geddaakoh gaba-beeteenih yiniinimhi sabbatah kinni.

²³ Amaymih kinni lel: “Gufaa kinnik, kaa essera” yerhxiinim).

²⁴ Amaymih lel amaa inti-male kuuk yine xiyawtoh malammit gedda akah deecimeenih: “Yallah nabne uxuu. Ta xiyawti zambi-wanna kinam naarhige” akko yerhxin.

²⁵ Usuk lel: “Zambi-wanna kinni, maki maarhige. Inki xaaja laakin aarhige, inti-male kuuk inemko, kado able” yerhxeh alle yedebbe.

²⁶ Usun: “Usuk ayim koh abe? Ku intit aaginah koh faake?” akko yerhxin.

²⁷ Usuk: “Anu awwalko sinah warisheh aniyo, atin laakin yi mabbitiini. Aymih kinni malammih akah taabboona fadhdhaanam? Atin gantah kaa katattaynit takkoona farhak taniini?” yerhxeh alle yedebbe.

²⁸ Usun lel akah waatimeenih: “Atu kaa katattayna kito, nanu laakin Moosat katattaynit kino.

²⁹ Yalli Moosaalih waanishem naarhige, ta xiyawti awlaako amiituk yanem laakin minaarhige” yerhxin.

³⁰ Amaa xiyawti: “Ubula, tayim cibra kinni! Awlaako yemeetem mitaarhigiini, usuk laakin intit yoh faake.

³¹ Yalli zambi-wannun miyaabbem naarhige, laakin akkinnanti Yalla mashshiitah kaa farhi abatiya yekkemko, Yalli kaa yaabbe.

³² Ta caalam erhedhdhemko taahe inti-malek yooboke tiyahi inti faakati caduruh yomoobbeh miyaarhige.

³³ Ta xiyawti Yallaako akke wayaado inkim abo dhiice mirhaarho” yerhxeh alle yedebbe.

³⁴ Usun: “Atu nabaatih zambeelih toobokeyaako, ni taydaraso?” yerhxiinih alle yedebbin. Irolle lel kaa yeyyeecin.

³⁵ Yeesus kayya irolle yeyyeeciinim yoobbeh yineyaako kaa geye gedda: “Xiyawti Barhah taamine?” akko yerhxe.

³⁶ Usuk: “Maddara, miyatto kinni amaati, akah aamanok?” yerhxeh alle yedebbe.

³⁷ Yeesus: “Kaa tubleh tanito, kottaalih waanishak yaneti lel kayya kinni” akko yerhxe.

³⁸ Usuk lel: “Maddara, aamine” yerhxeh akah yucbude.

³⁹ Yeesus: “Anu tamaa ablinnixe mari yabloona, yable mari lel intit wayoona ciloh ta caalamalle firdeh kinni emeetem” yerhxe.

⁴⁰ Faarisiinko gari amaa kaa agaagalle tineya tayim yoobbiinih: “Nanu gantah inti-malit kino?” akko yerhxin.

⁴¹ Yeesus: “Inti malit kuuk tiniinih takkindo, zambe aalle mirhaarhitiini; kado laakin: ‘Nable’ arhxuk tanin, sin zambi lel sinlih raaca” akko yerhxe.