Yohannis 8 - Saaho Cusub Cahde

Zinadde tindhibbirhe numa

¹ Yeesus laakin Oolac Koomalle yewce.

² Dhaxiine lel malammih amaa maqhdas carelle yemeete. Inkoh xiyaw alle yemeetin, usuk lel defeyeh ten yuyduruse.

³ Sercat dhiiceenit kee Faarisiin lel wuli zinadde tindhibbirhe numa baaheenih, fanadde tee hayeenih:

⁴ “Mudarris, ta numa zinat ciyyodde tindhibbirhe.

⁵ Kado Moosat sercat ta gina-le sayyo dhayitih nagdafo ni yaamire. Amaa gedda, atu ayim tarhxe?” akko yerhxe.

⁶ Tayim lel kaa yaqhaasoona kee alle kaa yaksisiinim geyoona ciloh kinni. Yeesus cunuuneh ferah baarholle yuktube.

⁷ Gaxen gaxeenih kaa esseren gedda, uguteyaako: “Tamaa sinadde zambe aallinnixeti afti dhaa alle cido” akko yerhxe.

⁸ Malammih lel cunuuneh baarholle yuktube.

⁹ Usun laakin tayim yoobbin gedda, baarritko erherhisheenih tiya tiyah yedeyin, Yeesus lel amaa fanadde daw-terhxeh tine numaalih inkettak raace.

¹⁰ Yeesus uguteyaako: “Te numa, awla yaniini? Inketti ku maqhtsacinnaho?” akko yerhxe.

¹¹ Ishi lel: “Walaa inketti, Maddara” akko terhxe. Yeesus lel: “Anu gantah ku maqhtsiceeki, aduwaaki taymik sarrah zambe maabin” akko yerhxe.]

Anu caalamti ifo kiyo

¹² Yeesus lel malammih: “Anu caalamti ifo kiyo. Yotta katayinnanti lel ditedde yadaw makiiki, aniinat ifo geyo kinni” akko yerhxe.

¹³ Amaymih Faarisiin: “Atu isheh ishi shaahid akkuk tanito, ku shahaada rumma maki” akko yerhxin.

¹⁴ Yeesus: “Anu inni shaahid walaa ekkemih awlaako emeeteh awlalle adiyuk anem aarhigemhi sabbatah, yi shahaada rumma kinni; atin laakin anu awlaako lee emeetem, awlalle lee adiyuk aniyom mitaarhigiini.

¹⁵ Atin sinni amooko tafridin, anu inketta mafride.

¹⁶ Laakin walaa anu ifridemih, yi firdi rumma kinni; amayim lel anu inni ulah maki afridemki, yotta kee tamaa yi fare yi Abba kinni.

¹⁷ Sin sercatadde lammaati shahaada rumma kinam tunkuttubeh tane.

¹⁸ Anu inni shaahid yakke tiya kiyo, yi fare yi Abba lel yi shaahid yakke” yerhxeh alle yedebbe.

¹⁹ Amaymik sarrah usun: “Ku Abba awla yane?” akko yerhxin. Yeesus: “Yotta mitaarhigiini, yi Abba mitaarhigiini. Yotta taarhigindo, yi Abba gantah aarhige dhadhdhen” yerhxeh alle yedebbe.

²⁰ Yeesus tayim maqhdas caredde, muttuxuwat sanduq hi agaagalle yekkeh aydurusuk waanishem kinni. Kaa saaca migufinnamhi sabbatah walaa inketti kaa mabbarhinna.

²¹ Amaymih malammih: “Anu adiyuk aniyo, atin yi wagiitoona kitin, zambedde lel rabtoona kitin. Anu alle adiyuk anelle tadawna mirhictaana” akko yerhxe.

²² Amaymih Yahuud: “‘Anu alle adiyuk aniyolle tamaatoona mirhictaana’ yarhxem ishe yagdafo farhak yaneho kela?” yerhxin.

²³ Usuk: “Atin gubaako kitin, anu lel aganaako kiyo. Atin ta caalamti mara kitin, anu ta caalamko makiyo.

²⁴ Atin sinni zambedde rabtoona kitiinim sinah warishe, Anu kayya Kiyomuh aamine wayteenimko sinni zambedde rabtoona kitin” akko yerhxe.

²⁵ Amaymih lel: “Atu miyatto kito?” akko yerhxin. Yeesus lel: “Tamaa erherhaako sinak erhxeh anem kinni.

²⁶ Sin sabbatah arhxem kee afridemko mangum tane, yi fareti rumma kinni, anu lel kaako oobbem caalamah warishak aniyo” akko yerhxe.

²⁷ Usuk Abbat sabbatah akko arhxuk yinem mafhaminnooni.

²⁸ Amaa gedda Yeesus: “Xiyawti Barha xaf-ishshaanamko sarrah, Anu Kayya kiyom taarhagoona kitin. Abba akah yi yuyduruseekah kinni waanisham kibah, anu inneeko walaa inkim maaba.

²⁹ Yi fareti lel yottaalih yane. Umman gedda kayyadde basak-tarhxem abamhi sabbatah, inni ulah yi xabeh miyane” akko yerhxe.

³⁰ Usuk tayim arhxuk mango mari kayyah yeemenin.

Rummi finja sinah yaxaw kinni

³¹ Amaymih kayyah teemene Yahuuduk Yeesus: “Yi waanittadde sigteenimko atin rummah yi katattaynit kitin,

³² rumma taarhagoona kitin, rummi lel finja sinah yaxaw kinni” akko yerhxe.

³³ Usun: “Nanu Abraahim zara kino, walaa inkettah lel ningizziyeh minaarhige. ‘Finja geytoona kitin’ nokko tarhxem lel aaginah kinni?” yerhxiinih alle yedebbin.

³⁴ Yeesus alle yedebbe: “Zambe abinnanti zambi garuzzo kinam rummah, rummah sinak arhxiyuk ane.

³⁵ Garuzzi umman geddah caredde miyanniye, Barhi umman gedda yanniye.

³⁶ Amaymih, Barhi finja sinah yoxoyemko, rummah finja geytan.

³⁷ Atin Abraahim zara kitiinim aarhige. Yi waanitta sinadde cara waytemhi sabbatah yi tagdafoona farhak tanin.

³⁸ Anu yi Abbaako ublem waanisha, atin lel sinni abbaako toobbiinim abtan.”

Atin sin abba kin Ibliis mara kitin.

³⁹ Usun: “Ni abba Abraahim kinni” akko yerhxin. Yeesus: “Atin Abraahim cindham takkindo, Abraahim abem abak anniye dhadhdhen.

⁴⁰ Laakin Yallaako oobbeh rumma sinah warisha xiyawtok, kado yi tagdafoona fadhdhan. Tayim Abraahim abem maki.

⁴¹ Atin abak taniinim sin abba abem kinni” akko yerhxe. Usun: “Nanu uma-xibarah toobokem makino. Nanu Yalla kin inki Abba lino” akko yerhxin.

⁴² Yeesus: “Yalli sin Abba yekkeh yakkeedo, anu Yallaako emeeteh talle aniyomhi sabbatah, yi akxine dhadhdhen. Usuk yi farenkah, anu inneh maamaatiyo

⁴³ Anu arhxem aymih afhime waytaana? Yi waani taabboona mirhictaanamhi sabbatah kinni.

⁴⁴ Atin sin abba kin ibliis mara kitin, sin farhi lel sinni abbah farhi abaanam kinni. Usuk erherhko nabsi-wanna kinni, rummi kaadde miyanemhi sabbatah lel usuk rummah abam male. Usuk zirabbita gedda, zirable kee zirabti abba kinamhi sabbatah, usuk ishi xibarko kinni waanisham.

⁴⁵ Laakin anu rumma sinah warishamhi sabbatah yi mitaaminiini.

⁴⁶ Sinko zambi sabbatah yi yishshimine tiyah miyatti yane? Anu rumma waanisha gedda, aymih yi aamine waytaanam?

⁴⁷ Yallaako akkinnanti Yallih waani yaabbe. Atin amayim akah aabbe waytan sabab lel Yallaako makitiinimhi sabbatah kinni” akko yerhxe.

Abraahimko basolle anu aniyo

⁴⁸ Yahuud lel: “Atu Samaariyatto kitom kee jinnetta litom narhxe gedda meceetih minane?” akko yerhxin.

⁴⁹ Yeesus: “Anu jinnetta maliyo, laakin inni Abba xishmata, atin laakin yi mixishmattaana.

⁵⁰ Yakko kibah anu inni nabne miwagiya, laakin wagiya Inketti yane, usuk lel daaniya kinni.

⁵¹ Yi waanitta yibbirheti, rabi caduruh yablo makinam rummah rummah sinak arhxiyuk ane” akko yerhxe.

⁵² Yahuud lel: “Atu jinnetta litom kado neerhege! Amaa nobowa akah rabeeniikah Abraahim rabeh kinni. Atu laakin, ‘Akkinnanti yi waanitta yibbirhemko, rabaako dhago maki’ tarhxe.

⁵³ Tamaa rabe ni abba kin Abraahimko nabitoho atu? Nobowa lel raben! Atu miyatto ishek abak tanito?” akko yerhxin.

⁵⁴ Yeesus: “Inne eynebemko, yi nabne foyya kinni. Yotta yaynabeti, tamaa atin ‘Usuk ni Yalla kinni’ akko tarhxin yi Abba kinni.

⁵⁵ Atin laakin kaa teerhegiinih mitaniini. Anu kaa aarhige. Kaa maarhige arhxo akkeedo, sina balih zirable akke dhaarhe. Laakin anu kaa aarhige, kaa waanitta lel abbirhe.

⁵⁶ Sin abba kin Abraahim yi lellec yablo kinamah xedene. Yubleh lel xedeneh yine” akko yerhxe.

⁵⁷ Amaa gedda Yahuud: “Atu kaddih kontom iggidiya cumreh maabito hanuk, Abraahim tubleh tanito?” akko yerhxin.

⁵⁸ Yeesus: “Abraahimko basolle Anu aniyom, rummah rummah sinak arhxiyuk ane” akko yerhxe.

⁵⁹ Amaymih alle cidoona dhayit yooqhocin, Yeesus laakin ishe sucuseh amaa maqhdas careeko yewce.