Yohannis 7 - Saaho Cusub Cahde

Yeesus Reeditti cidille

¹ Taymik sarrah, Yeesus Galiilalle hel-arhxuk yine. Yahuud kaa yagdafoona wagiyak yiniinimhi sabbatah, Yahuudiyalle hel-arhxuk miyine.

² Kado Reeditti cid Yahuudiya lel kab-yerhxeh yine.

³ Amaymih kaa sacul: “Atu abak tanito ciyyo ku katattaynit gantah yabloona ciloh takke xabaaki Yahuudiya fanah aduu.

⁴ Meceetih yamadhdhago farhati suctodde ciyyo maaba. Atu tayim abtemko, caalam ishe uybulluu” akko yerhxin.

⁵ Amayim lel kaa sacul gantah kayyah maamaninnoonimhi sabbatah kinni.

⁶ Yeesus: “Yi waqhti gufeh miyane, sin waqhti laakin umman gedda talle yane.

⁷ Caalam sina sin mitancibe, anu tee sabbatah tee ciyyo umam kinamah ashhidemhi sabbatah yi niciba.

⁸ Atin amaa cid fanah eweca. Yi waqhti inkoh yikmileh miyanemhi sabbatah ta cid fanah awco makiyo” akko yerhxe.

⁹ Tayim yerhxek sarrah, Galiilalle raace.

¹⁰ Taymik sarrah laakin kaa sacul amaa cid fanah yewcin, sarrah usuk gantah ambulluuk makiiki suctodde yewce.

¹¹ Yahuud lel: “Awla yane?” yerhxiinih amaa cidti makaanolle kaa wagiyak yinin.

¹² Kaa sabbatah lel xiyaw fanadde mango zate tine. Gari: “Mece tiya kinni” yerhxin, gari lel: “Maale, doolabak yane” yerhxin.

¹³ Yakko kibah Yahuudko mashshiiteenimhi sabbatah kaa zacabah af faakeh waanisheti miyine.

¹⁴ Cid abrhadhdhowe gedda lel Yeesus maqhdas caredde yewceyaako yaydaraso erherhishe.

¹⁵ Amaymih Yahuud: “Ta xiyawti madrasah maadayinna hanuk aaginah yaarhago dhiica?” yerhxiinih cibrah rabak yinin.

¹⁶ Amaymih Yeesus: “Ta aydaras yim maki, yi fare tiyahim kinni.

¹⁷ Akkinnan tiyahi farhi Yallih farhi abaanam yekkemko, ta aydaras Yallaako kinam, hido lel anu waanishak aniyom inni amooko kinam yaarhago kinni.

¹⁸ Ishi amooko waanishati ishi nabne wagiya, tamaa kayya fareh yane tiyahi nabne wagiyati laakin, usuk rummaahit tiya kinamhi sabbatah, kayyadde camazi miyane.

¹⁹ Moosa sercat sinah maaxayinnaho? Laakin sinko walaa inketti sercat mirhawrha. Aymihi yi tagdafoona fadhdhaanam?” akko yerhxe.

²⁰ Amaa mango xiyaw: “Atu jinnetta lito! Miyatti ku yagdafo farhe?” yerhxiinih alle yedebbin.

²¹ Yeesus: “Anu inki ciyyo abe, atin lel inkoh cibrah alle rabten.

²² Moosa askok kalum sinah yoxoye (tayim laakin abbubko kibah Moosaako kuuk miyine), atin lel xiyawtoh Sambatah askok akah kaltan.

²³ Moosat sercat yaggidilemko ciloh, Sambatah xiyawti askok kalum akko geyaya, anu Sambatah xiyawto inkoh urusemhi sabbatah yolle kurraak taniini?

²⁴ Xaqqi firdeh ifrida kibah, bukaako tubliinih mafradina” akko yerhxe.

Tati Masiix yakke kela?

²⁵ Amaymih, Yerusaalem xiyawko gari: “Tamaa yagdafoona farhan xiyawti tatiya makiho?

²⁶ Usuk lel talle af faakeh waanishak yane. Usun lel inkim akko miyarhxiini. Ta reezon kela, tati rummah Masiix kinam yeerhegiinih yakke?

²⁷ Laakin nanu ta xiyawti awlaako yemeetem naarhige, Masiix yamiite gedda laakin awlaako yamiitem walaa inketti yaarhago maki” yerhxin.

²⁸ Amaymih Yeesus wac-yerhxeyaako maqhdas caredde aydurusuk: “Atin yi taarhigin, awlaako emeetem lel taarhigin. Laakin anu inni amooko maamaatiyo. Yotta fareti rummaahit tiya kinni, atin lel kaa mitaarhigiini.

²⁹ Usuk yi fare, anu kaako emeetemhi sabbatah, anu kaa aarhige” yerhxe.

³⁰ Usun kaa yabbarhoona farhak yinin, kaa saaca kaddih gufteh mitinemhi sabbatah laakin, walaa inketti gaba alle mihayinna.

³¹ Mango xiyaw laakin akah yeemenin. “Masiix yamiite gedda, ta xiyawtooko mango ishaarar abo kinni?” yerhxin.

Caskar Yeesus yabbarhoona farritimen

³² Faarisiin lel amaa mango xiyaw kaa sabbatah zatteyak yaniinim yoobbiinih, sheekhat manabottit kee Faarisiin kaa yabbarhoona dhawrheenit faren.

³³ Yeesus: “Dagum sinlih sugo kiyo, sarrah laakin yi fare tiyah fanah gaxo kiyo.

³⁴ Yi wagiitoona kitin, laakin yi geytoona makitiini. Anu alle aniyolle atin tamaatoona mirhictaana” yerhxe.

³⁵ Yahuud lel sinne-sinneh: “Ta xiyawti nanu alle kaa geyno tannakke yadaw leya awla kinni? Amaa Giriik fanadde faax-terhxeh tanem fanah yedeeh Giriik ten yaydaraso farhak yane kela?

³⁶ ‘Yi wagiitoona kitin, yi geytoona laakin makitiini’, ‘Anu alle aniyolle tamaatoona mirhictaana’ yarhxem aymih kinni?” sittiyak yerhxin.

Aniinat layeh nahaar

³⁷ Amaa cidko abayshimat lellecidde, naba lellec, Yeesus uguteyaako wac-yerhxeh: “Akkinnanti bakhaaritemko yottalle yemeeteh yaacaboo.

³⁸ Yottah yaamineti, tamaa Kutuub: ‘Kaa afcaadooko nahaar aniinat laye zarto kinni’” akah yarhxeekah kinni.

³⁹ Usuk tahe akko yerhxem lel tamaa kayyah yaamine mari kabbaatoona lon Ufaye kinni, Yeesus kaddih nabne geyekkah yinemhi sabbatah, Ufayi yomxoyeh miyine.

Xiyaw fanadde yine sitta-waa

⁴⁰ Ta waani yoobbin gedda xiyawko gari: “Tati rummah Nabii kinni” yerhxin.

⁴¹ Aki mari lel: “Tati Masiix kinni” yerhxin. Gari laakin: “Masiix Galiilaako yamaato kinniho?

⁴² Kutuub, Masiix Dawud zaraako yamaato kinam kee tamaa Dawud alle yine Beetlexemko yamaato makiho yerhxem” yerhxe.

⁴³ Amaymih kaa sabbatah xiyaw fanadde sitta-waa yine.

⁴⁴ Tenko gari kaa yabbarhoona farhen, walaa inketti laakin gabub alle mihayinna.

⁴⁵ Amaa dhawrheenit alle yemeetin gedda sheekhat manabottit kee Faarisiin: “Aymih kaa baahe waytaana?” akko yerhxin.

⁴⁶ Amaa dhawrheenit lel: “Ta xiyawto balih walaa inketti miwaanishinna!” yerhxiinih alle yedebbin.

⁴⁷ Faarisiin lel: “Atin gantah doolabimteeni?

⁴⁸ Reezonko hido Faarisiinko kayyah teemenem taneho?

⁴⁹ Ta mango xiyaw sercat sodhdhaya laakin abaarolit kinon” yerhxiinih alle yedebbin.

⁵⁰ Niqhodiimos, tamaa awwalah kaalle yedeyeh yineya, tenko lel kuuk yineya:

⁵¹ “Ni sercat xiyawto aabbekkah, kee abam kaa ayshidhdhigekkah yafrideho?” akko yerhxe.

⁵² Usun: “Atu gantah Galiilaako kito? Wagiyaaki ubul, amaa wacde akah sayen nabii Galiilaako miyamiite” yerhxiinih alle yedebbin. [

⁵³ Sinni-sinni careh yedeyin.