Yohannis 6 - Saaho Cusub Cahde

Yeesus koona shiix bettiisha

¹ Amaymik sarrah, Yeesus Tiberiyasti igil akko yarhxin, Galiilaati igilhi waacina fanah yedee.

² Laxuute maralle abe ishaarar yubliinimhi sabbatah mango xiyaw lakadde akko aduuk yinin.

³ Yeesus koomalle yewceh amalle ishi katattaynitlih defeye.

⁴ Yahuud cid kin Faasigi lel yakko kuuk yine.

⁵ Amaymik sarrah, ishi intit xaf-isheyaako mango xiyaw kaa gabolle amiituk yubleh, Filibboosuk: “Ta xiyaw beetan folo awlaako dhamno kino?” akko yerhxe.

⁶ Usuk abo lem isheh aarhiguk yine hanuk, kaa yaqhaaso ciloh akko yerhxem kinni.

⁷ Filibboos: “Lamma bool diinar hi folo walaa cindhadhdhaahikkeh ten migufta” akko yerhxe.

⁸ Amaa katattaynitko Indiryaas, Simcoon Bithroos sacal kinya tahe akko yerhxe:

⁹ “Talle cadeelaw koona kinnas kee lamma caasatto le cindhooki yane, laakin tayidhdha mango marah ayim akah takko?”

¹⁰ Yeesus: “Ta xiyaw defeysha” yerhxe. Kado, amaa caralle mango cashsho tine. Amayimko, labha bisa koona shiix takkemik defeyen.

¹¹ Yeesus, amaa kinnos beyeyaako dhaaco alle abek sarrah, amaa defeyteh tine xiyawah kele. Caasa lel amayim balih, sinneh akah farheeniikah.

¹² Inkoh xayteenik sarrah ishi katattaynitik: “Teggereerecem racteya inkoh eskettaantaaki, walaa inkim akko alaye wayto” akko yerhxe.

¹³ Amaymih usun amaa cadeelaw koona kinnasko amaa mari beeteenimko ractem teggereereceya yeskettiinih lamman kee taman jambiiliya akko yemegin.

¹⁴ Amaa xiyaw lel usuk abe ishaarar yublin gedda: “Tati rummah tamaa caalamalle yamaato le Nabii kinni” yerhxin.

¹⁵ Sarrah yemeetinyaako xaylah nugus akko aboona loonim yeerhegeh, malammih Yeesus ishi ulah koomalle gaxe.

Yeesus layet bukalle gerha

¹⁶ Kasi yekke gedda, kaa katattaynit igil fanah oobeenih,

¹⁷ jalbadde koreenih igilko Kafarnaxuumulle taben. Baarho dhumteh tine, Yeesus lel kaddih alle amiitekkah yine.

¹⁸ Dhacuma haboobale tinemhi sabbatah, amaa igil angixiluk yine.

¹⁹ Koonah lixa kiilometer yedeynimko sarrah, Yeesus igil bukalle yeeceteh amaa jalbah kab-yerhxeh yublin gedda, mashshiiten.

²⁰ Usuk laakin: “Yotta kinni, mimashshiitina” akko yerhxe.

²¹ Usun lel amaa jalbadde kaa kabbaateenih, akkanih lel amaa jalba usun alle aduuk yinin baarho gufte.

Anu aniinat folo kiyo

²² Malammit max amaa igil tabsolle racteh tine mango xiyaw, amalle inki jalba bisa tinem kee Yeesus amaa jalbadde ishi katattaynitlih moorobinnam, laakin kaa katattaynit sinni ulah yedeynih yiniinim yublin.

²³ Aki jalbab Tiberiyasko lel amaa Maddari dhaaco alle abeyaako folo alle beeteenih yinin carah agaagalle yemeete.

²⁴ Sarrah amaa mango xiyaw Yeesus yakko kaa katattaynit amalle miyiniinim yublin gedda, sinneh jalababadde koreenih Yeesus goronuh Kafarnaxuum fanah yedeyin.

²⁵ Igilko amaa carha kaa geyen gedda: “Mudarris, talle manda temeete?” akko yerhxin.

²⁶ Yeesus: “Yotta wagiyak taniinim folo betteenih xayitten gedda kibah, ishaarar tubliinih makinam rummah, rummah sinak arhxiyuk ane.

²⁷ Abba kin Yalli ishi maxtam kayyalle hayeh yanemhi sabbatah, Xiyawti Barhi sinah yaxaw le umman geedit aniinah takke foloh kibah bakitto le foloh mixawalina” akko yerhxe.

²⁸ Sarrah usun: “Yallih ciyyo abno, ayim abno nolle tane?” akko yerhxin.

²⁹ Yeesus: “Yallih ciyyo tayim kinni, tamaa usuk fareh yanetiyah taaminiinim” yerhxeh alle deheye.

³⁰ Amaa gedda usun: “Amaydo, nubleh ku naamano ciloh awlih ishaara abta? Ayimti ciyyo abta?

³¹ ‘Beetoona carsheeko folo akah yoxoye’ terhxeh akah tunkuttubeh taneekah, ni abbub zibolle ‘manna’ akko yarhxin folo beeten” akko yerhxin.

³² Sarrah Yeesus: “Carsheeko folo sinah toxoyem Moosa akkekkah rummaahit folo yi Abba carsheeko sinah yaxayem rummah rummah sinak arhxiyuk ane.

³³ Amayim lel Yallih folo, usuk carsheeko oobayaako aniina caalamah yaxayem kinni” akko yerhxe.

³⁴ Usun: “Maddara, amaa folo umman gedda noh uxuu” akko yerhxin.

³⁵ Yeesus: “Anu aniinat folo kiyo; yottalle amiitinnanti safriito maki, yottah aamininnanti lel bakhaarito maki.

³⁶ Laakin yi tubliinih yi mitaaminiini sinak erhxe.

³⁷ Inkoh Abba yoh yaxayem yottalle tamiite, yottalle amiitinnan tiya lel kaa ayyaaco makiyo.

³⁸ Amayim lel carsheeko oobeh aniyom inni farhi abo makiiki, yi fareh yane tiyahi farhi abo kinni.

³⁹ Yi fareh yane tiyahi farhi lel tayim kinni, inkoh usuk yoh yoxoyeh yanemko walaa inkim akko aylayekkah, abayshimat lellec rabaako ugusam.

⁴⁰ Amayim lel yi Abbah farhi tayim kinni, Barha yableh kayyah aamininnanti umman geedit aniina yaallo kee anu abayshimat lellec kaa rabaako ugusam” akko yerhxe.

⁴¹ Usuk: “Anu carsheeko obte folo kiyo” yerhxemhi sabbatah, Yahuud yongoroozomin.

⁴² Usun: “Tati tamaa ina kee abba akko naarhige Yeesus, Yoosuf barha makiho? Aymih kinni kado: ‘Anu carsheeko oobe’ yarhxem?” yerhxin.

⁴³ Yeesus: “Sinne-sinneh mangaraazamina.

⁴⁴ Tamaa yi fareh yane yi Abba hiriige tiyaako bextih walaa inketti yottalle yamaato mirhiica. Abayshimat lellec lel rabaako kaa uguso kiyo.

⁴⁵ ‘Inkoh Yalli ten yaydaraso kinni’ yarhxiinim Nobowadde tunkuttubeh tane. Yi Abbaako yoobbeh yudruseti yottalle yamiite.

⁴⁶ Yallaako kin tiyaako bextih Abba tublem mitane; tati Abba yubleh yane.

⁴⁷ Aamininnanti umman geedit aniina lem rummah rummah sinak arhxiyuk ane.

⁴⁸ Anu aniinat folo kiyo.

⁴⁹ Sin abbub zibolle manna beeteenih raben.

⁵⁰ Ta folo carsheeko obta tiya kinni, akko beetinnanti lel miraba.

⁵¹ Anu aniina-le folo carsheeko obteya kiyo. Ta folooko beetinnanti, umman geddah maro kinni. Ta caalamti aniinah axawo liyo folo lel yi xazo kinni” yerhxeh alle yedebbe.

⁵² Yahuud lel: “Tati ishi xazo benno aaginah noh yaxaye?” yerhxiinih sinne-sinneh yenkeexedin.

⁵³ Amaymih Yeesus: “Xiyawti Barhih xazo betteenih, kaa biilo aacube wayteenimko, sinneh aniina malitiinim, rummah, rummah sinak arhxiyuk ane.

⁵⁴ Yi xazo beetinnanti, yi biilo lel aacubinnanti umman geedit aniina leya, anu lel abayshimat lellec rabaako kaa uguso kiyo.

⁵⁵ Amayim lel yi xazo rummaahit folo, yi biili lel rummaahit macaba kinamhi sabbatah kinni.

⁵⁶ Yi xazo beetinnanti, yi biilo lel aacubinnanti, yi addadde siga, anu lel kaa addadde.

⁵⁷ Yane Abba akah yi fareekah, anu lel Abbat sabbatah akah aneekah, tamaa yotta beetati yakkeedo yi sabbatah maro kinni.

⁵⁸ Tatiyä carsheeko obte folotta kinni, sin abbub beeteenih rabenya balih maki. Ta folo beetinnanti umman geddah maro kinni” akko yerhxe.

⁵⁹ Yeesus tayim yerhxem Kafarnaxuumulle Sunagoogedde aydurusuk kinni.

Umman geedit aniinah waani

⁶⁰ Kaa katattaynitko mango mari yoobbiinih: “Tayim dhacuma marhxo kinni, miyatti yaabbo dhiica?” yerhxin.

⁶¹ Yeesus laakin kaa katattaynit tayimhi sabbatah angoroozomuk yaniinim ishi afcaadodde yeerhegemhi sabbatah: “Tayim sin kurrayishshaho?

⁶² Xiyawti Barhi tamaa awwalah alle yinelle korak tablindo ayim abe dhadhdheeni?

⁶³ Aniina taxayem Ufaye kinni, xazo nafaaca male. Anu sinlih waanisheh anem Ufaye kee aniina kinon.

⁶⁴ Laakin sinko gari aamininnixeya yanin” akko yerhxe. (Amayim lel Yeesus, aamininnixe mari miya kinoonim kee kaa yasxaw leti miyatto kinam erherhaako yeerhegeh yinemhi sabbatah kinni).

⁶⁵ Usuk lel: “Tayim kinni anu sinak erhxem, Abba dhicshiishe tiyaako bextih, walaa inketti yolle yamaato mirhiica” akko yerhxe.

⁶⁶ Taymik sarrah kaa katattaynitko mango mari caazalle gaxen, kaalih lel maadayinnooni.

⁶⁷ Amaymih Yeesus amaa lamman kee taman fartoytiyak: “Atin gantah tadawna fadhdhaana?” akko yerhxe.

⁶⁸ Simcoon Bithroos taginah alle yedebbe: “Maddara, miya fanah nadiye? Atu umman geedit aniinah waani lito,

⁶⁹ nanu lel neemeneh nane, atu Yallih Quddus kin tiya kitom lel neerhegeh nane.”

⁷⁰ Yeesus: “Anu sin midooriyoho lamman kee tamanak? Yakko kibah sinko inketti ibliis kinni” yerhxeh alle yedebbe.

⁷¹ Amaa lamman kee tamanko kinni hanuk kaa yasxaw le tiya kinamhi sabbatah tahe akko yerhxem Yahuuda, Simcoon Iskariyoot barha kinni.