Yohannis 4 - Saaho Cusub Cahde

Yeesus kee Samaariyat numa

¹ Yeesus Yohannisko ziyaada aythimmiqhuk kee mango katattaynit abaa yanem Faarisiin yoobbiinim Yeesus yeerhege gedda,

² (aythimmiqhuk tinem Yeesus isheh akkekkah kaa katattaynit kuuk yinin haaki)

³ Yahuudiya xabeh malammih Galiila fanah yedee.

⁴ Samaariyaati fantaako lel yadaw alle tine.

⁵ Amaymih lel Suykhar akko yarhxin, Yoosuf ishi barhah Yacqoob yoxoyeh yine dhageh agaagalle tine Samaariyaati daafolle yemeete.

⁶ Amalle lel Yacqoob ceeli yine, Yeesus lel arax gerhodde taaneh yinemhi sabbatah, amaa ceeli agaagalle defeyak yine. Lellecti abrha takkem lel kuuk yine.

⁷ Amalle lel Samaariyaati numa laye culutto temeete. Yeesus lel: “Macaba yoh uxuu” akko yerhxe.

⁸ (Kaa katattaynit lel beetaanam dhaamoona amaa daafo fanah yedeyinih yinin.)

⁹ Amaa Samaariyaati numa: “Atu Yahuuddok, Samaariyaati numa kin yotta aaginah macaba esserta?” akko terhxe. Amayim lel Yahuud Samaariyaati xiyawlih walaa inkim miyangaliinimhi sabbatah kinni.

¹⁰ Yeesus lel: “Yallih muttuxuwa kee kado: ‘Macaba yoh uxuu’ kok arhxuk yane tiya teerhegeh takkeedo, atu kaa essere dhadhdhe, usuk lel aniinat laye koh axaye dhaarhe” akko yerhxe.

¹¹ Amaa numa lel: “Maddara, atu laye akah culaanamko inkim malito, ta ceeli lel mangum sam-yarhxe tiya kinni. Amaa aniinat laye awlaako geyta?

¹² Atu ni abba kin Yacqoobko nabito? Usuk ceela noh yoxoye, kaa cindham kee kaa saca balih lel isheh akko yoocobe” akko terhxe.

¹³ Yeesus: “Ta layeko yaacubeti malammih bakhaarito kinni.

¹⁴ Anu akah axawo liyo layeko yaacabo aallinnanti laakin caduruh umman geddah bakhaarito maki. Anu akah axawo liyo laye illa adde tekkeh umman geedit aniina fanah adde raxto kinni” akko yerhxe.

¹⁵ Amaa numa: “Maddara, talle layeh arakamko kee tayek sarrah bakhaaritamko ta laye yoh uxuu” akko terhxe.

¹⁶ Yeesus: “Aduwaaki ishi baclah deecimteh talle amo” akko yerhxe.

¹⁷ Amaa numa lel: “Bacla maliyo” akko terhxe. Yeesus: “‘Bacla maliyo’ tarhxe gedda meceetih tanito.

¹⁸ Amaye lel baacilko koon liituk tinemhi sabbatah kinni. Kado litoti lel ku bacla maki. Terhxeh tanitom rumma kinni” akko yerhxe.

¹⁹ Amaa numa: “Maddara, atu nabii kitom ubleh ane.

²⁰ Ni abbub ta koomah acbuduk yinin. Atu laakin: ‘Xiyaw yacbadoona alle tanem Yerusaalemille kinni’” tarhxe.

²¹ Yeesus: “Te numa, yi imin, hido ta koomalle, hido lel Yerusaalemille Abbah adde acbude waytoona litin saaca amiituk tane.

²² Atin sodhdhaanam tacbudin, nanu laakin garger Yahuudko kinamhi sabbatah naarhigemih nacbude.

²³ Abba ta gina-le xiyaw akah yacbadoona farhak yanemhi sabbatah, rummah yacbude mari ufaye kee rummah Abbah adde yacbudin saaca amiituk tane. Kado lel talle tane.

²⁴ Yalli ufaye kinni, kayyah yacbude mari lel ufaye kee rummah yacbadoona alle tane” akko yerhxe.

²⁵ Amaa numa lel: “(Kiristoos akko yarhxin) Masiix amiituk yanem aarhige. Yamiite gedda ummannim noh warisho kinni” akko terhxe.

²⁶ Yeesus: “Anu kottaalih waanishaya, kayya kiyo” akko yerhxe.

²⁷ Amaa geddadde lel kaa katattaynit yemeetin. Usuk amaa numaalih waanishaa yinemih inkoh yussuxuttutin, laakin: “Ayim fadhdha?” hido lel: “Aymih teelih waanishaa tanito?” tenko inketti marhxinna.

²⁸ Sarrah, ishi layet citro xabteh amaa daafo fanah tedeyeyaako xiyawakke:

²⁹ “Amowa, anu abem kinam inkoh yoh warishe xiyawto ubula. Tati kela Masiix yakke?” akko terhxe.

³⁰ Amaa daafooko yewciinih lel kaa fanah amiituk yinin.

³¹ Amaa geddadde lel kaa katattaynit, “Mudarris, bet haye” arhxuk kaa afishak yinin.

³² Usuk laakin: “Atin sodhdhan folo beetaya liyo” akko yerhxe.

³³ Amaa gedda, katattaynit: “Beetam akah baaheti yaneho?” sittiyak yerhxin.

³⁴ Yeesus: “Yi folo yi fareh yane tiyahi farhi abaanam kee kaa ciyyo yaskimiliinim kinni.

³⁵ ‘Affara alsi yane, sarrah lel orba tamiite’ tarhxiinih makiho? Ubula, sinni intit fakteenih dhageg orobo caddoweh yaneya ubula, sinak arhxe.

³⁶ Yizriye tiya kee orbisha tiya inkoh inkidde xedenoona ciloh, orbishati ishi casbe kabbaatak kee umman geedit aniinah daro askattuk yane.

³⁷ Amaye lel: ‘Wuliti yazriye, wuliti lel orbisha’ tarhxe marhxo rumma tibbirheh tanemhi sabbatah kinni.

³⁸ Atin adde xawalinnixitiinim orbishshoona sin dhirhiye. Aki mari xawaleenih yanin, atin lel ten xawaladde orobteenih tanin” akko yerhxe.

³⁹ “Anu abem kinam inkoh yoh warishe” tarhxe numat shaahadah sabbatah lel mango Samaariyaati xiyaw kayyah yeemenin.

⁴⁰ Amaa Samaariyaati xiyaw kayyalle yemeetiinih, tenlih sugo kaa esseren, usuk lel amalle lamma lellec tenlih suge.

⁴¹ Kaa waanih sabbatah mango mari yeemenin.

⁴² Amaa numak lel: “Atu nok terhxemhi sabbatah bisa maki neemenem, ninneh noobbemhi sabbatah kinni, rummah lel tati caalamti Gargeereena kinam naarhige” akko yerhxin.

⁴³ Lamma lellecik sarrah Galiila fanah yedee.

⁴⁴ (Amayim lel ishi dik hi daafolle nabii xishma malem Yeesus isheh yimmiskireh yinemhi sabbatah kinni.)

⁴⁵ Amaymih lel Galiilalle yemeete gedda, usuk cidih inkoh Yerusaalemille abeh yinem yublinyaako Galiilaati xiyaw kaa kabbaaten. Usun gantah amaa cidih yedeynih yinin.

Yeesus nugus nabarahi barha urusa

⁴⁶ Malammih lel, amaa layeko wayni alle abe Galiilaati Qaanalle yemeete. Kafarnaxuumulle lel wuli barhi akko laxuute nugus nabara yine.

⁴⁷ Ta xiyawti Yeesus Yahuudiyaako Galiilalle yemeeteh yinem yoobbe gedda, kaa barhi rabit af gufeh yinemhi sabbatah, kaalle yemeeteyaako oobeh kaa barha akah uruso kaa essere.

⁴⁸ Amaymih Yeesus: “Ishaarar kee bexsishsham able wayteenimko taamanoona makitiini” akko yerhxe.

⁴⁹ Amaa nugus nabara: “Maddara, yi barhi rabekkah guballe ob” akko yerhxe.

⁵⁰ Yeesus: “Aduu, ku barhi maro kinnik” akko yerhxe. Amaa xiyawti Yeesus akko yerhxe waanitta yeemeneh ishi araxalle yedee.

⁵¹ Usuk guballe oobak lel kaa garuuza akah garaynih kaa barhi ashshuk yinem akah warishen.

⁵² Sarrah awlih saacadde yashsho erherhishem ten essere. Usun lel: “Kumal kasit saaca inikih lacna akah xabto erherhishshe” akko yerhxin.

⁵³ Amaa abba lel Yeesus: “Ku barhi maro kinni” adde akko yerhxe saaca kuuk tinem yeerhege. Usuk lel isheh yeemene, kaa dik yakkeedo amay balih.

⁵⁴ Tatiya lel kado Yeesus Yahuudiyaako Galiila fanah aduuk abe malammit ishaara kuuk tine.