Yohannis 3 - Saaho Cusub Cahde

Malammih taabakoona sinalle tane

¹ Kado, wuli Yahuud reezanto kin Niqhodiimos akko yarhxin Faarisiiti yine.

² Ta xiyawti bar Yeesusulle yemeeteh: “Mudarris, atu abak tanito ishaarar Yalli aalih yane tiyaako beexinti abo mirhiicamhi sabbatah, atu Yallaako yemeete mudarris kitom naarhige” akko yerhxe.

³ Yeesus lel: “Rummah, rummah malammih aabukinnixeti, Yallih nigsinna yablo mirhiicam kok arhxiyuk ane” yerhxeh alle yedebbe.

⁴ Niqhodiimos: “Naba xiyawti aaginah yaabako dhiica? Malammit gedda ishi inah garbadde orobeh yaabako dhiica?” akko yerhxe.

⁵ Yeesus: “Rummah, rummah, laye kee Ufayeko aabukinnixeti Yallih nigsinnadde orobo mirhiicam kok arhxiyuk ane.

⁶ Amayim lel, xazooko yooboketi xazo kinni, Ufayeko yooboketi lel ufaye kinni.

⁷ ‘Malammih taabako kolle tane’ kok erhxemih mibexsiitin.

⁸ Xaaxatti isheh alle farhinnan gabolle kinni xaaxaysham, kaa andhax lel taabbe. Awlaako yamiitem, awlalle lel yadiyem laakin mitaarhige. Ufayeko aabukinnantii lel amayim balih kinni” yerhxeh alle yedebbe.

⁹ Niqhodiimos lel: “Tayim aaginah takko dhicta?” akko yerhxe.

¹⁰ Yeesus: “Atu Israa-eel mudarris kito hanuk tayim kodde moobta?

¹¹ Rummah, rummah, nanu naarhigemih waanishnam kok arhxiyuk ane, nubleh nanemih lel nashhide, ni shahaada lel mikabbattaana.

¹² Baarhootim sinah warishe hanuk akko aamine waytenya, carshim sinah warisha gedda aaginah taaminiini?”

¹³ Carsheeko oobe, Xiyawti Barhaako bextih, carshelle korteh tanem male.

¹⁴ Moosa zibolle caroora akah takareeka balih, Xiyawti Barhi lel takarimo kinni.

¹⁵ Amayim lel kayyah aamininnanti umman geedit aniina yaallo ciloh kinni.

Yalli caalam mangum yikxine

¹⁶ “Yalli caalam mangum yikxinemhi sabbatah, kayyah aamininnanti yalayemko, umman geedit aniina geyo ciloh, inkettak le ishi Barha yoxoye.

¹⁷ Yalli ishi Barha dhirhiyem, caalam kaa araxah gargeerimto ciloh kibah, caalam yafrado ciloh maki.

¹⁸ Kayyah aamininnanti miyamfirrideeki, kayyah aamininnixeti laakin inketta kin Yallih Barhahi migacalle aaminekkah yanemhi sabbatah mece geddaako yimfirrideh yane.

¹⁹ Firdi lel tatiya kinni: ifi caalamalle yemeeteh yane, xiyaw lel ten abitto umaani kinamhi sabbatah ifi idhdhah dite yikxinin.

²⁰ Umaani abinnanti ifo niciba, kaa umaani akko tamidhdhigemko lel ifolle miyamiite.

²¹ Rumma kinam abinnanti laakin, Yallih araxah tekkemhi sabbatah, kaa abitto akah tamballaw ciloh ifolle yamiite” yerhxeh alle yedebbe.

²² Taymik leddelle, Yeesus ishi katattaynitlih Yahuudiyaati barrelle yedeeyaako amalle tenlih defeyeh aythimmiqhuk yine.

²³ Yohannis yakkeedo mango laye amalle tinemhi sabbatah Salim agaaga kin Enoonulle aythimmiqhuk yine. Xiyaw lel amiituk yinthimmiqhin.

²⁴ (Yohannis lel amxibbishekkah yine).

²⁵ Kado lel Yohannis katattaynitko garo kee wuli Yahuuddi fanadde thahaarat zacabah zagaxa ugutte.

²⁶ Yohannisille yemeetiinih lel: “Mudarris, Yordaanos tabsolle kottaalih yineti, tamaa atu akah tishhideya, ubul, aythimmiqhuk yane. Xiyaw lel inkoh kaa fanah aduuk yanin” akko yerhxin.

²⁷ Yohannis lel: “Xiyawti carsheeko akah amxawwe waytemko, walaa inkim kabbaato mirhiica.

²⁸ ‘Anu Masiix makiyo, kaa nifidde laakin farritimeh aniyo’ erhxemih atin sinneh yolle tashhadoona dhictan.

²⁹ Cibna leti marcawwi kinni. Marcawwit carki, daw-yarhxeyaako kaa yaabbeya lel marcawwit dhawalle mangum xedena. Amaydo, ta yi xeden kado yikmileh yane.

³⁰ Usuk feero alle tane, anu lel anqaso yolle tane.

³¹ Aganaako yamiiteti umman tiyaako agana kinni. Baarhottii baarhottiya kinni, baarhootim lel waanisha. Carsheeko yamiiteti umman tiyaako agana kinni.

³² Usuk yublem kee yoobbemille yashhide, walaa inketti laakin kaa shahaada mikabbatinna.

³³ Kaa shahaada kabbaatinnanti lel tayim yaxtume, amaa Yalli lel rumma kinni.

³⁴ Ufaye qiyaas maleh yaxayemhi sabbatah Yalli fareti Yallih waani waanisha.

³⁵ Abba Barha kixina, ummannim lel kaa gabadde hayeh yane.

³⁶ Barhah aamininnanti umman geedit aniina leya, Barha aabbinnixeti, aniina yablo maki, Yallih kura lel kaalih marta” yerhxeh alle yedebbe.