Yohannis 21 - Saaho Cusub Cahde

Yeesus malxina katattaynah yambulluwe

¹ Tayimko sarrah Yeesus, Tiberiyasti igilhi gimamalle katattaynit ishe yuybulluwe. Taginah lel kuuk yine.

² Simcoon Bithroos, Toomaas (Ganga akko yarhxinya), Galiilaati Qaanahi Natnaa-eel, Zibdit barha, aki kaa katattaynitko lamma inkidde yinin.

³ Simcoon Bithroos: “Anu caasat gafafah adiyuk aniyo” akko yerhxe. Usun lel: “Nanu lel kottaalih nadaw kino” akko yerhxin. Yewciinih lel, jalbadde koren, amaa bar laakin inkim mabbarhinnooni.

⁴ Baarho maaxak, Yeesus badti gimamalle daw-yerhxe; amaa katattaynit laakin Yeesus kinam maarhaginnooni.

⁵ Yeesus: “Cindhaamo, caasah litiinim leho?” akko yerhxe. Usun lel: “Maale” akko yerhxin.

⁶ Usuk: “Dagum geytoona kinni, jalbaako mizgi hayteenih intile cida” akko yerhxe. Amaymih amaa intile ciden, caasat mangahi sabbatah lel amaa intile hiriigoona taanen.

⁷ Amaa gedda, amaa Yeesus kixin katattayni Bithroosuk: “Tati Maddara kinni” akko yerhxe. Simcoon Bithroos, amaati Maddara kinam yeerhege gedda, yashtaqhalo yeyyeeceh yine bukat sareena ishelle hayeyaako, badadde tire.

⁸ Aki katattaynit lel badti gimamko bool mitrotiya takkem bisa mirix-yerhxiinih yiniinimhi sabbatah, caasaako temmeege intile gototeenih jalbadde yemeetin.

⁹ Baarholle yewciinik sarrah lel caasa bukalle akko tine faxamle gira kee kinnos yublin.

¹⁰ Yeesus: “Tamaa tibbirhiinih tanin caasaako dagum akko baha” akko yerhxe.

¹¹ Amaymih Simcoon Bithroos jalbadde koreyaako, naba caasaako bool kee kontom kee adox takkeyaako temmeege intile gototeh gimamalle yeyyeece. Amaa caasa manguk tine hanuk lel amaa intile micandhiirho.

¹² Yeesus: “Amowantaaki uqhrusa” akko yerhxe. Kado, amaa katattaynitko walaa inketti: “Miyatto kito?” akko marhxinna. Maddara kuuk yinem yeerhegin.

¹³ Yeesus yemeeteh folo yibbirheyaako akah yoxoye, caasa amayim balih.

¹⁴ Kado tayim lel Yeesus rabaako ugutek sarrah katattaynitih yumbulluwem maddaxit gedda kinni.

Yeesus kee Bithroos

¹⁵ Qurse bakeenik sarrah Yeesus Simcoon Bithroosuk: “Simcoon, Yohannis barha, ta xiyawko ziyaada yi kixinto?” akko yerhxe. Usuk lel: “Yoo, Maddara; ku kixiniyom atu taarhige” akko yerhxe. Usuk lel: “Yi leemaamu bettish” akko yerhxe.

¹⁶ Malammit gedda lel: “Simcoon, Yohannis barha, yi kixinto?” akko yerhxe. Usuk lel: “Yoo, Maddara; ku kixiniyom atu taarhige” akko yerhxe. Usuk lel: “Yi ciido baclayish” akko yerhxe.

¹⁷ Maddaxit gedda lel: “Simcoon, Yohannis barha, yi kixinto?” akko yerhxe. Maddaxit gedda, “Yi kixinto?” yerhxeh kaa esseremhi sabbatah Bithroosudde adde tossoobbeyaako: “Maddara, atu ummannim taarhige; ku kixiniyom lel taarhige” akko yerhxe. Yeesus: “Yi ciido bettish” akko yerhxe.

¹⁸ Cindhih anituk, isheh sarittah, isheh fadhdhekke fanah aduuk tinito, baarroyta gedda laakin, ishi gabub tayfiddigeh aketti ku sarishayaako ku yooqhoceh atu tadawo farhinnixitolle ku beyo kinam, rummah rummah kok arhxiyuk ane.

¹⁹ Yeesus tayim yerhxem, Simcoon aaginale rabah Yalla yaynabo kinam ishaarisho ciloh kinni. Tayim yerhxemko sarrah lel: “Yi kataa” akko yerhxe.

Yeesus kee Yeesus kixin katattayna

²⁰ Bithroos caazalle kulux-yerhxe gedda, amaa Yeesus kixin katattayni, tamaa diraralle kaa agaagalle cikkishiteyaako: “Maddara, miyatto kinni ku yasxaw leti?” arhxuk yineya, tenadde kataak yinem yuble.

²¹ Bithroos kayya yuble gedda Yeesusuk: “Maddara, ta xiyawti aagina kinni?” akko yerhxe.

²² Yeesus: “Anu amiitem fanah usuk sugam yi farhi yekkemko, atu aa macal lito? Atu yi kataa!” akko yerhxe.

²³ Katattayni rabo makinamhi wari lel saculti fanadde faax-yerhxe. Yeesus rabo maki akko marhxinna, laakin: “Anu amiitem fanah usuk sugam yi farhi yekkemko, atu aa macal lito?” kinni akko yerhxem.

²⁴ Tayimhi shaahid kinam kee tayim tuktubem ta katattayna yekkeh, kaa shahaada rumma kinam naarhige.

²⁵ Kado Yeesus abemko aki mangum tane. Tayim inkoh tankuttebeedo, amayim alle tunkuttube kitob, ta caalam isheh tabbarho dhiice mirhaarhoh yolle higgida.