Yohannis 2 - Saaho Cusub Cahde

Qaanalle tekke marca

¹ Maddaxit lellec, Galiilaati Qaanalle marca tekke, Yeesus ina yakkeedo amalle tine.

² Yeesus yakkeedo ishe kee ishi katattaynitlih amaa marcalle yimciddimeh yine.

³ Wayni akko bakitte gedda lel Yeesus ina: “Wayni malooni maka” akko terhxe.

⁴ Yeesus lel: “Te numa, yotta kee kotta ayim adde lino? Yi saaca kaddih gufteh mitane” akko yerhxe.

⁵ Kaa ina amaa khaddamtik: “ Usuk sinak arhxinnannim aba” akko terhxe.

⁶ Kado, amalle Yahuud akko yaththeeherin lixa layet citro dhayittiya tine. Babbarhi tiya lel boxortomonko, bool kee lamaatanna litrotiya akko tabbirhem kuuk yine.

⁷ Yeesus amaa khaddamtek: “Tamaa citror layeh emega” akko yerhxe. Usun lel af fanah yemegin.

⁸ “Kado dagum akko culteenih amaa reedi abba fanah akko beya” akko yerhxe. Usun lel akko beyen.

⁹ Amaa layeko reedi abba akko dhacame gedda, wayni tekke, awlaako temeetem laakin maarhago, amaa laye culte khaddamte laakin yeerhegin. Reedi abba lel marcawwih deecimeh:

¹⁰ “Ummanti erherhih mece wayni kinni yaxayem, xiyaw meceetih xayittemko sarrah lel adda dago wayni yaxayin. Atu laakin kado fanah mece wayni raacishsheh sugte” akko yerhxe.

¹¹ Tatiya Yeesus ishaaraatko erherh tiya Galiilaati Qaanalle abeya tekkih kaa nabne tiyshidhdhige tiya kinni. Kaa katattaynit lel akah yeemenin.

¹² Tayimko sarrah, ishi ina, ishi sacul kee ishi katattaynitlih guballe Kafarnaxuumulle oobeh amalle lel dago lellec suge.

Yeesus maqhdas care yatsrige

¹³ Yahuud Faasigi kab-yerhxeh yinemhi sabbatah, Yeesus guballe Yerusaalem fanah oobe.

¹⁴ Maqhdas caredde lel becar, ciido kee xamaama aabixuk yine mara kee amalle defeyeh solaadi aybiddiluk yine mara geye.

¹⁵ Akutko khormaaj siraaxeh lel becar kee ciidoolih inkoh maqhdas careeko ten yeyyeece. Solaadi yaybiddile marih tacaarif akko xarheh lel ten thawlal akko yeydedebbe.

¹⁶ Amaa xamaama yaabixe marak lel: “Tayim mirix-isha. Yi abbah carek bicishrat makaano akko maabina” akko yerhxe.

¹⁷ Kaa katattaynit lel: “Ku carehi qeera yi bakto kinni” yarhxe kutuub yizzikkirin.

¹⁸ Amaymih Yahuud: “Tayim abaa tanitomuh aaginale ishaara ni tayballaw kito?” akko yerhxin.

¹⁹ Yeesus: “Ta macbad cida, anu lel adooxa lellecille xaf-isho kiyo” yerhxeh alle yedebbe.

²⁰ Amaymik sarrah Yahuud lel: “Ta macbad siraaximo marootom kee lix iggidiya beyeh yane, atu lel adooxa lellecille xaf-ishsho kito?” akko yerhxin.

²¹ Usuk laakin ishi nabsih macbad arhxuk yinem kinni.

²² Usuk rabaako ugute gedda lel kaa katattaynit tayim yerhxeh yinem yizzikkirinih Kutuubuh kee Yeesus waanisheh yine waanittah yeemenin.

Yeesus xiyawadde ayim tanem yaarhige

²³ Kado Yeesus Faasigi Cidih Yerusaalemille anuk, usuk abaa yine ishaarar yublinyaako mango mari kaa migacah yeemenin.

²⁴ Yeesus laakin ishi gabooko, xiyaw inkoh aarhiguk yinemhi sabbatah ten maamano.

²⁵ Yeesus laakin, xiyawadde tanem inkoh isheh aarhiguk yinemhi sabbatah, xiyaw zacabah walaa inkettahi shahaada kaa mifarhshiisho.