Yohannis 19 - Saaho Cusub Cahde

Yeesus masqalakke takaroona baahan

¹ Sarrah Bilaatos Yeesus beyeyaako akah kaa sabacaanaakah abe.

² Amaa caskar filci lel sawawwalen keenanko aben bor amokke akko hayenyaako diimayin sareena kaa sarishen.

³ Alle yemeetiinih lel: “Maaxiyo gee, Yahuud nuguso!” arhxuk sinni gabubuh akko safucak yinin.

⁴ Bilaatos lel malammih alle yewceh: “Ubula, walaa inki cagab adde migeyinniyom taarhagoona ciloh kayya sinalle ayyaacuk aniyo” akko yerhxe.

⁵ Amaymih Yeesus keenanti bor kee diimayin sareena sariteh irolle yewce. Bilaatos: “Taykinna ta xiyawti!” akko yerhxe.

⁶ Sheekhat manabottit kee amaa dhawrheenit kaa yublin gedda wac-yerhxinyaako: “Masqalakke kaa takar, masqalakke kaa takar” yerhxin. Bilaatos lel: “Anu cagab adde migeyinniyomhi sabbatah atin sinneh beyteenih sinneh masqalakke kaa takara” akko yerhxe.

⁷ Yahuud lel: “Nanu sercat lino, usuk Yallih Barha ishek abemhi sabbatah lel ni sercatalle rabo akah eedda” yerhxiinih alle yedebbin.

⁸ Bilaatos tayim yoobbe gedda inkinnah mangum mashshiite.

⁹ Usuk malammih ishi naba caredde orobeh Yeesusuk: “Atu awlaako kito?” akko yerhxe. Yeesus laakin alle maadabbinna.

¹⁰ Amaymih Bilaatos: “Yottaalih miwaanishsha? Anu ku dhirhiyo kee masqalakke ku takaro reeza liyom mitaarhige?” akko yerhxe.

¹¹ Yeesus: “Aganaako koh tomxowweh maarhige, yi bukalle inkinnah reeza taallo mirhicta. Amaydo, kottalle yi yiyrhibirheti naba zambih wanna kinni” yerhxeh alle yedebbe.

¹² Amaa waqhtek sarrah Bilaatos kaa dhirhiyo farhak yine, Yahuud laakin wac-yerhxiinih: “Ta xiyawto dhirhiitemko, atu Roomaati naba nugus hi saaxib makito. Nugus ishek abinnanti lel Roomaati naba nugus-hi didde kinni” yerhxin.

¹³ Bilaatos lel tayim yoobbe gedda, Yeesus irolle yeyyeeceh “Dhayitti dandas”, hido lel Cibriyah “Gabbata” akko yarhxin daaniyat kurselle defeye.

¹⁴ Kado lel amaa maaxi Faasigi Anqaraarabti lellec kuuk yine. Lellecti-abrha takkem lel kuuk tine. Yahuuduk lel: “Ubula Sinni Nugus!” akko yerhxe.

¹⁵ Wac-yerhxiinih: “Asac kaa ish, asac kaa ish, masqalak kaa takar!” yerhxin. Bilaatos lel: “Sin nugus masqalak takaro?” akko yerhxe. Sheekhat manabottit: “Roomaati naba nugusuh kibah nugus malino” akko yerhxin.

¹⁶ Amaymih lel masqalak kaa takaroona akah yoxoye. Amaymih Yeesus beyeenih,

Masqalakkehi takarimnan

¹⁷ usuk lel yewceyaako, ishi masqal yooqhoceh, “Amot xanxanta makaano”, Cibriyah lel “Golgota” akko yarhxin makaanolle yedee.

¹⁸ Amalle aki lamma xiyawto, lamma gabooko eelih hayenih, Yeesus fanadde akko hayeenih masqalakke kaa takaren.

¹⁹ Bilaatos lel wuli kutuub yuktubeh amaa masqalakke haye. “Naazret Yeesus, Yahuud Nugus” yarhxiinim lel kuuk yine.

²⁰ Amaa Yeesus masqalak alle takarime makaano daafot agaaga kuuk tinemhi sabbatah, amaa kutuub mango Yahuud yiqhriin. Amaa kutuub lel Cibriya, Laatiin kee Giriikih yunkuttubeh yine.

²¹ Amaymih, amaa sheekhat manabottit kee Yahuud Bilaatosuk: “Ta xiyawti, ‘Anu Yahuud Nugus kiyo’ yerhxem kibah ‘Yahuud Nugus’ terhxeh maktabin” akko yerhxin.

²² Bilaatos lel: “Uktubem uktubeh aniyo” akko yerhxe.

²³ Amaa caskar Yeesus masqalak takareenimko sarrah, kaa sara beyeenih affaralle xaziilenyaako, umman caskarti babbarhi tiya akko abite, amaa kaa qamish lel amaye balih. Amaa qamish lel aganaako guba fanah lemille siraaximteh tinenkah tumurrufeh mitine.

²⁴ Amaymih: “Candhishe waynowaantaaki miitiya takkemih cija alle cidnowaa” sittiyak yerhxin. Tayim lel amaa: “Yi sara sinneh xazziiliteenih, yi sareenalle lel cija alle ciden” yarhxe Kutuub yakmalo tekkem kinni. Amaymih amaa caskar tayim aben.

²⁵ Kaa ina kee kaa inah sacla, Koloopasti numa kin Maryam kee Magdalat Maryam amaa Yeesus masqalhi agaagalle daw-yerhxiinih yinin.

²⁶ Yeesus kaa ina kee usuk kixin katattayna kaa agaagalle daw-yerhxiinih ten yuble gedda, ishi inak: “Te numa, taykoo ku barhi!” akko yerhxe.

²⁷ Sarrah amaa katattaynak: “Taykinna ku ina!” akko yerhxe. Amaa saacaako sarrah amaa katattayni ishi careh beyeh isheelih tee sigishe.

Yeesus raba

²⁸ Amaymik sarrah, Yeesus, ummannim bakittem yeerhegeyaako, Kutuub yaskamalo: “Bakhaarite” yerhxe.

²⁹ Amalle cur-tarhxe wayniiko temmeege citro tine. Amaa cur-tarhxe wayni wuli tababtot xakak hayen thuththah afadde akko yibbirhin.

³⁰ Yeesus amaa cur-tarhxe wayniiko dhacame gedda: “Bakitte!” yerhxeyaako, amo cunuunuseh kaa wafa tewce.

Yeesus masangaleeko mudduta

³¹ Anqaraarabti lellec kuuk yineyaako, (Sambat lel naba lellec kuuk yinemhi sabbatah), amaa rashshit Sambatah amaa masqalakke raacamko, lakuk akko yegeedeliinih oobishoona Yahuud Bilaatos dhaacimen.

³² Amaa caskar yemeetiinih erherh tiyaako lakuk akko yigdilin, amaa kaalih masqalakke takarimeh yine tiyaako lel amaye balih.

³³ Yeesusulle yemeetiinih mece geddaako rabeh yinem yublin gedda, lakuk akko magdalinnooni.

³⁴ Wuli caskarti laakin maxaarhoh abeh masangaleeko kaa mudeh, akkanih biilo kee laye akko tewce.

³⁵ Amaa yubleti lel yishhide, kaa shahaada rumma kinni. Atin gantah taamanoona ciloh, usuk rumma waanishak yanem lel yaarhige.

³⁶ Tayim lel: “Kaa lafufko walaa inketta taggadalo maki” yarhxe Kutuub yakmalo tekkem kinni.

³⁷ “Kaa muda mari kaa yabloona kinon” yarhxe aki Kutuub lel yane.

Yeesus macaga

³⁸ Tayimko sarrah, Arimatayaati Yoosuf, Yahuudko mashshiiteh suctodde Yeesus katattayna kuuk yineya, Yeesus rashsha beyo Bilaatos dhaacime. Bilaatos lel izne akah yoxoye. Amaymih yemeeteh kaa rashsha beye.

³⁹ Ukuum-yerhxeh bar Yeesusulle yemeeteh yine Niqhodiimos lel tengeegelle karbe kee cororsimaako soddom kee adox kiilotiya takkem yibbirheh yemeete.

⁴⁰ Amaymih, Yeesus rashsha beyeenih tamaa Yahuud macagih labcad balih maknazadde qamamlih yiknizin.

⁴¹ Kado, usuk masqalakke alle takarimeh yinekkeh agaagalle jardiin yine, amaa jardiinidde lel tayek basolle walaa inketti adde amuccuginnixe cusub qabri yine.

⁴² Amaa qabri dhayelle yineya kee, Yahuud Anqaraarabti lellec lel adde orobemhi sabbatah, Yeesus amadde yoocogin.