Yohannis 17 - Saaho Cusub Cahde

Yeesus ishi katattaynitih dhaaco aba

¹ Yeesus tayim yerhxemko sarrah, intit agana caranadde kulux-isheh: “Abba, amaa saaca gufteh tane, ishi Barha eyneb ku Barhi ku yaynabooki.

² Tamaa atu akah toxoyeh tanito marah umman geedit aniina yaxaw ciloh, umbuka xiyawhi bukalle reeza akah toxoyeh tanito.

³ Umman geedit aniina tatiya kinni: rummaahit inki Yalla atu bisa kitom kee atu farteh tanito Yeesus Masiix yaarhigiinim.

⁴ Atu abo yolle toxoye ciyyo abaysheyaako, baarholle ku eynebe.

⁵ Abba, kado lel, tamaa caalam anniye waak kottaalih liyuk ine nabentah isheelih yi eyneb.

⁶ Ta caalamko yoh toxoye marah ku migac akah ishrixeh aniyo. Usun ku mara kuuk yinin, atu yottah toxoye, usun lel ku waanitta dhawrhen.

⁷ Kado atu inkoh yoh toxoyeh tanitom, kottaako kinam yaarhigin.

⁸ Atu yoh toxoye waani akah oxoyeh aniyo, usun lel kabbaateenih yanin. Anu kottaako emeetem lel rummah yeerhegiinih yanin. Atu yi fartemih lel yeemeniinih yanin.

⁹ Anu dhaaco akah abak aniyo. Anu dhaaco akah abak aniyom caalam makiiki, ku mara kinoonimhi sabbatah tamaa atu yoh toxoye marah kinni.

¹⁰ Yim inkoh kum kinni, kum lel yim kinni. Anu lel tenadde enebeh aniyo.

¹¹ Anu kamboh caalamalle maaniyo, usun laakin caalamalle yanin. Anu ku fanah amiituk aniyo. Quddus kin Abba, tamaa nanu tiya akah kinookah tiya yakkoona ciloh, tamaa yoh toxoyeh tanito ishi migacalle ten dhawurh.

¹² Anu tenlih aniyuk, yoh toxoyeh tanito ku migacalle ten dhawrhe. Ten dhawrheh lel Kutuub yakmalo ciloh amaa liyaati barhaako bextih walaa inketti akko maalayinna.

¹³ Kado laakin anu ku fanah amiituk aniyo. Yi xeden tenadde yakmalo ciloh lel tayim caalamalle aniyuk waanishak aniyo.

¹⁴ Anu ku waanitta akah oxoyeh aniyo. Anu ta caalamko akah makiyooka balih, usun ta caalamko makinoonimhi sabbatah lel caalam ten tincibe.

¹⁵ Atu uma tiyaako ten dhawudhdho kibah, ta caalamko ten tayyaaco ku mirhaacima.

¹⁶ Anu ta caalamko akah makiyooka balih, usun ta caalamko makinooni.

¹⁷ Ku waanitta rumma kinnik, rummah ten iyqiddis.

¹⁸ Atu caalamalle akah yi farteekah, caalamalle ten fareh aniyo.

¹⁹ Usun rummadde yanqaddasoona ciloh tenah arhxiyuk inne aqhiddise.

²⁰ Taymih bisa makiiki ku dhaacimam, ten waanittah yottah yaamano le marah gantah kinni.

²¹ Amayim lel usun inkoh inketta yakkoona, atu Abbak yottadde akah tanitookah, anu lel kottadde, usun lel nottadde yakkoona, atu yotta farteh tanitom caalam taamano ciloh kinni.

²² Nanu gantah tiya akah kinooka balih usun tiya yakkoona ciloh, atu yoh toxoye nabne akah oxoyeh aniyo.

²³ Tayim lel anu tenadde, atu lel yottadde akah tanitookah, usun meceetih inketta yakkoona kee, atu yi farteh tanitom kee tamaa yotta akah tikxineekah ten tikxineh tanitom ta caalam taarhago ciloh kinni.

²⁴ Abba, ta caalam dhishshiimekkah yi tikxineh tanitomhi sabbatah, yoh toxoyeh tanito mari tamaa yoh toxoyeh tanito nabne yabloona ciloh anu alle aniyolle yannawna farhak aniyo.

²⁵ Xaqqi-wanna kin Abbaw, caalam ku aarhige waytemih anu ku eerhegeh aniyo. Ta mari lel atu yi fartem yeerhegiinih yanin.

²⁶ Tamaa akah yi tikxineh tanito kaxani tenadde yakko, anu lel tenadde akko ciloh, ku migac ten iyshidhdhigeh aniyo, ten ayshadhdhago lel kiyo” yerhxe.