Yohannis 16 - Saaho Cusub Cahde

¹ Gaba taxaynimko ciloh kinni tayim inkoh sinak arhxiyuk anem.

² Sunagoogitko sin hadanoona kinon. Inkinnah, sin agdifinnanti Yalla akhdumuk yanem ishe adde yakkalo le saaca amiituk tane.

³ Tayim aboona loonim lel Abba hido yotta yeerhegiinih miyaniinimhi sabbatah kinni.

⁴ Tayim sinak erhxem lel ten saaca gufta gedda anu tayim sinah warishem xunsussoona ciloh kinni. Tayim ookomeh akah sinah warishe wayem anu inneh sinlih iniyomhi sabbatah kinni.

Quddus kin Ufayih ciyyo

⁵ Kado laakin tamaa yi fare kayya fanah adiyuk aniyo, lel sinko walaa inketti: ‘Awlalle aduuk tanito?’ yerhxeh yi messera.

⁶ Laakin anu tayim sinah warishemhi sabbatah xazanah sin afcaado temmeege.

⁷ Yakko kibah, anu adiye wayemko, Xattiimeeni sinah yamaato makinamhi sabbatah, anu adiyem sin nafaaca kinam rummah sinak arhxiyuk ane. Anu edeemko laakin, kayya sinah dhirhiyo kiyo.

⁸ Usuk yamiite gedda, zambe, xaqqe kee firdi zacabah ta caalam yashshamano kinni.

⁹ Zambi zacabah, yottah miyaaminiinimhi sabbatah kinni.

¹⁰ Xaqqi zacabah, anu yi Abba fanah adiyemhi sabbatah, kamboh yi tabloona makitiini.

¹¹ Firdi zacabah lel, ta caalamhi reezanti qitscatah yimfirridemhi sabbatah kinni.

¹² Anu sinah warisha mangum kaddih liyo, atin laakin kado curtoona mirhictaana.

¹³ Rummaahit Ufayi yamiite gedda laakin, yaabbem waanishankah ishi amooko miwaanishamhi sabbatah, umbuka rummalle sin santisho kinni. Tamaato lem lel sinah warisho kinni.

¹⁴ Usuk yottaako beyeh sinah warisho kinamhi sabbatah, yi yaynabo kinni.

¹⁵ Yi Abbahim akkinnannim inkoh yim kinni, amaymih kinni lel tamaa yim beyeyaako sinah warisho kinni erhxem.

Sin xazan xedenille yambaddalo kinni

¹⁶ Dago waqhteh kibah, kamboh yi tabloona makitiini; malammih lel dago waqhtek sarrah yi tabloona kitin” akko yerhxe.

¹⁷ Kaa katattaynitko gari sinne-sinneh: “Aymih kinni tati, ‘Anu Abba fanah adiyuk anemhi sabbatah, dago waqhteh kibah, kamboh yi tabloona makitiini; malammih lel dago waqhtek sarrah yi tabloona kitin’ nok yarhxem?” sittak yerhxin.

¹⁸ Amaymih: “‘Dago waqhteh’ yarhxem ayim yarhxo yah kinni? Ayimhi sabbatah waanishak yanem minaarhige” arhxuk yinin.

¹⁹ Yeesus kaa esseroona farhak yaniinim yeerhegeh: “‘Dago waqhteh kibah, kamboh yi tabloona makitiini; malammih lel dago waqhtek sarrah yi tabloona kitin’ erhxemhi macna kinni sinne esserak taniinim?

²⁰ Atin wectoona kee zertoona kitin, caalam laakin xedento kinam rummah, rummah, sinak arhxiyuk ane. Atin taxzanoona kitin, sin xazan laakin xedenille yambaddalo kinni.

²¹ Numa umulta gedda tee saaca guftemhi sabbatah tantseebebe. Zabalolle umla takke gedda laakin, xiyawti barhi ta caalamalle yoobokem tee xedenishshamhi sabbatah, ishi tsabaaba mitazikkire.

²² Amaydo, atin gantah kado waaxelta litin, anu laakin malammih sin ablo kiyo, sin afcaado lel xedento kinni. Sin xeden lel sinko beyati miyane.

²³ Amaa max yottaako walaa inkim essertoona makitiini. Yi migacalle esserinnannim Abba sinah yaxaw kinam rummah, rummah, sinak arhxiyuk ane.

²⁴ Kado fanah yi migacalle walaa inkim messeritiini. Sin xeden kaamil yakko ciloh, essera, sinah tamxawo kinni.

Anu caalam iscireh aniyo

²⁵ Tayim amol-beeh sinah warisheh aniyo. Abbat sabbatah caddoysheh kibah amol-beeh adde sinah warisho aalle waya saaca amiituk tane.

²⁶ Amaa maxadde yi migacalle essertoona kitin, anu lel sinah Abba essero kiyo sinak arhxo makiyo.

²⁷ Abba isheh sin kixina. Amayim lel atin yi tikxiniinih, anu Yallaako emeetemih teemeniinimhi sabbatah kinni.

²⁸ Anu Abbaako emeeteh ta caalamalle emeeteh aniyo, kado lel ta caalam xabeh Abba fanah adiyuk aniyo” akko yerhxe.

²⁹ Kaa katattaynit lel: “Kado amol-beeh makiiki caddoyishsheh waanishak tanito!

³⁰ Kado atu ummannim taarhigem naarhige, farhinnanti shakke kodde hayo lel mifarhshiisha, tayimhi sabbatah kinni lel atu Yallaako temeetemih neemenem” akko yerhxin.

³¹ Yeesus: “Kado teemeniini?

³² Taykinna, inkoh inkeekettah sinni careh faax adde tarhxiinih, yotta lel ulah adde yi xabtoona litin saaca amiituk tane, rummah lel mece geddaako temeeteh tane. Yakko kibah, Abba yottaalih yanemhi sabbatah anu ulah makiyo.

³³ Yottaalih salaam geytoona ciloh lel tayim sinah warisheh aniyo. Ta caalamalle cazaab yane, laakin aydukum-erhexa, anu ta caalam iscireh aniyo” yerhxeh alle yedebbe.