Yohannis 15 - Saaho Cusub Cahde

Anu rummaahit cinab xarha kiyo

¹ Anu rummaahit cinab xarha kiyo, Abba lel cinab dhageh baclaysheena kinni.

² Daro baahinnixe yi xakuk inkoh yagriceh asac-isha, daro baaha xakuk lel mango daro baaho ciloh meceetih qarcoysha.

³ Atin lel anu sinlih waanishe waanittah sabbatah mece geddaako qarcoyteenih tanin.

⁴ Atin yottadde siga, anu lel sinadde. Xak cinab xarhak anniye wayemko, daro akah baahe wayaaka balih, yottadde sigteenih akke wayemko atin gantah bahtoona mirhictaana.

⁵ Anu cinab xarha kiyo; atin lel xakuk kitin. Yottaako bextih walaa inkim abtoona mirhictaanamhi sabbatah, yottadde sigak anu adde siga tiya kinni, mango daro baahati.

⁶ Yottadde siginnixeti amaa xak balih amulalle cidditah kafa. Amaa xakuk lel yakatteh, giradde cidditah xarara.

⁷ Yottadde sigteenimko, yi waani lel sinadde sigtemko, farhinnannim dhaacittan gedda, amayim sinah takko kinni.

⁸ Mango daro bahteenimko, yi Abba taymih yanabe, atin lel yi katattaynit kitiinim tamidhdhigin.

⁹ Abba akah yi yikxineh yaneekah, anu sin ikxineh aniyo. Yi kaxanodde siga.

¹⁰ Yi amre dhawudhdheenimko, anu yi Abbah amre dhawrheh kaa kaxanodde akah sigeh aniyookah, yi kaxanodde sigtoona kitin.

¹¹ Tayim sinlih waanisheh aniyom, yi xeden sinadde yannaw kee sin xeden kaamil yakko ciloh kinni.

¹² Yi amri tatiya kinni: anu akah sin ikxineh aniyookah sitta ikxina.

¹³ Xiyawti ishi soxobah arhxuk ishi aniina tillaabisham, tayko naba kaxani miyane.

¹⁴ Anu sin aamirem abteenimko, atin yi soxoba kitin.

¹⁵ Garuzzi kaa maddari abam miyaarhigemhi sabbatah, kamboh garuuza sinak maarhxe. Anu inni Abbaako oobbeh aniyom inkoh sin iyshidhdhigeh aniyomhi sabbatah, laakin yi soxoba sinak erhxeh aniyo.

¹⁶ Atin yi midooritiini. Anu laakin tedeynih tayfarawna, sin fire lel marto kinni, atin yi migacalle Abba dhaacitinnannim lel sinah yaxaw ciloh sin dooreh sin dhirhiyeh aniyo.

¹⁷ Tayim sin aamiriyuk ane: sittiya ikxina.

Caalamti nacabo

¹⁸ Caalam sin tincibemko, sinko basolle yotta tincibeh tanem irhiga.

¹⁹ Atin caalamko takkindo, ta caalam ishim balih sin akxine dhadhdhe; laakin anu ta caalamko sin dooreh, atin lel ta caalamko makitiinimhi sabbatah caalam sin niciba.

²⁰ Anu sinak erhxe waanitta izzikkira: ‘Garuzzi ishi maddaraako minaba.’ Yotta hadaneenimko, sina gantah hadanoona kinon. Yi waani dhawrheenimko, sin waani gantah dhawrhoona kinon.

²¹ Yotta fare tiya miyaarhigiinimhi sabbatah, yi migac hi sabbatah ummannim sinak aboona kinon.

²² Emeeteh tenlih waanisheh ineh akke wayaado, zambi-wannun akke mirhaarhinnooni, kado laakin sinni zambeh takale akah malooni.

²³ Yotta ancibinnanti yi Abba gantah niciba.

²⁴ Walaa inketti abinnixe ciyyo ten fanadde abeh anniye wayaado, zambe aalle mirhaarhinnooni, kado laakin yubliinih yotta kee yi Abba inkoh yincibiinih yanin.

²⁵ Ten sercatalle: ‘Sabab hinnim yi yincibin’ yarhxiinim tunkuttubeya takmalo alle tane.

²⁶ Laakin tamaa Xattiimeeni anu Abbaako faro liyo, rummaahit Ufayi, Abbaako yawceya yamiite gedda, yi zacabah yashhado kinni.

²⁷ Atin erherhaako yottaalih tiniinimhi sabbatah, atin gantah tashhadoona kitin.