Yohannis 14 - Saaho Cusub Cahde

Anu arax, rumma kee aniina kiyo

¹ Sin afcaado amribbishe wayto. Yallah imina, yottah lel imina.

² Yi Abbah caredde mango carwa tane. Amayim anniye wayaado, cara sinah asqarrabo adiyuk aniyo sinak arhxe dhaarhe?

³ Anu edeeh cara sinah isqirribemko, anu alle aniyolle atin gantah tannawna ciloh malammih emeeteh innelle sin beyo kiyo.

⁴ Anu alle adiyuk aniyo arax lel taarhigin” akko yerhxe.

⁵ Toomaas lel: “Maddara, atu alle aduuk tanitokke minaarhige. Nanu arax aaginah naarhige?” akko yerhxe.

⁶ Yeesus: “Anu arax, rumma kee aniina kiyo. Yi araxah akke wayemko Abballe yamiiteti miyane.

⁷ Yotta teerhegeh tineh tekkemko, yi Abba gantah teerhegeh tannaw kito. Kadooko sarrah kaa teerhegiinih kaa tubliinih tanin” akko yerhxe.

⁸ Filibboos lel: “Maddara, Abba ni uybulluwaaki, amayim ni dhiica” akko yerhxe.

⁹ Yeesus: “Filibboos, tayidhdha mangum sinlih suge hanuk, kaddih yi mitaarhige? Yotta yubleh anniinnanti Abba yubleh yane. Aaginah: ‘Abba ni uybulluu’ tarhxe?

¹⁰ Anu inni Abbadde aniyom, Abba lel yottadde yanemih mitaamine? Yottadde siga Abba kinni ishi ciyyo abtam kibah, ta anu sinak arhxe waani inni amooko waanisha waani maki.

¹¹ Anu Abbadde, Abba lel yottadde yanemih yi imina. Akke wayemko amaa ciyyoh yi imina.

¹² Anu Abba fanah adiyuk aniyomhi sabbatah, yottah aamininnanti anu aba ciyyo abo kinam, amayimko nabam gantah abo kinam rummah, rummah sinak arhxiyuk ane.

¹³ Abba Barhadde yanabo ciloh, yi migacalle dhaacitinnannim sinah abo kiyo.

¹⁴ Yi migacalle farhinnannim yi esserteenimko sinah abo kiyo.

Yeesus Quddus kin Ufayeh wacde saa

¹⁵ Yi tikxiniinimko, yi amre dhawudhdhoona kitin.

¹⁶ Anu Abba dhaacimo kiyo. Usuk lel umman gedda sinlih mara aki Xattiimeena sinah yaxaw kinni.

¹⁷ Amaa rummaahit Ufaye, caalam maballo, mitaarhigemhi sabbatah kabbatto mirhicta. Atin laakin sinlih sigah sinadde yakko kinamhi sabbatah, kaa taarhigin.

¹⁸ Xeewo balih sin mixaba, sinalle gaxo kiyo.

¹⁹ Dago waqhteh ta caalam yi tablo maki, atin laakin yi tabloona kitin. Anu aniyomhi sabbatah, atin lel tannawna kitin.

²⁰ Amaa lellecidde, anu yi Abbadde, atin yottadde, anu lel sinadde aniyom taarhagoona kitin.

²¹ Yotta kixinti, yi amrit yaalleh dhawrhinnan tiya kinni. Yotta kixinti, Abbah gantah yamkaxxano kinni, anu lel kaa akxano kee inne kaa ayshadhdhago kiyo” akko yerhxe.

²² Amaa Iskariyootko akkinnixe Yahuuda lel: “Maddara, caalamah akkekkah, notta ishe tayshadhdhago litom aymih kinni?” akko yerhxe.

²³ Yeesus: “Akkinnanti yi yikxinemko, yi waanitta dhawrho kinni. Yi Abba lel kaa yakxano kinni, kayyalle nemeeteh lel ninni care kaalih abinno kino.

²⁴ Yi akxininnixeti yi waani mirhawrha. Taabbin waani lel yim makiiki, tamaa yi fare yi Abbahim kinni.

²⁵ Anu sinlih aniyom fanah tayim sinlih waanisheh aniyo.

²⁶ Amaa Xattiimeeni, Quddus kin Ufayi Abba yi migacalle faro leya laakin, ummannim sin yaydaraso kee inkoh anu sinak erhxeh aniyom sin xunsuuso kinni.

²⁷ Salaam sinlih xaba, inni salaam lel sinah axaye. Ta caalam akah taxayeekah maki anu sinah axayem. Sin afcaado amribbishe wayto, mashshiite wayto.

²⁸ ‘Anu adiyuk aniyo, gaxo lel kiyo’ sinak arhxuk yi toobbin. Yi takxinindo, Abba yottaako nabamhi sabbatah, Abba fanah adiyuk aniyomuh xedene dhadhdhen.

²⁹ Takke gedda taamanoona ciloh, akkekkahko kado sinah warisheh aniyo.

³⁰ Ta caalamhi reezanti amiituk yanemhi sabbatah, anu mangum sinlih waanisho makiyo. Yi bukalle inki reeza maleya.

³¹ Anu laakin ta caalam anu Abba kixiniyom taarhago ciloh, Abba akah yi yeemereekah aba. Uguta, takkeeko nadawok hayyaanta.