Yohannis 13 - Saaho Cusub Cahde

Yeesus katattaynitti iba cakalisha

¹ Faasigi cidko basolle, Yeesus ta caalamko ishi Abba fanah adde yadiye saaca guftem yeerhege gedda, ta caalamalle tine kixina ishi mara, abayshima fanah yikxine.

² Addiriruk lel ibliis Simcoon barha kin Iskariyoot Yahuudaako kayya yasxaynim mece geddaakoh afcaadodde akko hayeh yine.

³ Yeesus lel Abba umbukaahim kaa gabadde akah hayem, usuk Yallaako yemeetem kee Yalla fanah aduuk yanem yeerhege.

⁴ Dirarko uguteh lel ishi natsala oobisheh wuli sareena yooqhoceh yikkitiye.

⁵ Sarrah laye wuli shaxanadde hayeh, amaa katattaynit hi iba wadisheyaako, amaa yikkitiyeh yine sareenah xishiye.

⁶ “Maddara, yi iba cakalishsho?” akko yerhxe Simcoon Bithroosulle gufe gedda.

⁷ Yeesus: “Anu abak anem kado mitaarhige, sarrah laakin taarhago kito” yerhxeh alle yedebbe.

⁸ Bithroos lel: “Yi iba caduruh cakalishsho makito” yerhxe. Yeesus: “Anu ku cakalishe wayemko, yottaalih gide malito” yerhxeh alle yedebbe.

⁹ Simcoon Bithroos lel: “Maddara, yi amo kee yi gabub gantah kibah, yi iba bisa makiiki” akko yerhxe.

¹⁰ Yeesus: “Cakaliteti inkoh qarce-le tiya kinamhi sabbatah, ibi wadooko beexin cakalso kaa mifarhshishsha. Atin qarce-le mara kitin, laakin inkoh makitiini” akko yerhxe.

¹¹ Tamaa kaa yasxaw le tiya aarhiguk yinemhi sabbatah kinni: “Inkoh qarce-lem makitiini” yerhxem.

¹² Ten iba cakalisheh, ishi natsala hashshiiteyaako ishi caralle gaxe gedda: “Ta sinah abeh aniyom teerhegiini?

¹³ ‘Mudarris, Maddara’ yok tarhxin, meceetih tanin, kiyom kinni.

¹⁴ Amaydo anu sin Maddara kee Mudarrisik sin iba akko cakalishaya, atin gantah iba sittah cakalishshoona sinalle tane.

¹⁵ Anu misaal sinah oxoyeh aniyomhi sabbatah, anu akah sinah abeh aniyookah abtoona sinalle tane.

¹⁶ Garuzzi ishi maddaraako minaba, luukti kaa fare tiyaako minabam rummah, rummah sinak arhxiyuk ane.

¹⁷ Tayim teerhegiinimko kee abteenimko, baraka-lem kitin.

¹⁸ Umman sinhi sabbatah waanishak maaniyo, miya dooreh aniyom aarhige. ‘Yi folo yottaalih beeteti yi diddeh ugute’ yarhxe Kutuub yakmalo kinni.

¹⁹ Tayim akkekkah, Anu Kayya kiyom taamanoona ciloh tayim kado sinak arhxiyuk ane.

²⁰ Anu farinnan tiya kabbaatinnanti, yotta kabbaata, yotta kabbaatinnanti lel yotta fare tiya kabbaatam rummah, rummah sinak arhxiyuk ane” akko yerhxe.

Sinko wuliti yi yayrhabarho kinni

²¹ Tayim yerhxemko sarrah, Yeesus ufayi adde yomroocodeh: “Rummah, rummah, sinko wuliti yi yasxaw kinam sinak arhxiyuk ane” yerhxeh yimmiskire.

²² Katattaynit lel miyatti zacabah waanishak yanem sorheenih sinne-sinnedde kulux-yerhxin.

²³ Yeesus kixin kaa katattaynitko wuliti Yeesus agaagalle thawlalle cikkishiteh beetak yine.

²⁴ Amaymih, Simcoon Bithroos Yeesus miyatti sabbatah waanishak yanem kaa essero akah yiymikniye.

²⁵ Amaa Yeesus agaagalle cikkishiteh yine katattayni lel Yeesusuk: “Maddara, miyatto kinni?” akko yerhxe.

²⁶ Yeesus: “Anu tekerisheyaako ta folottah dhacto akah axawo liyo tiya kinni” yerhxeh alle yedebbe. Sarrah amaa dhacto tekerishek sarrah, Simcoon Iskariyoot barha kin Yahuudah yoxoye.

²⁷ Sarrah usuk amaa dhacto beetek sarrah Sheethan adde orobe. Yeesus lel: “Tamaa abto litom, afitteh ab” akko yerhxe.

²⁸ Kado, tayim aymih akko yerhxem amaa thawlalle cikkishiteh beetak yine maraako walaa inketti maarhago.

²⁹ Yahuuda maxfuda kaalih tinemhi sabbatah gari, Yeesus: “Cidih farhshishsham noh dham” akko arhxuk yinem, hido lel baaxentitih wulim yaxaw akah warishak yane yekkelin.

³⁰ Amaymih usuk amaa folottat dhacto kabbaatek sarrah akkanih irolle yewce. Bar lel kuuk yine.

Cusub amre

³¹ Usuk irolle yewce gedda Yeesus: “Kado kinni Xiyawti Barhi yenebem, Yalli lel kayyadde yenebe.

³² Yalli kayyadde yenebemko, Yalli gantah kayya ishedde yaynabo kinni. Akkanih lel kaa yaynabo kinni.

³³ Cindha cindhaamo, kaddih dago waqhteh sinlih aniyo. Yi goronishshoona kitin. Tamaa Yahuuduk akah erhxeekah lel kado: ‘Anu alle adiyuk anelle tamaatoona mirhictaana’ sinak arhxiyuk ane.

³⁴ Sittiya takxanoona cusub amre sinah axawuk aniyo. Anu akah sin ikxineekah, sitta ikxina atin gantah.

³⁵ Tayimko, sitta tikxiniinimko xiyaw inkoh yi katattaynit kitiinim yaarhagoona kinon” yerhxe.

Yeesus Bithroos xinnan yaakumeh

³⁶ Simcoon Bithroos: “Maddara, awlalle aduuk tanito?” akko yerhxe. Yeesus: “Anu alle adiyuk aniyolle, kado yi katayto mirhicta, sarrah laakin katayto kito” yerhxeh alle yedebbe.

³⁷ Bithroos: “Aymih kado ku kataw mirhiicam? Anu inni aniina kottah arhxuk tillaabisho kiyo” akko yerhxe.

³⁸ Yeesus: “Atu ishi aniina yottah arhxuk tillaabishsho kito? Atu adooxa gedda yi xintandah dor-hotti andhaxo makinam rummah, rummah, kok arhxiyuk ane.