Yohannis 12 - Saaho Cusub Cahde

Maryam Beetcaniyalle Yeesus iba taskute

¹ Amaa Faasigaako lixa lellecik basolle, Yeesus amaa usuk rabaako uguse Alazaar alle yine Beetcaniya fanah yemeete.

² Amaymih amalle usun dirar akah aben. Marta ten teyseese, Alazaar lel amaa thawlalle kaalih defeyteh beetak tinemko inketta kuuk yine.

³ Maryam lel litrot abrha yakke qaali kin zeet qarce-le “nardos” akko yarhxin xarhaako siraaximeyah Yeesus iba tuskuteh ishi dagarah kaa iba xishiite. Amaa cari lel amaa zeet ureh yemmeege.

⁴ Kaa katattaynitko kin Iskariyootti Yahuuda, amaa kaa yasxaw leya lel:

⁵ “Ta zeet adooxa bool diinaariyah yimibbixeh baaxentitih aymih amxawwe waye?” yerhxe.

⁶ Tayim yerhxem lel baaxentitih xaaliiteh makiiki, garceena kuuk yinemhi sabbatah kinni. Maxfuda usuk yibbirheh yine, amadde sayinnannimko lel isheh akko bishshiitak yine.

⁷ Yeesus: “Yi macagih maxah sugussem kinnik tee xab.

⁸ Baaxentit umman gedda sinlih yanin. Yotta laakin umman gedda yi taalloona makitiini” akko yerhxe.

Alazaar gidfohi xagara

⁹ Yahuudko mango mari Yeesus amalle yinem yoobbin gedda, kayyah arhxuk bisa akkekkah, usuk rabaako uguseh yine Alazaar yabloona amalle yemeetin.

¹⁰ Amaymih, sheekhat manabottit amaa Alazaar yakkeedo yagdafoona yixiggirin.

¹¹ Amayim lel mango Yahuud kaa sabbatah aduuk Yeesusuh aaminuk yiniinimhi sabbatah kinni.

Yeesus Nugus balih Yerusaalem oroba

¹² Malammit max, tamaa cidih temeeteh tine mango xiyaw Yeesus Yerusaalem fanah amiituk yanem yoobbin.

¹³ Amaymih lel tamri xorh hi xakuk yibbirhiinih akah garawna yewcin. Wac-yerhxiinih lel: “Yalla xamdishinna! Maddari migacalle amiituk yane Israa-eel Nugus dhaacole kinni” yerhxin.

^14-15 Tamaa: “Tsiyoon barhäw, mimashshiitin; ku nugus amiituk yane. Usuk cullutti bukak defeyeh yane!” yarhxiinim tunkuttubeh akah taneekah, Yeesus cullutta geyeh akko kore.

¹⁶ Kaa katattaynit erherhih tayim mafhaminnooni, Yeesus nabneh carshelle kore gedda laakin, tayim kaa sabbatah tunkuttubeh tinem kee usun lel tayim akah abeenim sarrah yizzikkirin.

¹⁷ Amaa Alazaar qabreeko akah deecimeh rabaako uguseh kaa ayyaacuk kaalih tine mango xiyaw lel kaa sabbatah sinni shahaada katattayshen.

¹⁸ Mango xiyaw kaa geyoona akah aduuk yinin sabab lel usuk ta ishaara abem yoobbiinimhi sabbatah kinni.

¹⁹ Amaymih Faarisiin sinne-sinneh: “Ubula atin inkim geyak mitaniini. Kulux-erhexa, caalam kaa sarradde aduuk tane” yerhxin.

Giriikko gari Yeesus wagiyan

²⁰ Amaa agana cidih cibaada aboona yewceh yine maradde wuli dago Giriik xiyaw yinin.

²¹ Amaymih lel ta mari Galiilaati Beet-saydaako kin Filibboosulle yemeetiinih: “Maddara, Yeesus geyno farhneh nine” akko yerhxin.

²² Filibboos yedeeh Indiryaasah warishe, Indiryaas kee Filibboos lel yedeynih Yeesusuh warishen.

²³ Yeesus lel: “Xiyawti Barhi adde yanabo-le saaca gufteh tane.

²⁴ Sinraa zaratti baarholle radeh rabe wayemko, inkettak raaca, rabemko laakin mango zara baaham rummah, rummah sinak arhxiyuk ane.

²⁵ Ishi aniina akxininnanti tee waya, ta caalamalle ishi aniina ancibinnanti lel umman geedit aniinah tee geyo kinni.

²⁶ Yi akhduminnanti, yi kataw alle tane, anu alle anniinnanille lel yi khaddaam gantah yannaw kinni. Akkinnanti yotta yukhdumemko lel Abba kaa yaynabo kinni.

Xiyawti Barhi xaf-yarhxo alle tane

²⁷ Kado yi rooxi yimribbisheh yane. Ayim arhxo kinni? ‘Abba, ta saacaako yi garger?’, laakin ta saacah arhxiyuk kinni emeeteh anem.

²⁸ Abba, ishi migac eyneb” yerhxeh alle yedebbe. Sarrah, wuli dhaw caranko yemeeteh: “Anu kaa eynebeh aniyo, malammih lel kaa aynabo kiyo” yerhxe.

²⁹ Amalle daw-terhxeh tayim toobbe mango xiyaw lel, “Angudeh yine” yerhxin. Aki mari lel: “Malaykatti aalih waanishe” yerhxin.

³⁰ Yeesus: “Ta dhaw yemeetem sinah arhxuk kibah, yottah maki.

³¹ Ta caalamhi firdi kado kinni, kado kinni lel ta caalamhi reezanti irolle ciddito lem.

³² Anu lel, ta baarhooko takarima gedda, xiyaw inkoh innelle hiriigo kiyo” yerhxe.

³³ Usuk tayim yerhxem lel aaginale rabah rabo kinam yayballaw yerhxeh kinni.

³⁴ Amaymih amaa mango xiyaw: “Masiix umman gedda maram, sercatko noobbeh nane. Xiyawti Barhi takarimo kinni tarhxo aaginah dhicta? Xiyawti Barhi miyatto kinni?” yerhxiinih alle yedebbin.

³⁵ Amaymih Yeesus: “Wuli dago waqhteh ifi sin fanadde amiituk yane. Dite sin tasciremko, ifo liitin gerha. Ditedde gerhati awlalle aduuk yanem miyaarhige.

³⁶ Ifi cindham takkoona ciloh lel ifo liitin ifoh imina” akko yerhxe. Yeesus tayim yerhxemko sarrah, yedeeyaako tenko ishe sucuse.

Xiyaw imaan wayto

³⁷ Usuk mango ishaarar ten nifille abe hanuk, Yahuud kaddih kayyah maamaninnooni.

³⁸ Tayim tekkem lel nabii Isayas: “Maddara, nottaako tomobbemih miyatti yeemene? Yallih agada lel miyah tumbulluwe?” yerhxeh yine waani takmalo ciloh tekkem kinni.

³⁹ Isayas lel malammih:

⁴⁰ “Sinni intitih yabliinimko, sinni afcaadoh yifhimiinih yottalle lel gaxaanamko anu lel ten urusamko tena intit ten wayshisheh yane, ten afcaado lel yiytirireh yane” akah yerhxeekah, amaydo, yaamanoona mirhiicinnooni.

⁴¹ Isayas tayim yerhxeh kaa sabbatah waanishem kaa nabne yublemhi sabbatah kinni.

^42-43 Yakko kibah, mango mari, amaa reezonko gantah kayyah yeemenin. Yallaako tamiite nabneeko ziyaada xiyawko tamiite nabne yikxiniinimhi sabbatah kee Sunagoogeeko ten yayyaaciinimko Faarisiin mashshiiteenimhi sabbatah laakin micaddoyshinnooni.

Yeesus caalam gargeero yemeete

⁴⁴ Yeesus lel wac-yerhxeh: “Yottah aamininnanti, yottah makiiki, tamaa yotta fareh yanetiyah kinni yaaminem.

⁴⁵ Yotta yableti, tamaa yotta fare tiya yable.

⁴⁶ Yottah yaamineti ditedde maramko ciloh ta caalamalle ifo balih emeeteh aniyo.

⁴⁷ Anu gargeero kibah caalam afrado maamaatiyomhi sabbatah, yi waani yaabbeh abbirhinnixe tiya, kaa mafride.

⁴⁸ Tamaa yi xinayaako, yi farto kabbaatinnixe tiya lel kaa yafrideti yane. Anu waanisheh aniyo waani, abayshimat lellec kaa tafrado kinni.

⁴⁹ Anu tamaa yi fare Abba ayim arhxem kee ayim waanishamhi amre yoh yoxoyenkah, anu inni amooko miwaanisha.

⁵⁰ Kaa amri umman geedit aniinalle xiyaa baaham aarhige. Anu waanisham, amaydo, tamaa Abba akah yoh warisheh yaneekah kinni” yerhxe.