Yohannis 10 - Saaho Cusub Cahde

Anu mece loyna kiyo

¹ Yeesus lel: “Ciidot daggehi caraf xabayaako korah aki araxko orobati garceena kee barheerhatto kinam rummah, rummah sinak arhxiyuk ane.

² Carafko orobati laakin ciidot loyna kinni.

³ Kayyah dhawrheeni akah faaka. Ciido kaa dhaw taabbe, ishi ciidoh lel migacah akah deecimah irolle yayyaace.

⁴ Ishim inkoh yayyaace gedda, isheh afadde akko yadiye, kaa dhaw taarhigemhi sabbatah lel amaa ciido kaa katayta.

⁵ Godobot dhaw mitaarhigemhi sabbatah lel godobottaako akko kuddankah adde mikatayta” akko yerhxe.

⁶ Yeesus ta amol-beeh tenlih waanisho kibah, usun ayim arhxuk yinem kaa mafhaminnooni.

⁷ Amaymih Yeesus malammih: “Anu rummah rummah amaa ciidot daggehi caraf kiyom sinak arhxiyuk ane.

⁸ Yi basolle yemeete mari garaacen kee barheerha kinon, ciido laakin ten mabbinna.

⁹ Anu caraf kiyo. Akkinnanti yottaako orobemko, gargeerimo kee orobo kee yawco, amaye balih alle yaloolekke geyo kinni.

¹⁰ Garceeni yamiitem, garaco, yagdafo kee yaylawo bisa kinni. Anu emeetem lel usun aniina yaalloona kee rakha kin aniina yaalloona ciloh kinni.

¹¹ Anu mece loyna kiyo. Mece loyni ishi aniina ishi ciidoh tillaabisha.

¹² Loyna akkinnixeti, casbeh yaneyaako lel amaa ciidoh wanna akkinnixeti, suula amiituk yable gedda amaa ciido xabah kuda. Amaa suula lel amaa ciido simbaacayaako faax-isha.

¹³ Ciidot macal male, casbento kinamhi sabbatah lel kuda.

^14-15 Anu mece loyna kiyo. Yi abba yotta akah yaarhigeekah, anu lel yi abba akah aarhigeekah, anu innim aarhige, yim lel yi yaarhigin. Inni aniina lel ciidoh arhxuk tillaabisha.

¹⁶ Ta ciidot daggeeko akkinnixe ciido yakkeedo liyo. Tena yakkeedo baaho yolle tane. Yi dhaw lel yaabboona kinon. Amaymih lel inki ciido kee inki loyna yannawna kinni.

¹⁷ Anu inni aniina tillaabisha, malammih lel addabbo kiyomhi sabbatah yi abba yi kixina.

¹⁸ Yi aniina yok beyati miyane, laakin anu inni farhih kinni tillaabisham. Tee tillaabisho reeza liyo, malammih tee addabbo lel reeza liyo. Ta amre yi abbaako kabbaateh aniyo” akko yerhxe.

¹⁹ Malammih lel ta waanih sabbatah Yahuud fanadde sitta-waa saye.

²⁰ Tenko mango mari: “Usuk jinnetta leya, cubud kinni; aymih kaa naabbe?” yerhxin.

²¹ Aki mari: “Tayim yimjinnine tiyahi waani maki. Jinnetti inti-maleh inti faako dhiica?” yerhxin.

Yotta kee yi Abba inketta kino

²² Amaa waqhte Yerusaalemille Maqhdas carehi Ascassabti cid yekke. Xagaa lel kuuk yine.

²³ Yeesus lel maqhdas careeko, Suleymaan gabalalle hel-arhxuk yine.

²⁴ Amaymih lel Yahuud kaalle yekeekettiinih: “Manda fanah kinni ni shakkishsho litom? Masiix tekkemko caddoyishsheh noh warish” akko yerhxin.

²⁵ Yeesus: “Anu sinah warishe, atin laakin mitaaminiini. Anu yi Abbah migacalle aba ciyyo, yi sabbatah tashhide.

²⁶ Atin laakin yi ciidooko makitiinimhi sabbatah mitaaminiini.

²⁷ Yi ciido yi dhaw taabbe, anu lel ten aarhige, usun lel yi katattaan.

²⁸ Anu umman geedit aniina akah axaye, caduruh lel yalawna makinooni. Yi gabaako lel walaa inketti simbaaco maki.

²⁹ Tena yoh yoxoye yi Abba umman tiyaako naba. Abbat gabaako lel walaa inketti ten simbaaco mirhiica.

³⁰ Yotta kee yi Abba inketta kino” yerhxeh alle yedebbe.

³¹ Yahuud lel kaa yagdafoona malammih dhayit yooqhocin.

³² Yeesus: “Anu yi Abbaako mango mece abittot sin uybulluweh ane; tayimko awlih tiyah kinni dhayit yolle ciddoona litiinim?” yerhxeh alle yedebbe.

³³ Yahuud: “Mece waanih makiiki waatoh kinni dhayit kolle cidno linom, amayim lel atu xiyawto kito hanuk, ishek Yalla abtemhi sabbatah kinni” yerhxiinih alle yedebbin.

³⁴ Yeesus: “Sin sercatadde: ‘Atin yallit kitin erhxe’ yarhxiinim tunkuttubeh mitaneho?

³⁵ Tamaa Yallih waani akah tamiite marak yallit yerhxemko, Kutuub dumuso mirhiica.

³⁶ Abba yiqhiddiseyaako caalamalle fare tiyak: ‘Yallih Barha kiyo’ sinak arhxe gedda: ‘Yallah waatimak tanito’ yok tarhxiini?

³⁷ Anu inni Abbah ciyyo abak anniye wayemko, yi maamanina.

³⁸ Amayim abah ekkemko laakin, Abba yottadde, anu lel Abbadde aniyom taarhagoona kee tafhamoona ciloh, walaa yi aamine wayteenimih, amaa ciyyoh imina” yerhxeh alle yedebbe.

³⁹ Malammih kaa yabbarhoona farhen, usuk laakin ten gabaako kude.

⁴⁰ Tamaa erherhih Yohannis alle aythimmiqhuk yine Yordaanos waacina kin makaanolle yedeeh lel amalle defeye.

⁴¹ Mango mari lel kaalle yemeetin. Usun lel: “Yohannis ishaarar maabinna, usuk ta xiyawti sabbatah yerhxem laakin inkoh rumma kinni” akko yerhxin.

⁴² Mango mari lel kayyah yeemenin.