Yohannis 1 - Saaho Cusub Cahde

Yeesus umman geedit Aniinah Waanitta kinni

¹ Erherhih Waanitta tine. Amaa Waanitta Yallaalih tine. Amaa Waanitta lel Yalla kuuk tine.

² Ishi erherhih Yallaalih tine.

³ Ummannim lel tee araxah tekke. Umbuka tunkhulluqhemko lel tee araxah akkinnixemko walaa inkim adde mitane.

⁴ Teyadde aniina tine, aniina lel xiyaw ifo kuuk tine.

⁵ Ifi ditedde ifisha, dite lel kaa tiscireh mitane.

⁶ Wuli Yalli farriime Yohannis akko yarhxin xiyawti yine.

⁷ Ummanti kaa araxah yaamano ciloh lel shaahid yekkeyaako ifi zacabah yashhado yemeete.

⁸ Usuk isheh ifo kuuk miyine, ifi zacabah yashhado laakin yemeete.

⁹ Rummaahit ifi umman tiyah ifishaya lel caalamalle amiituk yine.

¹⁰ Usuk caalamalle yine, caalam lel Kaa araxah tekke. Yakko kibah laakin caalam kaa maarhaginna.

¹¹ Usuk ishimille yemeete, kaa mari laakin kaa mikabbaatinnooni.

¹² Inkoh kaa kabbattem kee kaa migacah teemenemih laakin Yallih cindham yakkoona xaqqe akah yoxoye.

¹³ Ta mari lel biilooko hido xazottat farhiiko hido labhatti farhiiko akkekkah Yallaako toobokem kinon.

¹⁴ Waanitta xazotta tekkeh lel ni fanadde sigte. Yallaako inketta bisa kin Barha hi nabenta, nicma kee rummaako yemmeegeyahi nabne lel nubleh nane.

¹⁵ Yohannis lel kaa zacabah yishhideyaako, taginah zeere: “Tatiya kinni tamaa anu, ‘Yi sarralle amiituk yaneti, yi basolle yinemhi sabbatah lel yottaako naba’ akko erhxeti”.

¹⁶ Kaa migeeko lel nicma nicmat bukalle inkoh kabbatneh nane.

¹⁷ Tayim lel, sercat Moosat araxah yomxoye, nicma kee rumma lel Yeesus Masiix araxah yemeetemhi zacabah kinni.

¹⁸ Yalla yubleti inkinnah miyane; Inketta bisa isheh Yalla kinya, Abbat galedde yaneya, Yalli miyatto kinam yiyshidhdhige.

Yaythimmiqhe Yohannis shahaada

¹⁹ Yahuud: “Miyatto kito?” yerhxiinih kaa esseroona sheekha kee Leewiiti xiyaw Yerusaalemko alle faren gedda, Yohannis shahaada tatiya kinni.

²⁰ Usuk yishhide, mixinooki yishhideh: “Anu Masiix makiyo”.

²¹ Usun lel: “Miyatto kito haye? Eliyaas kito?” yerhxiinih kaa esseren. Usuk: “Makiyo” yerhxe. “Amaa yamaato-le Nabii kito?” Usuk lel: “Maale”.

²² Amaydo: “Miyatto kito? Ni fare marah radde naxaw nolle tane. Atu ishi zacabah ayim tarhxe?” akko yerhxin.

²³ Usuk: “Anu zibolle zeerak yane tiyahi dhaw kiyo, nabii Isayas akah yerhxeekah: ‘Maddari arax rig-ishanta’” akko yerhxe.

²⁴ Kado lel Faarisiin faren mari,

²⁵ kaa esseren: “Atu Masiix makito, Eliyaas makito, Nabii makito hanuk aymih aythimmiqhuk tanito?”

²⁶ Yohannis radde akah yoxoye: “Anu layeh aythimmiqhe, sin fanadde laakin atin aarhige waytantii daw-yarhxeya yane.

²⁷ Yi sarralle yamiiteti anu kaa kabelhi ragad gantah akko aftaxo yoh eedinnixiyo tiya kinni.”

²⁸ Tayim lel amaa Yohannis alle aythimmiqhuk yine Beetcaniya akko yarhxin Yordaanos gadehi tabsolle tekkem kinni.

Ubula, Yallih Leema!

²⁹ Leddi max Yeesus kaa gabolle amiituk yubleyaako lel: “Ubula, caalamti zambe kala, Yallih Leema!

³⁰ Tati, tamaa anu: ‘Yi sarralle yamiite xiyawti yi basolle yinemhi zacabah yottaako naba’ akko erhxe tiya kinni.

³¹ Anu inneh kaa maarhagiyo, laakin usuk Israa-eelih yamadhdhago ciloh anu layeh aythimmiqhuk emeete” yerhxe.

³² Yohannis lel yishhide: “Ufayi carsheeko xamaamatto balih alle oobeh kayyak asak uble.

³³ Anu inneh kaa maarhagiyo, layeh aythammaqho yi fareti laakin: ‘Tamaa Ufayi oobeyaako akko aseh tableti, tatiya kinni amaa Quddus kin Ufayeh yaythimmiqheti’ yok yerhxe.

³⁴ Anu lel kaa uble. Yallih Barha kinamah lel ashhide.”

Yeesus afti katattaynit doora

³⁵ Leddi max gantah Yohannis ishi lamma katattaynaalih daw-arhxuk,

³⁶ Yeesusudde kulux-yerhxeyaako tillaabak kaa yubleh: “Ubula, Yallih Leema!” yerhxe.

³⁷ Lamma katattayni tayim arhxuk kaa yoobbiinih Yeesusudde katayen.

³⁸ Yeesus ufkun-yerhxih kayyadde kataa ten yuble gedda: “Ayim farhak taniini?” akko yerhxe. Usun lel, “‘Rabbi!’ (Mudarris, yarhxiinim kinni), awla sigteh tanito?” akko yerhxin.

³⁹ Usuk: “Amowa, tabloona kinnik” akko yerhxe. Usun lel yemeetiinih usuk alle yemseefereh yinekke yublin. Amaa gedda kasit saaca afar kuuk tinemhi sabbatah lel amaa lellec kaalih asen.

⁴⁰ Amaa lammaako wuliti, Yohannis waanishak yoobbeh Yeesus katattayeti lel Indiryaas, Simcoon Bithroos sacal kuuk yine.

⁴¹ Erherhih ishi sacal Simcoon geyeyaako: “Nanu Masiix geyne” (Kiristoos yarhxiinim kinni) akko yerhxe.

⁴² Yeesus fanah kaa baahe. Yeesus lel kulux adde yerhxeyaako: “Amaydo atu Simcoon Yohannis barha kito. Ku migac Keefa (Bithroos yarhxiinim kinni) yakko kinni” akko yerhxe.

Yeesus Filibboos kee Natnaa-eelih deecima

⁴³ Leddi max Yeesus Galiila yadaw abayshe. Filibboos geyeyaako lel: “Yi katattaa” akko yerhxe.

⁴⁴ Kado, Filibboos, Indiryaas kee Bithroos daafo kin Beet-saydaako kuuk yine.

⁴⁵ Filibboos Natnaa-eel kaa geyeyaako: “Tamaa Moosat sercatadde amayim balih Nobowa kaa zacabah akko yuktubin Yoosuf barha kin Naazret Yeesus, kaa geyne” akko yerhxe.

⁴⁶ Natnaa-eel: “Naazretko mecem akko tawco dhicta?” akko yerhxe. Filibboos lel: “Amowaaki ubul” akko yerhxe.

⁴⁷ Yeesus lel Natnaa-eel kaa gabolle amiituk yubleyaako kaa zacabah: “Ubula, doolab adde anniinnixe rummaahit Israa-eelto!”

⁴⁸ Natnaa-eel lel: “Aaginah yi teerhege?” akko yerhxe. Yeesus lel: “Filibboos kottaalih abekkah, amaa indacartot rigidille anituk ku uble” yerhxeh alle yedebbe.

⁴⁹ Natnaa-eel: “Mudarris, atu Yallih Barha kito, atu Israa-eel Nugus kito!” yerhxeh alle yedebbe.

⁵⁰ Yeesus: “‘Indacartot rigidille ku uble’ kok erhxemhi sabbatah taamine? Tayimko nabam tablo kito” yerhxeh alle yedebbe.

⁵¹ “Carshi fakkiteyaako Yallih malaykut Xiyawti Barhalle oobak kee korak tabloona kitiinim, rummah rummah sinak arhxiyuk ane” lel akko yerhxe.