Yacqoob 5 - Saaho Cusub Cahde

Asuuso gaddaalitih

¹ Ko gaddaalito, bixna sinadde amiituk tanemhi sabbatah, amowanta kado wuu-terhxiinih zeranta.

² Sin gaddi masxiteh yane, sin sara lel ununi beeteh yane.

³ Sin dahab kee sin fidda cilloyteh tane, amaa ten cillo lel seththe sinalle takko kinni, gira balih lel sin xazo bakto kinni. Abayshimat lelleecah lel sinni gadda tuttucukkuriinih tanin.

⁴ Taykinna lel tamaa sin dhage ticiyyiye shaqqaalahi casbi, atin doolabah akko raacishshenya, sinak zeerak yane. Tamaa yaciyyiye marahi zeero lel carshi maxaarhohi Maddari cokka gufteh tane.

⁵ Udduuniyalle raaxa kee sinni farhih marak tinin. Marxaddet laa balih lel sinni garub tuskulusiinih sugten.

⁶ Xaqqi-wanna lel tifridiinih tisgidifin. Usuk lel sinko ishe deesa.

Waaxeltadde curtayyo

⁷ Amaydo, yi saculo, Maddari gaxnan fanah sabre abitanta. Xarastaa tamaa limo naba daro baarhotya ilaalah, tamaa erherh rob kee sarroorimat rob geyandah akah yasbireekah ubula.

⁸ Atin gantah sabre abitanta. Maddari gaxnan kab-yerhxeh yanemhi sabbatah lel niya micidina.

⁹ Yi saculo, tamfirridinki, sittiyalle mangaraazamina; taykinna lel amaa yafrideti carafadde daw-yerhxeh yane.

¹⁰ Ko yi saculo, waaxeltadde sabre akah abitaanaakahi misaalah tamaa Maddari migacalle waanishshe nobowa ubula.

¹¹ Taykinna, tamaa cure mara dhaacolit balih ten nable. Ayyuub curtayyo kee Yallih macal tubliinih tanin. Amayim lel Yalli mece farhi-le kee naxrurta-le kinamhi sabbatah kinni.

¹² Yi saculo laakin, ummanimko bukalle, mirhiiwitina. Baarhoh yakko carsheh, hido aki caleh mirhiiwitina. Yallih firdehi geridde raddanki lel sin waanitta “Yoo” tekkemko yoo, “Maale” tekkemko maale takkoo.

Imaanah aban dhaaco

¹³ Sin fanadde waaxelsiitati yane? Amaati dhaaco abitoo. Xedeneena kinti yane? Faylat qanna qannishoo.

¹⁴ Sin fanadde laxuuteti yane? Usuk kaniisaako naba marah deecimeh usun bukalle dhaaco akko abeenih, Maddari migacalle zeetih kaa yaskatoonaa.

¹⁵ Imaanah aban dhaaco laxuute tiya urusso kinni, Maddari lel kaa uguso kinni. Zambedde sayeh yinniyemko lel zambi-xabbot geyo kinni.

¹⁶ Amaydo, urtoona ciloh sinni zambe sittiyah warishanta, sittiyah lel dhaaco abanta. Xaqqi-wanna kin tiyahi dhaaco naba xayla leya, abittodde lel assa.

¹⁷ Eliyaas notta balih xiyawto kinni; rob radamko lel dhacumaatih dhaaco abe. Adooxa iggida kee lixa alsa lel baarholle rob miradinna.

¹⁸ Sarrah malammih dhaaco abe, caran lel rob yoxoye; baarho lel daro bahte.

¹⁹ Yi saculo, sinko akkinnanti rummaako mirix-yerhxeh kaa sacal kaa yedebbemko,

²⁰ tamaa zambi-wanna mirixtaako adabbinnanti, kaa rooxe rabiiko gargeerem kee mango zambe akah alifo kinam yaarhagoo.