Yacqoob 4 - Saaho Cusub Cahde

Asuuso caalamti kaxanooko

¹ Sin fanadde zagaxa kee gica sayishsham ayim kinni? Ta sin farhi sin addadde taneya makini sinlih dhibadde tanem?

² Akkinnannimih hamberertaanah migeytaana, amaymih xiyaa tagdifin. Akkinnannim duumuttaanah geytoona mirhictaana, amaymih tangaaciinih tanzeegexin. Mirhaacimittaanamhi sabbatah lel migeytaana.

³ Dhaacimittaanah mikabbattaana, amayim lel sinni farhidde ashishshoona arax maleh dhaacimtaanamhi sabbatah kinni.

⁴ Ko zaaniyiin kin xiyawo, ta caalam yakxiniinim, Yalla yancibiinim kinam mitaarhigiini? Amaydo, ta caalamti kaxantoole yakko farhati Yallahi nacabtoole ishek aba.

⁵ Hido lel tamaa: “Usuk nottadde sigisheh yane ufayi, kayyah bisa nakko ashshiinoh hambereera” yarhxe Kutuub foyya takkaliini?

⁶ Laakin usuk ziyaada nicma yaxaye. Amaydo: “Yalli yamnanabbe marahi didde yakke, amnonobba hin marah lel nicma yaxaye” kinni Kutuub yarhxem.

⁷ Amaydo, Yallah im-izzizanta. Ibliis didde tika, usuk lel sinko kudo kinni.

⁸ Yallalle kab-erhexa, usuk lel kab sinalle yarhxo kinni. Ko zambe lito, sinni gabub qarcoyishanta, ko lammaa-garbalito sinni afcaado iythihira.

⁹ Iqhdiba, ixzina, weca. Sin asal xazanalle, sin xeden lel zeerolle iybiddila.

¹⁰ Maddari nifille mamnanabbina, usuk lel xaf sin isho kinni.

¹¹ Yi saculo, sittiyahi diddeh umam miwaanishina. Sacal diddeh waanishati hido ishi sacal yafrideti sercat diddeh kinni umaani waanishah sercat yafridem. Laakin sercat tifridemko, sercat yarhxem aba tiya makitooki, sercat yafride tiya kinni kitom.

¹² Sercat yaxaye kee daaniya, gargeero kee yaylawo dhiicayah, inketta bisa kinni yaneti. Laakin ishi zoobatto tafrado atu miyatto kito?

Beerah falitaanam

¹³ Atin, tamaa: “Kaafa hido beera too daafolle nadaw kino, bicishra abinneh lel naksabo ciloh amalle iggida sugno kino” yarhxe marak oobbaanta;

¹⁴ inkinnah, beeri ayim baaho lem mitaarhigiini. Sin aniina ayim kinni? Amayim lel tamaa dago gedih tambulluweh talaye haffa kitiinimhi sabbatah kinni.

¹⁵ Amayim hidhdhah: “Maddari farhemko, nannaw kino, tayim abno hido toohim abno kino” tarhxoona sinalle tane.

¹⁶ Kado laakin sinni amnonobbadde falitak tanin.

¹⁷ Amaydo, tamaa abo missil mecem yaarhigeh abinnixeti, zambe abak yane.