Yacqoob 3 - Saaho Cusub Cahde

Anrab yabbirhiinim

¹ Yi saculo, nanu tamaa yayduruse marak sirii ginah namfarrado kinom taarhigiinimhi sabbatah, mango marak mudarrisiin makkina.

² Amayim lel mango araxah andafinnamhi sabbatah kinni. Akkinnanti tamaa yarhxemih andafite wayemko, usuk gadma hin xiyawto yekkeh, umbuka ishi nabse gantah yabbarho dhiica tiya kinni.

³ Faaris noh yam-azzazo ciloh afofudde lugam akko hayna, umbuka ten nabse lel amaa tiyah santishna.

⁴ Taykinna lel dooniika tayidhdha nabaya, dhacuma xaaxattah duffuumta hanuk, tamaa naakuda alle farhinnan gabolle cindha sukkaanah kinni santishimanaam.

⁵ Amayim balih, anrab cindhaa karima kinni hanuk, naba caleh falita. Ubula, garab ayidhdha naba hanuk cindha thinqillicoh bolola.

⁶ Anrab lel gira yekkeh caalamti umaani kinni. Anrab ni karimhi addadde yakkeh, umbuka ni nabse masxishayaako, umbuka aniinat araxadde gira hayah, jahannab giradde saya.

⁷ Umbuka caynah alluula kee kimbir, mexeltam kee badti ufayle, xiyawti ten yagziye, yingizziinih lel yanin.

⁸ Anrab yagzaw dhiica xiyawti laakin miyane. Acrufinnixe uma tiya, xiyaa yagdife xinzeeko yemmeegeya kinni.

⁹ Kayyah abnah ni Maddara kee Abba faylishinna, kayyah abnah lel Yallih misleh yunkhulluqhe mara abarna.

¹⁰ Inki afko fayla kee abaaro tawce. Yi saculo, tayim takko eeddam maki.

¹¹ Illa inki afko mece laye kee mulxu kin laye raxtaho?

¹² Yi saculo, indacarto oolac bahtaho, hido cinab xarha indacaaro bahtaho? Mulxu-le laye raxta illa lel mece laye miraxta.

Kas aganaako

¹³ Sin fanadde kas-le tiya kee fahaama leti miyatto kinni? Ishi mece xaalah kasle xiyaawinnadde ishi abitto yayballaw.

¹⁴ Laakin sinni afcaadodde dhacuma ashshiino kee sinni nabsehi kaxano teelliinimko, mifalitina, rummi bukalle lel mizirabbitina.

¹⁵ Tayim aganaako ooba kas makiiki, baarhootim, xazottaatim kee ibliisim kinni.

¹⁶ Ashshiino kee nabsi kaxani alle yanelle, cigirgir kee uma abitto tane.

¹⁷ Laakin aganaako kin kas erherhih tsitstsii tiya kinni, sarrah lel maaxiyo le tiya, mece tiya, aki xiyawhi mablo kabbaata tiya, raxmaako yemmeege tiya, mece fire le tiya, babbarhishnan hin tiya kee doolab hin tiya kinni.

¹⁸ Xaqqi fire lel maaxiyodde maaxiyo aba marah tamzirriye.