Yacqoob 2 - Saaho Cusub Cahde

Babbarhishnan zambe

¹ Yi saculo, tamaa nabnet Maddara kin ni Maddara Yeesus Masiixidde yane imaan akah litiiniikah babbarhishnan maabina.

² Akkinnan xiyawti dahab khaatim kee mece sara sariteya sin akottalle yemeetemko, zire sara sarite baaxenti gantah sinalle yemeetemko,

³ atin tamaa mece sara sarite tiyah gunco abteenih: “Atu ta mece caralle defee” akko terhxiinimko, tamaa baaxenta kin xiyawtok lel: “Toohille defee” hido “Amo yi ibahi rigididde defee” akko terhxiinimko,

⁴ sinni fanadde babbarhishnan abtenyaako yafride mara uma xisaab leyaya balih makini akkuk taniinim?

⁵ Oobbaanta, yinkixxine yi saculo, Yalli tamaa kaa kixin marah saye wacdeh, nigsinna yawrashoona ciloh, imaanah gaddaalit yakkoona, tamaa caalamti baaxentit dooreh makiho?

⁶ Atin laakin tamaa baaxenta xoolayishshen. Sin dhuuntah maxkama fanah sin gotottam tamaa gaddaalit makini?

⁷ Tena makini tamaa atin kaayim akko kitin naba migacah waatimtam?

⁸ Atin rummah tamaa Kutuubulle yane: “Ishi zoobatto ishe balih ikxin” yarhxe nigsinnat sercat tiskimiliinimko, mecem abak tanin.

⁹ Babbarhishnan abteenimko laakin, zambedde sayak tanin; sercat yigdile mara tekkiinih lel amaa sercatah aalimuk tanin.

¹⁰ Tamaa sercat yarhxem inkoh aba hanuk, amayimko inki dhimmiyo yuynuqhusemko, ummanimille cagab wanna yakke.

¹¹ Amayim lel tamaa: “Maznayin” yerhxeti: “Magdafin” gantah yerhxemhi sabbatah kinni. Mitazniye hanuk gidfo abtemko, sercat tigdileh tanito.

¹² Amaydo, tarhxiinim kee abtaanam tamaa finjat sercatah yamfarrado le mara balih abanta.

¹³ Amayim lel tamaa raxma aallinnixeti raxma hinnim yamfarrado kinamhi sabbatah kinni. Raxma firdeeko subta.

Abittot hin imaan rabe tiya kinni

¹⁴ Yi saculo, akkinnan xiyawti: “Imaan liyo” yerhxemko, abittotuh laakin aybulluwe wayemko, ayim yamfice? Amaa imaan kaa gargeero dhiica?

¹⁵ Akkinnan sacal hido sacla carrazeenimko, max-yeenimhi folo lel aalle wayeenimko,

¹⁶ sinko wuliti ten nabse farhshishsham akah axayekkah: “Maaxiyodde aduwa, lalacteenih xaytanta” akko yerhxemko, ayim ten yamfice?

¹⁷ Amayim balih imaan ishi ulah, abittot aalih anniye wayemko, rabeh kinni.

¹⁸ Laakin wuliti: “Atu imaan lito, anu abittot liyo” yarhxo kinni. Ishi imaan abittot hinnim yi uybulluu, anu lel inni imaan abittotuh ku ayballaw kiyo.

¹⁹ Yalli inketta kinamah taamine; amaymih mecem abta. Junuun gantah yaaminiinih gilixih arharhan.

²⁰ Ko duudaw, imaan abittot hinnim miyamficem taarhago fadhdha?

²¹ Ni abba kin Abraahim, Isxaaq ishi barha mazbaxalle baahe gedda, abittotuh makini yitxiqqiqhem?

²² Imaan abittotlih yakkeh yakhdumem, amayim balih kaa abittotuh imaan yikmilem ablituk tane.

²³ “Abraahim Yallah yeemene, amayim lel atxaqqaqhadde akah loyyimte” yarhxe Kutuub lel yikmile. Taginah lel Yallih carke yekkeh decsiime.

²⁴ Xiyawti imaanah bisa akkekkah, abittotuh lel yatxiqqiqhem ablituk tane.

²⁵ Amayim balih, sharmuutha kin Rahab gantah, tamaa fartottit kabbatteyaako akuulaako ten teyyeece gedda, abittotuh makini titxiqqiqhem?

²⁶ Amaydo, nabsi ufaye hinnim rabe tiya akah kinniika balih, imaan gantah ciyyo hinnim rabe tiya kinni.