Yacqoob 1 - Saaho Cusub Cahde

Salaamta

¹ Yalla kee Maddara kin Yeesus Masiix garuzzo kin Yacqoobko, irolle faax-terhxeh tane lamman kee taman kishotya fanah: Salaamta.

Sinni imaan yacikkiniinim

² Yi saculo, mango caynah cakana sin taseedefe gedda, inkoh xeden balih ubula.

³ Amayim lel, sin imaan cakanadde saya gedda, curtayyo sinah baaham taarhigiinimhi sabbatah kinni.

⁴ Atin walaa inkim akko anqusinnixe yikmile mara kee gufe mara takkoona ciloh, amaa curtayyi kaamil yakkoo.

⁵ Sinadde kas kaa farhshiishati yinniyemko, cadalekkah umman tiyah xindaalih yaxaye Yalla dhaacimoo. Akah lel tamxawo kinni.

⁶ Tamaa dhaacimati laakin lammaa-garbitekkah imaanlih dhaacimoo, amayim lel lammaa-garbitati tamaa xaaxatti tuula kee tawlalle wana badti goomadhdhe balih kinamhi sabbatah kinni.

⁷ Amaa gina-le xiyawti Maddaraako walaa inkim kabbaato ilaalo kaalle mitane.

⁸ Usuk lamma-garbale, umbukaahimih agririnnixe tiya kinni.

⁹ Baaxenta kin sacal isheh xaf-yerhxeh yanemih cafadoo.

¹⁰ Gaddaale kinti lel cashshot combooba balih rabo kinamhi sabbatah sam-yerhxeh yanemih cafadoo.

¹¹ Ayrotta xiyaa xararishsha lacnaalih tawceyaako amaa cashsho kafishsha; tee combooba urgufumta, tee cirhi lel yalaye. Amayim balih, amaa gaddaali ishi araxalle dagum-dagumuh yalaw kinni.

¹² Tamaa cakanadde curtayyo abitati baraka-le tiya kinni, amayim lel cakanaako yawce gedda, tamaa Yalli kaa kixin marah wacde akah saye aniinat bor geyo kinni.

¹³ Akkinnanti cakanadde saya gedda: “Yalli cakanadde yi sayshe” arhxe wayo. Amayim lel Yalli umaanih yamcakkano mirhiica, usuk lel isheh walaa inketta miyacikkinemhi sabbatah kinni.

¹⁴ Ummanti ishi farhih hirgiimayaako yamlalayeh kinni cakanadde sayam.

¹⁵ Sarrah tamaa farhi soonoyitta gedda zambe dhalta, zambi lel meceetih carsima gedda rabi baaha.

¹⁶ Yinkixxine yi saculo, mamlalayna.

¹⁷ Inkoh mece muttuxuwa kee naqhuse hin muttuxuwa aganaako, ambedeedelinnixe hido yanqeyeeyere silal balih akkinnixe carshi ifohi Abbaako kinni obtam.

¹⁸ Nanu usuk isheh yukhluqheh yanemhi afti firehi caynaako nakko ciloh, ishi farhih rummaahit waanittah ni yuyshubuke.

Waanitta yaabbiinim kee abaanam

¹⁹ Yinkixxine yi saculo, tayim irhiga: ummanti dheh yaabbe tiya, waanille afitinnixe tiya, dheh kurrayinnixe tiya yakkoo.

²⁰ Amayim lel, xiyawti kura Yallih atxaqqaq mibahshishshamhi sabbatah kinni.

²¹ Amaydo, umbuka cayne kee mango umaani sinneeko mirix-ishsheenih, sin rooxe gargerto dhicta, sin addadde timzirriyeh tane waanitta amnonobba hinnim kabbata.

²² Tamaa waanittaatim aba mara tika kibah, sinne doolabteenih yaabbe mara bisa makkinanta.

²³ Amaa waanitta yaabbeh abinnixeti yinniyemko, tamaati magannaxitille macal kee magoh ishi nifidde kulux-yarhxe tiya balih kinni.

²⁴ Usuk ishedde kulux-yarhxeh yadiyemhi sabbatah, amaa geddaakoh aagina luuk yinem biyashshiita.

²⁵ Laakin tamaa gadma hin sercat, finjat sercat kinyadde, kulux-yarhxeh, kayyalle yasbiteti, tamaa yaabbem biyashshiitekkah abittodde ashishati, abamadde baraka-le tiya yakko kinni.

²⁶ Akkinnanti diin-wanna kinam ishek yekkelemko, ishi anrab lel algume wayemko, ishi afcaado doolaba, ta xiyawtih diin lel foyya kinni.

²⁷ Abba kin Yallih nifille tsitstsaye leh masxitinnixe diin tatiya kinni: gidcatite xeewo kee gubon gufaanam kee ta caalamti masxeeko sinni nabse yabbirhiinim.