Waxye 9 - Saaho Cusub Cahde

¹ Makawwanit malaykatti lel ishi thurumba yootokeyaako caranko xutukti baarholle radak uble. Kayyah lel amaa adda dherh boozoh maftix akah yomxoyeh yine.

² Usuk lel amaa adda dherh boozo faake. Amaa boozooko lel naba oton girah higgidin tiki lel akko yewce. Ayrotta kee cashshab lel amaa tikah dattowe.

³ Amaa tikaako lel cawayni baarholle oobe, tamaa baarhot igiirhahi xaylah higgidin xayli lel akah yomxoye.

⁴ Tamaa dambarakke Yallih maxtam aallinnixe mara bisa kibah, baarhot cashsho hido akkinnan andhaarha, hido farhinnan xarha akah biyaake wayaakah akah warishen.

⁵ Koona alsa ten waaxeelishoona kibah ten agdife wayoona fiqhaad akah yomxoye. Ten waaxelti lel tamaa igirh adde are tiya balih kuuk yine.

⁶ Amaa maxadde xiyaw rabi farhoona kinon, laakin geyoona makinooni. Rabih saanoona kinon, laakin rabi akko kuddo kinni.

⁷ Amaa cawayni lel dhibah yinqirribe faarisih higgiduk yine. Amomuk dahab booraarih higgidam luuk yinin; ten nifof lel xiyawimih higgiduk yine.

⁸ Ten dagar sayyootimih higgiduk yine; ten ikok lel luboktimih higgiduk yine.

⁹ Birti dircitih higgidin dircit lel luuk yinin, ten galilhi dhaw lel dhibat gabolle yarde mango faaristi karrossastimih higgiduk yine.

¹⁰ Igiirha balih lel sarrur kee ikok luuk yinin. Tamaa koona alsa xiyaw akah biyaakan xayla lel sinni sarrurudde luuk yinin.

¹¹ Nugusuh lel tamaa adda dherh boozoh malaykatto luuk yinin. Cibriyah lel kaa migac Abaddoon kuuk yine, Giriikih lel: “Abolliyoon” akko arhxuk yinin.

¹² Erherh bala tillabteh; taykinna, lamma bala racteh tane.

¹³ Sarrah, lix-ya malaykatti ishi thurumba yootokeyaako, Yallih nifille yane dahab mazbaxhi affara gashshaako wuli dhaw oobbe.

¹⁴ Amaa lix-ya malaykatti thurumba luuk yineya lel: “Awufraathis naba nahaar agaagalle yumudhdhuweh yane affara malaykatto iftix” arhxuk yine.

¹⁵ Amaymih amaa saaca, lellec, alsa kee iggidah yinqirribeh yine affara malaykatti, xiyawko maddaxit af yagdafoona yimfittixin.

¹⁶ Amaa faarisik koreh yine maxaarhohi manga lel, lamma bool miliyoonya kuuk yine; ten manga arhxuk oobbe.

¹⁷ Inni mablodde lel amaa faaris kee akko koreh yine mara taginah kinni ublem: usun girat gina, birti-dhayitti gina kee kirbit gina le dirce sariteenih yinin. Amaa faaristi amom lel lubokti amomuh higgiduk yine, ten afufko lel gira, tika kee baarud akko awcuk yine.

¹⁸ Ta adooxa balahi sabbatah baarhot xiyawko maddaxit af bakiten, amayim lel tamaa ten afufko awcuk tine gira, tika kee kirbitih kinni.

¹⁹ Amaa faaristi xayli ten afuf kee ten sarrurrudde yine, amaa ten sarrur carooraatimih higgiduk yine, amom lel luuk yine, amaymih abeenih kinni lel xiyaa biyaakak yiniinim.

²⁰ Ta bala agdifekkah racte xiyaw lel, ten gabub abe abittotko maataabinnooni. Amaa junuun kee tamaa yablo hido yaabbo, hido gerho taana dahabko, fiddaako, naxasko, dhayitko, boxooko, siraaxime asnaamah yacbudiinim mixabinnooni.

²¹ Amayim balih, usun sinni gidfo hido sinni shirxe hido sinni uma-xibar hido sinni garcaako maataabinnooni.