Waxye 8 - Saaho Cusub Cahde

Malxin-ya maxtam kee dahab magbir

¹ Amaa Leemi malxin-ya maxtam faake gedda, saacat abrha takkem carshelle sikko tekke.

² Sarrah, Yallih nifille daw-yerhxe malxina malaykatto uble, malxina thurumba lel akah tomxoyeh tine.

³ Aki malaykatti lel yemeeteyaako amaa dahab magbirlih mazbaxalle daw-yerhxe. Umbuka yinqiddise marahi dhaacoolih amaa nugus-kursehi nifille yemeeteh yaxaw lel mango caydarruus dahab mazbaxalle akah yomxoye.

⁴ Amaa caydarruus tiki lel amaa yinqiddise marahi dhaacoolih yekkeh, amaa malaykattohi gabaako Yallahi nifille ugute.

⁵ Sarrah amaa malaykatti, amaa magbir beyeyaako mazbaxko beye girah yemegeh baarholle cide. Amalle lel angud, dhaw, xankarha kee kirdidimo tekke.

Malxina thurumba

⁶ Sarrah amaa malxina thurumba luuk yine malxina malaykatti lel amaa thurumbab yaatakoona yinqirribin.

⁷ Erherh malaykatti ishi thurumba yootoke, amalle lel biili adde yengele barad kee gira temeete. Tayim lel amaa baarholle cidditte. Baarhooko lel maddaxit af xarare, xorhko maddaxit af xarare, amayim balih andharh cashsho inkoh xararte.

⁸ Malammit malaykatti ishi thurumba yootoke, bololta giraalih lel wuli naba koomah higgidinam badadde cidditte, amaa badko maddaxit af lel biilo yekke.

⁹ Badti ufayleeko maddaxit af bade, dooniikaako lel maddaxit af yelee.

¹⁰ Maddaxit malaykatti ishi thurumba yootoke, naba xutukti lel dabetta balih ifak caranko rade, nahaaraatko maddaxit af kee layet raxeenalle rade.

¹¹ Amaa xutuktahi migac lel Cur-tarhxe xarha kuuk yine. Layeko maddaxit af lel cuure yekke, amaa laye cuure kuuk tinemhi sabbatah lel mango xiyaw raben.

¹² Mafarrit malaykatti ishi thurumba yootoke, ayrottaako maddaxit af, alsaako maddaxit af, xutukko lel maddaxit af yumuttuke. Amaymih lel ten ifooko maddaxit af takkem dattowe. Lellecko maddaxit af dattowe, barko lel maddaxit af amayim balih.

¹³ Sarrah, kulux-erhxeh, lacani dhacumaatih andhaxak caranalle firiirixitak: “Adooxa malaykatti tamaa raaceh yane thurumbab yaatukin gedda ta baarholle martamak, sin careyta, sin careyta, sin careyta!” arhxuk kaa oobbe.