Waxye 7 - Saaho Cusub Cahde

Israa-eelko 144,000 xiyawtiyalle maxtam alle gaxe

¹ Taymik sarrah, amaa affara malaykatti baarhot affara nukurudde sooleh uble. Baarhot affara xaaxatti baarholle, badalle, hido akkinnan xarhalle xaaxayshamko lel deesak yine.

² Sarrah, yane Yallahi maxtam yibbirhe aki malaykatti ayrommaaxaako foorolle awcuk uble. Tamaa baarho kee bad biyaako reeza akah tomxoyeh tine affara malaykattoh wac-yerhxeyaako akah deecimeh:

³ “Nanu tamaa ni Yallahi khaddamteeko ten-ten dambaralle maxtam akko haynam fanah, baarho, bad hido xorh mibiyaakina” akko yerhxe.

⁴ Maxtam alle gaxe marahi manga lel ayidhdha kinam oobbe. Umbuka Israa-eel kishoshko maxtam alle gaxe mari lel 144,000 kuuk yinin:

⁵ Yahuudaati kishooko maxtam alle gaxem 12,000 kuuk yinin, Ruubeen kishooko 12,000, Gaad kishooko 12,000,

⁶ Aasheer kishooko 12,000, Naftaali kishooko 12,000, Menashshet kishooko 12,000,

⁷ Simcoon kishooko 12,000, Leewiiti kishooko 12,000, Issaakhaar kishooko 12,000,

⁸ Zebuulun kishooko 12,000, Yoosuf kishooko 12,000, Benjamiin kishooko maxtam alle gaxem lel 12,000 kuuk yinin.

Mangum mango xiyaw umbuka wathunko

⁹ Taymik sarrah, kulux-erhxe, taykinna lel, umbuka wathunko, inkoh kishosh, xiyaw kee waaniiko mangum mango xiyaw walaa inketti loolaysho taanaya, cado sara sariteenih, tamri xakuk gabubudde yibbirhinyaako, amaa nugus-kurse kee Leemih nifille sooleenih yinin.

¹⁰ Wac-yerhxiinih lel: “Garger nugus-kurselle defeyak yane ni Yalla kee Leemi tiya kinni!” yerhxiinih andhaxak yinin.

¹¹ Amaa malaykut lel inkoh amaa nugus-kurse, naba mara kee affara ufayletta makareenih daw-arhxuk yinin. Amaa nugus-kursehi nifille kumeenih lel Yallah yucbudin.

¹² Tahe lel arhxuk yinin: “Amin! Fayla, nabne, kas, xamde, xishma, xayla kee maso umman gedda kee umman gedih ni Yallah takkoo! Amin.”

¹³ Sarrah, amaa naba maraako inketti tahe yok yerhxe: “Ta cado sara sarittem miya kinooni, awlaako lel yemeetiini?”

¹⁴ Anu lel: “Yi casa-abba, atin taarhigin” akko erhxe. Usuk lel: “Ta mari tamaa naba waaxeltaako yewce mara kinon. Sinni sara cakalisheenih lel Leemi biiloh caddoyshen” yok yerhxe.

¹⁵ “Amaydo, usun Yallih nugus-kursehi nifille yanin, kaa macbadadde lel bar kee lellecih akah yacbudin; amaa nugus-kurselle defeyati lel ishi aniinah ten silaalisho kinni.

¹⁶ Kamboh safriitoona makinooni, bakhaaritoona lel makinooni, ayrottat lacna kee, harur ten dhafo maki.

¹⁷ Amayim lel, tamaa nugus-kursehi fanadde yane Leemi ten loyna yakkeh, tane layet raxeena fanah lel ten santisheyaako, Yalli ten intit hi dhiimo inkoh akah kalo kinamhi sabbatah kinni.”