Waxye 6 - Saaho Cusub Cahde

Malxina Maxtam

¹ Kado, amaa Leemi amaa malxina maxtam faakak uble, amaa affara ufaylettaako inketti lel anguduh higgid dhawah: “Amo!” arhxuk oobbe.

² Kulux-erhxeh lel taykinna, cado faras! Teyak yineti lel qesti luuk yine, bor lel akah yomxoye. Yamlako yewceyaako lel yimlike.

³ Usuk malammit maxtam faake gedda, malammit ufayletti: “Amo!” arhxuk oobbe.

⁴ Aki gira balih casa faras lel tewce. Amaa teyak yine tiyah lel ta baarhooko salaam yaylawo kee xiyaw sittiyaalih yasgadafo fiqhaad akah yomxoyeh yine. Naba sef lel akah yomxoyeh yine.

⁵ Usuk maddaxit maxtam faake gedda, maddaxit ufayletti: “Amo!” arhxuk oobbe. Kulux-erhxeh lel taykinna, dat faras! Amaa teyak yineti lel miizan gabadde luuk yine.

⁶ Tamaa affara ufaylettahi fantaako yawceyah higgidin dhaw lel: “Inki sinraa xarich hi cissi rubuc diinaarah, cadeelaw xarich hi cisse takkem lel diinaarah, zeet kee wayni laakin mirhagin!” arhxuk oobbe.

⁷ Usuk mafarrit maxtam faake gedda, mafarrit ufayletti: “Amo!” arhxuk oobbe.

⁸ Kulux-erhxeh lel, taykinna, ambuuzin faras! Teyak yine tiyahi migac lel Raba kinni. Hadees lel kaa kataak yine. Tenah lel sef, culul, laxuu kee zibi alluulah ta baarhooko rubuc takkem yagdafoona reeza akah tomxoye.

⁹ Usuk makawwanit maxtam faake gedda, tamaa Yallih waanitta kee aben shahaadahi sabbatah tumruxxudemhi rooxit amaa mazbax geridde uble.

¹⁰ Wac-yerhxiinih lel: “Ko ishe dhiica quddus kee rumma kin Maddaraw, ta baarholle mara mara tafrideh ni biilohi xane akko tafdiyendah ayidhdha kok beyo kinni?” yerhxinyaako zeeren.

¹¹ Babbarhi tiyah lel cado sari akah yomxoyeyaako, ten zooba kin khaddamte kee ten saculhi manga tamaa ten balih yagdafoona lonyahiya takmilendah, dago gedih yacrafoona akah warishen.

¹² Usuk lix-ya maxtam faake gedda, kulux-erhxe, taykinna lel, naba kirdidimo tekkeyaako, ayrotta guulat sareena balih dattoyte. Alsi lel sittiyadde biilo balih cassoye.

¹³ Tamaa indacaari lel dhacuma xaaxatti wahana gedda ishi daro akah urgufaaka balih, caranti xutuk baarholle rade.

¹⁴ Caran lel sawalen maqhaddamat balih yuntullule, koomam kee juzur lel inkoh ishi caraako yentexeexeze.

¹⁵ Baarhot nuguusa, makaabun, caskar filcohi naba mara, gaddaalit, xayla le mara, ummanti, garuuza kee finjalit, galub kee koomamti dumamadde sucuten.

¹⁶ Amaa koomam kee dumamak lel: “Nolle raddeh tamaa nugus-kurselle defeyeh yane tiyahi nif kee amaa Leemahi kuraako ni sucus.

¹⁷ Amayim lel, tamaa naba maxhi ten kura temeeteh tanemhi sabbatah kinni, tayimko raaco dhiicati lel miyatto kinni?” akko yerhxin.