Waxye 5 - Saaho Cusub Cahde

Maqhaddamat kee Leema

¹ Sarrah tamaa nugus-kurselle defeyeh yine tiyahi mizgi gabooko iro kee addaako kutuub alle yane maqhaddamat malxina maxtamah tumxuttumeya uble.

² Mangum sirii malaykatti lel: “Ta maqhaddamat faako kee ta maxtam yaftaxo akah eeddati miyatto kinni?” yerhxeh wac-yerhxeyaako waanishak uble.

³ Ta maqhaddamat faako hido kulux adde yarhxo dhiica tiyah carshelle yakko baarholle, hido baarhot geridde walaa inketti miyine.

⁴ Anu lel, ta maqhaddamat faako yakko kulux adde yarhxo akah eedda tiyah walaa inketti waytimemhi sabbatah nabaatih weeco erherhishe.

⁵ Amaa naba maraako inketti lel: “Kamboh miweecin; taykinna, Yahuudaati kishooko kin Lubak, Dawud rimidko kinya, amaa maqhaddamat kee tee malxina maxtam faako ciloh yimlikeh yane” yok yerhxe.

⁶ Amaa nugus-kurse kee affara ufaylettahi fanta kee amaa naba marahi addadde, yumruxxudeh higgidin Leemi daw-yerhxeya uble; ta Leemi lel malxina gashsha, malxina inti luuk yine. Tayim lel tamaa umbuka baarholle farritime Yallih malxina ufaye kinni.

⁷ Usuk lel yedeeyaako tamaa nugus-kurselle defeyeh yine tiyahi mizgi gabooko amaa maqhaddamat beye.

⁸ Amaa maqhaddamat beye gedda, amaa affara ufayletta kee naba marih lamaatanna kee afar amaa Leemah akah kumen. Usun lel babbarhi kiraar kee dahab shaxun caydarruusko yemmeegeya yibbirhiinih, yinqiddise marahi dhaaco aben.

⁹ Tahe arhxuk lel cusub nazme aben: “Atu amaa maqhaddamat beyto kee kaa maxtam akko fakto koh eedda, amayim lel tumruxxudemhi sabbatah, ishi biiloh xiyaw Yallah, umbuka kisho kee waani kee xiyaw kee wathunko irarte.

¹⁰ Tenak lel ni Yallah nigsinna kee sheekha akko abte, usun lel baarholle yangasoona kinon.”

¹¹ Sarrah lel kulux-erhxeh, amaa nugus-kurse kee umbuka ufayelit kee naba marahi lamma galelle mango malaykut hi dhaw oobbe. Ten manga lel nabaatih xadde hinam kee mango shiixaatah loyyimtam kuuk yine.

¹² Wac-yerhxinyaako lel tahe arhxuk yinin: “Amaa yumruxxude Leemah, reeza, gadda, kas, xayla, xishma, nabne kee fayla kabbaatam akah eedda!”

¹³ Tamaa inkoh tunkhulluqheh tanem carshelle, baarholle, baarhot geridde, bad kee inkoh amadde tanem tahe arhxuk oobbe: “Tamaa nugus-kurselle defeya tiya kee amaa Leemah fayla, xishma, nabne kee xayli umman gedda kee umman gedih kayyah yakkoo!”

¹⁴ Amaa affara ufayletti: “Amin” yerhxin, amaa naba mari lel kumeenih akah yucbudin.