Waxye 4 - Saaho Cusub Cahde

Nugus-kurse carshelle

¹ Amaymik sarrah kulux-erhxeyaako, taykinna, carshedde fakkite caraf uble! Thurumbat andhax le dhaw tamaa afti gabolle oobbeh iniyoya: “Agana talle amo, anu lel taymik sarrah ayim takko alle tanem ku ayballaw kiyo” yok yerhxe.

² Akkanih lel Yallih Ufayi yi yibbirheh, taykinna, nugus-kursi carshelle yine, amaa nugus-kurselle lel defeyati yine.

³ Amaa nugus-kurselle defeyeh yineti lel jaspis kee sardiyonti macdinhi xibar luuk yine, amaa nugus-kursehi lamma-galelle lel esmarandosti macdinhi xibar le robraat tine.

⁴ Amaa nugus-kursehi lamma-galelle lel nugus-kursitko lamaatanna kee afar yine, amaa nugus-kuraasille lel cado sara saritteh, sinni amok lel dahab bor le lamaatanna kee afar naba maraako yinin.

⁵ Amaa nugus-kurseeko lel xankarha kee angud diixiyo tekke. Amaa nugus-kursehi nifille lel bololta girahi malxina dabetti yine, amayim lel malxina ufaye Yallihiya kinon.

⁶ Amaa nugus-kursehi nifille lel lilic-tarhxe bitro balih kin bad, sulxun cadoo-dallucuh higgidinya yine. Amaa nugus-kursehi lamma galelle, babbarhi nugus-kursehi ribille lel, nif kee caazaako intitih yemmeege affara ufayletti yane.

⁷ Erherh ufayletti lubakah higgida, malammit ufayletti beceerah higgida, maddaxit ufayletti xiyawti nif-le, mafarrit ufayletti lel firiirixa lacaneh higgida.

⁸ Ta affara ufayletti, babbarhi lixa gale leya, adda kee iroh lel intitko temmeegem kinon, bar kee lellecih lel daweena hinnim: “Quddus, quddus, quddus kinni Nabamko Naba Maddara kin Yalli, usuk yineh yaneh yamaato le tiya kinni!” arhxuk yinin.

⁹ Amaa ufayle, tamaa nugus-kurselle defeyeh yaneyah, umman gedda kee umman gedille marayah nabne, xishma kee cawat akah axayinnan gedda,

¹⁰ tamaa naba marih lamaatanna kee afar lel tamaa nugus-kurselle defeyeh yane, umman gedda kee umman gedille marayahi nifille kumeenih akah yacbudin. Sinni booraari amaa nugus-kursehi nifille cideenih lel:

¹¹ “Koh eedda, ni Maddara kee ni Yalla, nabne, xishma kee xayla kabbatto, amayim lel atu ummanim tukhluqhemhi sabbatah kinni, ku farhih lel aniina geyeenih yunkhulluqhin” yerhxin.