Waxye 22 - Saaho Cusub Cahde

Aniinat nahaar

¹ Sarrah amaa malaykatti Yalla kee amaa Leemahi nugus-kurseeko yawce cadoo-dallucta balih lilic-yarhxe aniinat layehi nahaar yi yuybulluwe.

² Amaa daafohi shaaric fantaako lel weecishak yine. Amaa nahaar lamma carhaako lel alsa alsah daro baahak iggidalle lamman kee taman waqhtiya daro bahta aniinat xarha tine. Amaa xarhahi dharhaa lel wathun urusak yine.

³ Kamboh abaaro tannaw makiiki, Yalla kee amaa Leemahi nugus-kurse amalle yannawna kinon. Kaa khaddamte lel akah yacbadoona kinon.

⁴ Usun kaa nif yabloona kinon, kaa migac lel ten dambaralle yannaw kinni.

⁵ Kamboh bar yannaw maki. Maddara kin Yalli ten ifo yakko kinamhi sabbatah, faanus ifo hido ayro ten farhshiisho maki, usun lel umman gedda kee umman gedih yangasoona kinon.

Yeesus amiituk yane

⁶ Amaa malaykatti lel tahe yok yerhxe: “Ta waani yaaminiinim kee rumma kinni. Nobowat ufayehi Maddara kin Yalli, ta dhaye geddadde ayim takko lem ishi khaddamte yayballaw ishi malaykatto dhirhiyeh yane.”

⁷ “Taykiyo, dheh amiitiyuk aniyo. Ta kitaabadde nobowa waanisheenih yanin waani dhawrheti lel baraka-le kinni” yok yerhxe.

⁸ Anu, Yohannis kiyoyak, tayim yoobbeh yuble tiya kiyo. Tayim oobbeh uble gedda lel, tayim yi yuybulluwe malaykattoh akah acbado erhxeh kaa gerille kume.

⁹ Laakin: “Atu amayim abto kolle mitane! Anu kotta kee ku sacul kin nobowa, amayim balih ta kitaabhi waani dhawrha marahi zoobatto kin khaddaam kinni kiyom. Atu Yallah ucbud” yok yerhxe.

¹⁰ Yok yerhxe lel: “Amaa waqhti kab-yerhxeh yanemhi sabbatah, amaa nobowat waani ta kitaabhiya maxtamah abteyaako maalifin.

¹¹ Amaa umati umam aboo, abaxeti abaxtem aboo, xaqqi-wanna xaqqe aboo, amaa yinqiddiseti lel yinqiddise tiya yakkoo.”

¹² “Taykiyo, anu dheh amiitiyuk aniyo, umman tiyah kaa-kaa abittot hi casbe inneelih baaheh akah axawo kiyo.

¹³ Anu Alfa kee Oomeega, erhedhdho kee sarroorimto, erherha kee abayshima kiyo.”

¹⁴ Amaa aniinat xarhadde xaqqe yaalloona kee amaa daafodde carufko oroboona ciloh sinni sara cakalisha mari baraka-lem kinon.

¹⁵ Irolle yane mari lel kaara, shirxe aba mara, uma-xibarlit, nabsi-wannun, asnaamah tacbudem kee zirab kixinah aba mara kinon.

¹⁶ “Anu, Yeesus, tayim amaa kanaayisidde sinalle warroyisho inni malaykatto dhirhiyeh aniyo. Anu Dawud rimidda kee kaa zaraako kiyo, amaa ifisha maaxi xutukta lel kiyo.”

¹⁷ Ufaye kee cibna lel: “Amo” yarhxin. Amaa yaabbeti lel: “Amo” yarhxoo. Bakhaarati lel yamaatoo; farhati amaa aniinat layeko amaa ginah bishshiitoo.

¹⁸ Ta kitaabhi nobowat waani taabbemik lel umman tiya asuusak aniyo: akkinnanti adde osemko, Yalli ta kitaabadde xussumteh tane bala akah oso kinni.

¹⁹ Akkinnanti ta nobowat waanih kitaabko inkim akko yuynuqhusemko, ta kitaabadde xussumteh tane aniinat xarha kee amaa tinqiddise daafodde leya gideeko akko yaynaqhaso kinni.

²⁰ Tamaa taymih yashhideti: “Thummutuh anu dhaye geddadde amiitiyuk aniyo” yarhxe. Amin. Amo, Maddara kin Yeesuso!

²¹ Maddara kin Yeesus hi nicma umman tiyaalih takkoo. Amin.