Waxye 21 - Saaho Cusub Cahde

Cusub caran kee cusub baarho

¹ Sarrah cusub caran kee cusub baarho uble, afti caran kee afti baarho tillabteh tanemhi sabbatah lel kamboh bad yannaw maki.

² Amaa tinqiddise daafo uble, cusub Yerusaalem, ishi marcawwih bilcitteh tinqirribe cibna balih carsheeko Yallaako oobak uble.

³ Amaa nugus kurseeko lel wac-yarhxe dhaw: “Taykinna, Yallih sigimi xiyawlih yekke. Usuk lel tenlih sigo kinni, usun lel kaa xiyaw yakkoona kinon. Yalli lel isheh ten Yalla balih tenlih yakko kinni.

⁴ Usuk lel umman dhiimo ten intitko asac-isho kinni. Tamaa aftim tillabtemhi sabbatah kamboh rabi hido xazan, hido weeca, hido waaxelti yannaw maki” arhxuk oobbe.

⁵ Amaa nugus-kurselle defeyeh yineti lel: “Taykinna, umbukaahim ascussubiyuk ane” yerhxe. “Ta waani yaaminiinim kee rumma kinamhi sabbatah uktub” lel yok yerhxe.

⁶ Sarrah: “Abayshimte! Anu Alfa kee Oomeega, erhedhdho kee sarroorimto kiyo. Bakhaarite tiyah lel aniinat layehi raxeenaako amaa ginah akah axawo kiyo.

⁷ Tamaa yamliketi ta miiraas yaallo kinni, anu lel kaa Yalla akko kiyo, usuk lel yi barha yakko kinni.

⁸ Tamaa gilixlit, imaan hinam, batakna kinam, nabsi-wannun, uma-xibarlit, shirxe abtam, asnaamah tacbudem kee inkoh zirablit, ten gide lel gira kee kirbitih bolola igil kinni. Tayim lel malammit raba kinni” yok yerhxe.

Cusub Yerusaalem

⁹ Sarrah amaa malxina malaykattooko inketti tamaa abayshimat malxina balaako yemmeege malxina shaxan yibbirheya: “Amaa cibna, amaa Leemahi numa ku ayballaw kiyok, amo!” yerhxeh yoolih waanishe.

¹⁰ Ufayeh abeh lel dherh naba koomalle yi korisheh, amaa tinqiddise daafo kin Yerusaalem carsheeko Yallaako oobak yi yuybulluwe.

¹¹ Ishi Yallih nabne luuk tinemhi sabbatah lel tee ifi tamaa mango mila, jaspis balih, sulxun cadoo-dalluc balih kuuk yine.

¹² Lamman kee taman carafiya le dherh naba qaana luuk tine, amaa carufudde lel lamman kee taman malaykattiya yinin. Amaa carufulle lel Israa-eel lamman kee taman kishotiyahi migoc alle yunkuttubeh yine.

¹³ Ayrommaaxaako adooxa caraf, qilbaako adooxa caraf, junuubko adooxa caraf kee ayrodhdhumaako adooxa caraf luuk tine.

¹⁴ Amaa daafohi qaana lel masarrat dhayitko lamman kee taman luuk tine. Amaa dhayit hi bukalle lel amaa Leemahi fartottit hi migoc alle yine.

¹⁵ Amaa yottaalih waanishe malaykatti lel amaa daafo kee tee caruf kee qaanun akah yaqhaaso dahabko siraaxime ilot masfar luuk yine.

¹⁶ Amaa daafo affara murabbac kuuk tine, tee dhedhdhan kee masangale, xaafenta lel lem kuuk tine. Amaa iloh amaa daafo yeqheeseh lel 2,220 kiilo meter takkem akko abe. Tee dhedhdhan, masangale kee xaafenta lel lem kuuk tine.

¹⁷ Amaa tee qaana yeqheese gedda lel 65 mitrotiya takkem yekke.

¹⁸ Amaa qaana jaspisko siraaximteh tine, amaa daafo laakin lilic-tarhxe bitro balih tsitstsayin dahabko siraaximteh tine.

¹⁹ Amaa daafoh qaanahi masarrat lel umman caynahi milaako bilciteh yine. Erherhti jaspis, malammi saffiros, maddaxi khalkeedoon, mafarri esmarandos,

²⁰ makawwani sardonik, lix-yati sardiyon, malxin-yati khirusolitos, baxar-yati beerillos, sagal-yati tobaziyon, taman-yati khirosobrasos, inikan kee taman-yati yakintos, lamman kee taman-yati ametistos kuuk yine.

²¹ Amaa affaran kee taman carafiya lel lamman kee taman luulko kuuk yine. Babbarhi caraf lel amaa luulko siraaximeh yine. Amaa daafoh shaaric lel lilic-tarhxe bitro balih sittiyadde dahab kuuk yine.

²² Tee macbad lel Maddara kin Nabamko Naba Yalla kee amaa Leema kinamhi sabbatah, amaa daafolle macbad maballiyo.

²³ Akah ifishsham Yallih nabne, tee faanus lel amaa Leema kinamhi sabbatah, amaa daafo akah ifishsha ayro hido alsi tee mifarhshiisha.

²⁴ Tee ifoh umbuka wathun gerhoona kinon, baarhot nuguusa lel sinni nabne teyalle baahoona kinon.

²⁵ Tee caruf itre caduruh alfiimo maki, amalle lel bar caduruh alle yannaw maki.

²⁶ Usun wathunti nabne kee xishma alle baahoona kinon.

²⁷ Tamaa amaa Leemahi aniinat kitaabadde migoc akko yunkuttubeh yane maraako bextih, xaraame kinam hido batakna kinam kee zirab inkinnah adde orobo maki.