Waxye 2 - Saaho Cusub Cahde

Efesosulle tane kaniisa fanah

¹ Efesosulle tane kaniisahi malaykattolle taginah alle uktub: “Tamaa ishi mizgi gabadde malxina xutukta yibbirheh, malxina dahab qandel-defeenahi fanadde gerhati tayim arhxuk yane:

² ‘Anu ku abittot, ku xawal kee ku sabre, amayim balih uma maraalih tadaw mirhictam aarhige. Laakin, makinooni hanuk tamaa sinnek fartottit aba mara ten icikkineyaako, zirablit yekkiinih yoh sugen.

³ Atu curtayyo litom kee yottah arhxituk niya cidekkah caggaboytem aarhige.

⁴ Laakin tamaa erherhih luuk tinito kaxano xabtemih kolle ibbirheh aniyo.

⁵ Amaydo, awlaako raddeh tanitom xunsus; totoobeyaako lel, tamaa erherhih abte abittot ab. Akke wayemko, atu lel atoobe waytemko, emeeteh tamaa ku qandel-defeena tee caraako asac-isho kiyo.

⁶ Mecemih laakin takke lito: tamaa anu gantah nicibiyo Nikolawosti marahi abittot nicibto’.

⁷ Cokka leti, tamaa Ufayi kanaayisik arhxuk yanem yaabboo. Tamaa yamlike tiyah lel Yallih jannadde tane aniinat xarhaako akah beetaakah akko abo kiyo.”

Simurnalle tane kaniisa fanah

⁸ Simurnalle tane kaniisahi malaykattolle taginah alle uktub: “Tamaa rabeyaako aniinalle gaxe erhedhdho kee sarroorimti tayim arhxuk yane:

⁹ ‘Ku waaxelta kee ku baaxa aarhige. Atu laakin gaddaale kito! Tamaa makinooni hanuk zirabah “Yahuud kino” yarhxe Sheethan sunagoogi, koh waatimeenim aarhige.

¹⁰ Kolle yakko le camazaako mimashshiitin. Taykinna, tattacakkanoona ciloh ibliis sinko garo xabshedde cido le. Tamana lellecih lel waaxelsittoona kitin. Atu raba fanah umun tik, anu lel aniinat bor koh axawo kiyo’.

¹¹ Cokka leti, tamaa Ufayi kanaayisik arhxuk yanem yaabboo. Tamaa yamliketi malammit rabah biyaakito maki.”

Bergamosulle tane kaniisa fanah

¹² Bergamosulle tane kaniisahi malaykattolle taginah alle uktub: “Lillig lamma af-le sef le ti tayim arhxuk yane:

¹³ ‘Atu awla martam aarhige, tamaa Sheethan nugus-kursi alle yanekke kinni. Laakin yi migac qath-ishsheh tibbirheh tanito, tamaa Sheethan alle maralle umun kin yi shaahid Antibas sin fanadde yigdifin maxadde gantah yottah yaaminiinim mixinito.

¹⁴ Yakko kibah, dagum kolle ibbirheh aniyo: dago mari Balcaam darse kataytaya sinadde yanin. Usuk tamaa Israa-eel dhaylo andafisho ciloh, usun asnaamah tinsiddiqhe folo beetoona kee uma-xibar akah abaanaakah Balaak yuyduruse.

¹⁵ Amayim balih Nikolawosti marahi darse kataa mari koolih yanin.

¹⁶ Amaydo, otoob. Akke wayemko, anu akkanih kolle emeeteyaako, tamaa inni afhi sefih aalih dhibbaw kiyo.’

¹⁷ Cokka leti, tamaa Ufayi kanaayisik arhxuk yanem yaabboo. Tamaa yamlike tiyah lel sucutte mannaako wulim akah axawo kiyo, cado dhayitto lel akah axawo kiyo, ta cusub migac alle yunkuttube dhayitto lel kabbaate tiyaako bextih walaa inketti miyaarhige.”

Tiyateyralle tane kaniisa fanah

¹⁸ Tiyateyralle tane kaniisahi malaykattolle taginah alle uktub: “Bololta girah higgidin intit le, kaa iboobi lel cebedisheenih qarcoyshen naxasah akko higgid Yallih Barhi tayim arhxuk yane.

¹⁹ ‘Ku abittot, kaxano, imaan, khidma, curtayyo, amayim balih sarroorim ku abittotko afti ku abittot mango.

²⁰ Laakin tayim kolle ibbirheh aniyo: tamaa nabiita ishek abta Yezaabelille alle curte. Ishe ishi darseh abteh yi khaddamte uma-xibar aboona kee asnaamah tinsiddiqhe folo akah beetaanaakah ten doolabte.

²¹ Anu tataabo caashir akah oxoyeh iniyo, ishe laakin ishi uma-xibarko tataabo xinte.

²² Taykinna, teya laxuu caratalle tee cido kiyo. Tamaa teelih yazniye mara lel tee abittotko atoobe wayenimko, naba waaxeltadde ten cido kiyo.

²³ Tee cindham lel umammaatih ten agdafo kiyo. Umbuka kanaayis lel anu xangal kee afcaado yaklule tiya kiyom yaarhagoona kinon. Umman sina lel sin-sin abittot balih sinah axawo kiyo.

²⁴ Sinko gari Tiyateyralle yaneyak, inkoh ta darse katayinnixe marak, tamaa gari, “Sheethan addahi gelo” akko yarhxiinim labcaade wayteyak, tahe sinak arhxe: “Aki cuuka sinalle hayo makiyo.”

²⁵ Anu amiitem fanah bisa tamaa litiinimille isbita.

²⁶ Tamaa yamlikeyaako yi abittot abayshima fanah yabbirhe tiyah, umbuka wathunhi bukalle reeza akah axawo kiyo.

²⁷ Usuk lel tamaa anu inneh inni Abbaako reeza akah kabbaateeka balih, birti iloh ten yigziyeyaako, kallat citror balih ten yagaadalo kinni.

²⁸ Anu lel maaxi xutukta akah axawo kiyo.’

²⁹ Cokka leti, tamaa Ufayi kanaayisik arhxuk yanem yaabboo.”