Waxye 18 - Saaho Cusub Cahde

Baabiloon radnan

¹ Taymik sarrah wuli naba reeza le malaykatti carsheeko oobak uble. Kaa nabnehi ifoh lel baarho iffoyte.

² Wac-yerhxeh lel taginah deecime: “Amaa naba Baabiloon, radde, radde! Junuun sigimahi makaano lel tekkeh tane, umbuka uma ufayehi sucseena tekkeh tane, umbuka uma kimbirti sucseena tekkeh tane, umbuka uma tiya kee batakna kin alluulattohi sucseena tekkeh tane.

³ Umbuka wathun tee uma-xibar hi farhih wayni yoocobin, baarhot nuguusa lel uma-xibar teelih aben, baarhot bacshaaro lel tee xayih xaylah murhen.”

⁴ Sarrah aki dhaw carsheeko tahe arhxuk oobbe: “Yi xiyawo, akko ewecanta, tee zambedde tangalinki, tee bala xazziilittanki;

⁵ amayim lel tee zambi rorsimeh agana carshe gufeh yane, Yalli lel tee umaani xunsuuseh yanemhi sabbatah kinni.

⁶ Ishe garoh akah tifdiyeekah akah ifdiyanta, ishe sinak abtem balih lamma gedda akah ifdiyanta; ishe adde culte kobbaayadde, lamma gedda akah culanta.

⁷ Ishi nabse teynebeyaako xayidde akah marteekah, amayidhdha cazaab kee xazanko akah uxuwa, ishi afcaadodde lel: ‘Anu nigisti ekkeh defeya, anu gubna makiyo, caduruh lel xazan ablo makiyo’ kinni tarhxem.

⁸ Tayimhi sabbatah, tee bala inki maxadde alle obto kinni. Rabi, xazan kee culul alle yamaato kinni, girah lel xararto kinni; amayim lel teya yafrideti xayla le naba Maddara kin Yalla kinamhi sabbatah kinni.”

⁹ Tamaa teelih uma-xibar abteh xayidde teelih marte baarhot nuguusa lel tee xarar hi tika yablin gedda, alle weeceenih alle xazzanoona kinon.

¹⁰ Teyalle oobe cazaabhi mashshih lel waacinalle sooleenih tahe yarhxoona kinon: “Ku careyta! Ku careyta! Te naba daafoo, te caguura kin daafoo, Baabiloon! Ku firdi inki saacalle yemeeteh yane.”

¹¹ Ten nuwaa toyek sarrah walaa inketti mirhaamamhi sabbatah lel baarhot bacshaaro, weeceenih yaxzanoona kinon.

¹² Ten nuwaa lel dahab, fidda, mila, luul, diimayin sara, bafta, casa sara, umbuka caynahi boxo mece ure leyaya, umbuka caynahi nuwaa dakani ikooko siraaximeya, umbuka caynahi nuwaa limo naba boxooko siraaximeya, naxas, birit kee carha mece dallucko siraaxime nuwaa,

¹³ qarfa, qamam, caydarruus, cithir-le zeet caydarruus, wayni, zeet, xarich, sinraa, laa kee ciido, faaris kee karrossas kee garuuza kee gaba toxoyem kinon.

¹⁴ Usun lel: “Tamaa atu akah santeh tinito daro kok tedeeh tane, ku gadda kee ku cirhi lel kok yeleeh yane, malammih lel caduruh geytimo maki” akko yarhxoona kinon.

¹⁵ Ta nuwaahi bacshaaro, teeko gadda tiksibeya lel, waacinalle daw-yerhxiinih, tee cazaabko mashshiitenyaako, tahe arhxuk nabaatih weeceenih yaxzanoona kinon:

¹⁶ “Naba daafoo, ku careyta, ku careyta! Carha mece bafta, diimaynam kee casam saritteh, dahab, mila kee luuluh bilcitteh tanito!

¹⁷ Amayim lel ta gaddi inkoh inki saacalle coona yekkeh yanemhi sabbatah kinni.” Inkoh doonik mas-uuliin, naakudit, baxriya kee inkoh badalle bicishra abtam, waacinalle daw-yerhxiinih,

¹⁸ tee xarar hi tika yubliinimhi sabbatah tahe arhxuk zeeren: “Naba daafoh higgidin daafoh awlih tiyä tane?”

¹⁹ Weecak kee xazzanowak lel buure sinni amomulle xarheenih: “Naba daafoo, ku careyta, ku careyta amaa inkoh badalle dooniika luuk yine mari tee gaddah gaddaaliten! Amayim lel ishe inki saacalle coona tekkeh tanemhi sabbatah kinni.

²⁰ Carshe, alle xeden, atin lel yinqiddise mara kee fartottit kee nobowak, Yalli sinah arhxuk tee yifrideh yanemhi sabbatah alle xedenanta!”

²¹ Sarrah wuli caguura kin malaykatti marhxanah higgidin dhayitto yooqhoceyaako tahe arhxuk badadde cide: “Baabiloon amaa naba daafo, taginah dhacumaatih cidditteyaako, kamboh geytimto maki;

²² kiraar taatukem, margadishsham, machambara taatukem kee thurumba taatukemhi dhaw, kamboh kolle yamabbo maki, farhinnan cijaajinnah cijaajeeni lel kamboh kolle geytimo maki, tarhxine makiinahi dhaw lel kamboh kolle yamabbo maki,

²³ faanus ifi lel kamboh kolle ifo maki, marcawwi kee cibnah dhaw lel kamboh kolle yamabbo maki, amayim lel ku bacshaaro ta baarholle naba mara kuuk yiniinimhi sabbatah, umbuka wathun lel ku shirxeh doolabimeenimhi sabbatah kinni.

²⁴ Nobowa kee yinqiddise mara kee inkoh baarholle tumruxxudemhi biili teyalle geytime.”